Asa naar yʋma
16
1 Asa na'am la da paae yʋma pistan' nɛ ayuobʋ la, Israel Na'ab Baasa da duoe zabid nɛ Juda, ka keŋ Rama teŋinɛ gu' ba ka mɛɛ ba kpi'euŋ zin'ig la ka sɔ' kʋ nyaŋi kpɛn' bɛɛ yi Asa Juda Na'ab sʋ'ʋlim la nii. 2 Asa da nɔk anzurifa nɛ sanlima linɛ da kpɛlim Zugsɔb Yir la suak dɔɔdin la wʋsa nɛ linɛ bɛɛ o mɛŋ na'ayin la. O da nɔki li tɔlim tis Aram Na'ab onɛ yʋ'ʋri da buon Ben-Hadad ka o sʋ'oe Damaskus tempʋʋg la. 3 Ka yɛl o ye, “Kɛl ka nɔnaar bɛ man nɛ fʋ sʋʋgin, nwɛnɛ m saam nɛ fʋ saamme da mɔr nɔɔr yinne si'em la. Gɔsima, anzurifa nɛ sanlima ka m nɔki tisidif ka li an piini. Nannanna yisimi fʋ nɔnaar Israel Na'ab Baasa san'an ka li na kɛ ka o fuoe o nu'ug man san'an.”4 Ben-Hadad da siak Na'ab Asa nɔɔr ka tʋm o zabzabidib tuongatib ka ba keŋ zab nɛ Israel tɛɛns la. O da nyaŋ Iyon teŋ nɛ Dan teŋ, nɛ Abɛl-Bet-Maaka teŋ, la'am nɛ Naftali dɔɔg sʋ'ʋlim la'ad suak tɛɛns la wʋsa. 5 Baasa n da wʋm nɛ'ɛŋa la, o da bas Rama mɛɛb, ka kɛɛsi o tʋʋma bas. 6 Ka Na'ab Asa yʋ'ʋn tis nɔɔr ye Juda dim wʋsa kem fuos kuga nɛ daad banɛ bɛ Rama ka Baasa da mɔri tʋm anina la wʋsa mɔri keŋ. O da nɔki li mɛ' Geba teŋ linɛ bɛ Benjamin teŋin la, nɛ Misipa teŋ.
7 Saŋa kan la, Hanani onɛ da nyɛt nier yɛla la da kɛn Juda na'ab Asa san'an na yɛl o ye, “Fʋn ti'enɛ Aram na'ab la ka ka' Zugsɔb onɛ aan fʋ Wina'am la, Aram na'ab zabzabidib la yii fʋ nu'ugin ka fʋ kʋ lɛn nyaŋi baa. 8 Kus nɛ Libiya zabzabidib la da pʋ zu'oe hali, ka mɔr zaba tɛrekonam nɛ wiedban'adib bɛdegʋ? Amaa fʋn daa ti'e Zugsɔb la o daa kɛ ka fʋ nyaŋi ba. 9 Bɔzugɔ Zugsɔb la nini ieed nɛ dunia wʋsa ye o kpɛmis banɛ nɔki ba sʋnf wʋsa pɛsig o. Fʋ tʋmnɛ gaan tʋʋma, ka lin yi zina mɔri ken fʋ na bɛ tanp nɛ zaba pʋʋgin.” 10 Asa sʋnf da duoe nɛ onɛ nyɛt nier yɛla la tis o labasi'a la zug. O sʋnf da pɛlig nɛ hali ka o gban'e o yɔ' sanrega ni. Li Saŋa nɔɔ Asa da muk nidib la sieba bɛdegʋ.
11 Ya'a kpɛlim yɛla banɛ da maal Asa na'am diib saŋa, li pin'ilʋgʋn ti paae li naarin la, ba da sɔbi li niŋ Juda Na'anam nɛ Israel Na'anam Gbauŋʋn la. 12 Asa na'am yʋʋm pistan' nɛ awai saŋa la ban'a da gban'e o nɔba. La'am nɛ o ban'a la da mugus o hali la o da pʋ bɔ sʋŋir Zugsɔb la nii, ka lɛɛ ieed du'atanamin. 13 Na'ab Asa na'am la yʋma pisnaasi nɛ yinne ni la o da maal ka'alim, 14 ka ba mum o yaʋg kanɛ ka o mɛŋ da tu David tempʋʋgin la. Ba da digil o sɔnduoya zug ka niŋ bʋnnyubisa nɛ tudaari nɛ li buudi wʋsa. Ba da mum o ka maali nyu'oe bugum tita'ari tis o girima.