Jehosafat n di Juda na'am la yɛla
17
1 Jehosafat onɛ an Na'ab Asa biig la da lɛdigi di na'am la ka kpɛ'ɛŋ o mɛŋ ye Israel da nyaŋ o. 2 O da gu'ul zabzabidib tempʋbanɛ kpi'em Juda teŋin la wʋsa, ka nɔk soogia banɛ gu'ud la gu'ul Juda tempʋʋsin nɛ tempʋbanɛ da bɛ Efiram dɔɔg sʋ'ʋlimin ka o saam Na'ab Asa da zabi di'e la.3 Zugsɔb la da bɛ nɛ Na'ab Jehosafat bɔzugɔ o na'am la pin'ilʋgʋn la o da dɔl nɛ suobanɛ ka o yaab David da dɔl la. O da pʋ kennɛ bu'osid Baal ye o baŋ o yɛla gbinnɛ, 4 amaa ka da dɔl nɛ o saam Wina'am la, ka dɔl o nɔzi'ela la ka zan'as Israel dimi tʋm si'el la. 5 Zugsɔb la da kɛ ka o sʋ'ʋlim la zi'en kiŋ-kiŋ ka Juda nidib wʋsa mɔr piini na tis o, ka li kɛ ka o lieb arezak sɔb ka mɔr girima bɛdegʋ. 6 O da nɔk o sʋnf wʋsa pɛsigi dɔl Zugsɔb la suoya. Linɛ pɛ'ɛs, o da san'am maana zin'is la ka vɔn' Asera daad linɛ bɛ Juda teŋin la.
7 O na'am la yʋma atan' saŋa o da tʋm nɛ o kpɛɛmnam banɛ an Ben-Hayil nɛ Obadia nɛ Zakaria nɛ Netanɛl nɛ Mikaya ye ba keŋ pa'al nidib Juda tempʋʋsin la. 8 Levi nidib sieba da paas ya, ka ban da anɛ Semaya nɛ Netanaya nɛ Zebadaya nɛ Asahel nɛ Siemiramof nɛ Jehonatan nɛ Adonija nɛ Tobaya nɛ Tob-Adonija, nɛ maanmaannib ayi', ka ba da anɛ Elisama nɛ Jehoram. 9 Ba da nɔknɛ Zugsɔb Wada Gbauŋ la gilig Juda tempʋʋs la wʋsa pa'an nidib la.
10 Zugsɔb la dabiem da kpɛn' sʋ'ʋlim linɛ gilig Juda la wʋsa nidib, ka sɔ'ɔsɔ pʋ duoe zab nɛ Jehosafat. 11 Filistia nidib sieba da mɔr anzurifa nɛ piinsieba na tis Na'ab Jehosafat ye ba na'as o, ka Arab buudi la mɛ mɔr kɔnbid na, ka li da anɛ pɛraad tusa ayɔpɔi nɛ kɔbisyɔpɔi (7,700) nɛ bʋʋs tusa ayɔpɔi nɛ kɔbisyɔpɔi (7,700).
12 Jehosafat da maligim paam paŋ hali, ka mɛ' zin'ikpi'ema nɛ la'ad dɔɔd Juda teŋin, 13 ka mɛ digil la'ad bɛdegʋ Juda sʋ'ʋlim tɛɛnsin la. O mɛ da kɛ ka banɛ mi' zaba hali bɛ Jerusalem teŋin. 14 Yir wʋsa pʋʋgin ban da zi'eli ba si'em nwa: Juda dɔɔgin la zaba tuongatib banɛ gat nidib tusir tuon da anɛ Adina onɛ da an tuongat la ka soogianam tusa kɔbistan' (300,000) da dɔl o; 15 onɛ tia'al ayi' da anɛ Jehohanan, onɛ an tuongat la ka soogianam tusa kɔbisyi' nɛ pisnii (280,000) da dɔl o; 16 onɛ paas da anɛ Amasaya onɛ an Zikir biig ka da pɛsig o mɛŋ ye o tʋm Zugsɔb la tʋʋma la, ka o soogianam da an tusa kɔbisyi' (200,000); 17 Benjamin tuŋʋn la: Eliada onɛ an soogia kpi'euŋ ka soogianam tusa kɔbisyi' (200,000) da dɔl o ka mɔr tiraad nɛ gbanti'edis; 18 onɛ paas da anɛ Jehozabad, on soogianam da anɛ tusa kɔbiga nɛ pisnii (180,000) banɛ ti'ebi gur zaba.
19 Dap bama da tʋmnɛ tisid Na'ab la, hali ka banɛ wʋsa ka o niŋi ba Juda teŋ kpi'ema ni la wʋsa la pʋ paasɛ.