Wina'am nɔdi'es Mikaya n zɛrig na'ab Ahab si'em
18
1 Na'ab Jehosafat da paam kpan'am bɛdegʋ ka o yʋ'ʋr dʋ, o da di Na'ab Ahab pu'ayua tis o mɛŋ biig. 2 Yʋma atan' nya'aŋ, o da keŋ Samaria tempʋʋgin ye o pʋ'ʋs Na'ab Ahab. Ahab da kʋ pɛ'ɛs nɛ niigi bɛdegʋ tis on nɛ o nya'aŋ dim la, ka yʋ'ʋn yɛl o ye li nar ye ba zab nɛ Ramot Gilead tempʋʋg la. 3 Ka o bu'os Na'ab Jehosafat ye, “Fʋ na dɔllim ka ti keŋ zab nɛ Ramot dinɛ bɛ Gilead laa?” Ka o lɛbis Israel Na'ab ye, “Mam nɛ fʋ anɛ yinne, m nidib anɛ fʋ nidib; ti na dɔlli fʋ keŋ tanpin la.” 4 Amaa Na'ab Jehosafat da lɛn yɛl Israel Na'ab ye, “Ieem Zugsɔb la sa'alʋg yiiga.”Ahab nɔdi'esidib la da ma' o si'em ye o na zabi nyaŋ
5 Israel Na'ab la da la'as nɔdi'esidib nwɛnɛ kɔbisnaasi bu'osi ba ye, “M kem zab nɛ Ramot dinɛ bɛ Gilead la bɛɛ m kɛla?” Ka ba lɛbis o ye, “Naa! Kem! Zugsɔb la na nɔki li niŋi fʋ nu'usin!” 6 Amaa Na'ab Jehosafat da bu'os ye, “Ka Zugsɔb la nɔdi'es lɛn ka' kpɛla ka ti na bu'osɛɛ?” 7 Israel Na'ab da lɛbis ye, “Nɔdi'es yinne bɛ ka ti na nyaŋi kɛ ka o bu'os Zugsɔb la, amaa mam yaa o nɛ hali bɔzugɔ, o nan zi di'e pian'asʋŋ Zugsɔb la san'an tisi ma, asɛɛ bʋmbɛ'ɛd ma'aa. O yʋ'ʋri buon Mikaya, o anɛ Imla biig.” Ka Jehosafat lɛbis ye, “Na'aba, li pʋ sʋm ka fʋ yɛl alaa!” 8 Israel Na'ab la da yɛl o na'ayikpɛm la yinne ye, “Kem tɔ'ɔtɔ buol Mikaya onɛ an Imla biig la, na!”
9 Israel Na'ab nɛ Jehosafat onɛ an Juda Na'ab la da yɛnɛ ba na'am fuudi zin' ba na'am gbana zut zieŋ dinɛ bɛ Samaria yaŋir la kpikpɛŋ, ka nɔdi'esidib la bɛɛ ba tuonnɛ pian'adi ba nɔdi'esʋg pian'ad. 10 Zedekaya onɛ an Kenaana biig la da maal kʋnt iila ka kʋʋs ye, “Zugsɔb la yɛl si'eli nwa, ‘Fʋ na nɔk nɛ'ɛŋa zab Aram dim la, hali nɛ fʋn na ti san'ami ba wʋsa!’ ” 11 Nɔdi'esidib banɛ kpɛlim la wʋsa mɛ da yɛl ala ye, “Naa! Zam nɛ Ramot dinɛ bɛ Gilead la ka fʋ na nyaŋ! Zugsɔb la na nɔki li niŋ fʋ nu'usin.”
Mikaya kena pian' ye ba na zabi gʋ'ʋŋ
12 Onɛ ka ba tʋm ye o keŋ buol Mikaya na la da yɛl o ye, “Gɔsima, nɔdi'es bama la la'am pian'adnɛ wʋʋ ba maal nɛ nɔɔr yinne nɛ, ye Na'ab la na nyaŋ. Siakim tisi ba ka pian' dinɛ na malis Na'ab la!” 13 Amaa Mikaya yɛl ye, “Nɛ Zugsɔb onɛ vʋe la yʋ'ʋr zug, mam ye m yɛl nɛ Zugsɔb la yɛlim si'el ma'aa.” 14 On paae na la ka Na'ab la bu'os o ye, “Mikaya, ti kem zab nɛ Ramot teŋ dinɛ bɛ Gilead sʋ'ʋlimin la bɛɛ ti kɛla?” Ka o lɛbis ye, “Naa! Zam ka fʋ na nyaŋ! Zugsɔb na nɔki li niŋ fʋ nu'usin!” 15 Ka na'ab la bu'os o ye, “Nɔɔr ala ka m na yɛlif nɛ nimmua ye fʋ pian' dinɛ an sida ma'aa nɛ Zugsɔb la yʋ'ʋrɛ?” 16 Mikaya da lɛbis o ye, “Man nyɛ ka Israel dim wʋsa zɔɔ widig kʋkʋna ni nwɛnɛ pɛ'ɛs banɛ ka' kɔnbkem nɛ. Ka Zugsɔb la yɛl ye, ‘Nimbama pʋ mɔr zugdaana, kɛl ka sɔ' wʋsa lɛbi kuli o yin nɛ sumbʋgʋsʋm!’ ” 17 Israel Na'ab la da yɛl Na'ab Jehosafat ye, “M pʋn pʋ yɛlif ye o kʋ di'e pian'asʋŋʋ tisi ma, amaa bɛ'ɛd ma'aanɛɛ?” 18 Mikaya da lɛn yɛli ba ye, “Dinzugɔ kɛlisimi Zugsɔb la labaar: m nyɛ ka Zugsɔb la zin' o na'am gbauŋ zug ka banɛ bɛ arezana ni la wʋsa la'asi gilig o datiuŋ nɛ o dagɔbʋg. 19 Ka Zugsɔb la yɛl ye, ‘Anɔ'ɔnɛ na pan'as Ahab ka o keŋ zab nɛ Ramot dinɛ bɛ Gilead la ka ba kʋʋ o ani?’ Ka oŋa yɛl ye anwa ka oŋa ye anwa. 20 Li naarin la ka siig yina zi'en Zugsɔb la tuon ka yɛl ye, ‘Man na pan'as o.’ Ka Zugsɔb la bu'os ye, ‘Suobɔ ka fʋ na dɔlisɛ?’ 21 Ka o ye, ‘M na keŋ nɛ dama'am siig o nɔdi'esidib la nɔya ni.’ Ka Zugsɔb la yɛl o ye, ‘Kem ka fʋ na nyaŋ, kem tʋmmi li!’ ” 22 “Alazug Zugsɔb la nɔk dama'am siigi niŋi fʋ nɔdi'esidib la wʋsa nɔɔrin. Zugsɔb la gban'e fʋ yɛla nɛ bɛ'ɛd.”
23 Ani ka Zedekaya onɛ an Kenaana biig la keŋ nwɛ' Mikaya tampiank ka ye, “Zugsɔb Siig la dɔl suokanɛ yi mam san'anɛ kena pian' tisi fɔ?” 24 Mikaya da lɛbis ye, “Fʋ ya'a ti zɔɔ kpɛn' dɔkanɛ bɛ pʋʋgin la daasi'eri su'a, daakan ka fʋ na baŋ!” 25 Israel Na'ab la da tis nɔɔr ye, “Gban'ami Mikaya mɔr o lɛb Ammon onɛ an tempʋʋg zugdaan nɛ Joab onɛ an na'abiig la san'an, 26 ka yɛl ye, ‘Na'ab la yɛl ye ya yɔɔmi ninkaŋa sanrega ni ka da tis o si'el si'ela asɛɛ bodobodo nɛ ku'om ma'aa hali nɛ man na ti lɛb laafi na.’ ” 27 Ka Mikaya lɛbisi yɛl o nyain ye, “Fʋ ya'a sid nyaŋi lɛb laafi na, alaa Zugsɔb la pʋ pian' dɔlisi yi man san'anɛ!” Ka lɛm paas ye, “Kpansimi m pian'ad la, yanam banɛ bɛ kpɛla la!”
Ahab kum yɛla
28 Israel Na'ab nɛ Jehosafat onɛ an Juda Na'ab la da duoe keŋ Ramot Gilead teŋin. 29 Israel Na'ab da yɛl Na'ab Jehosafat ye, “Man na tiaki m mɛŋi kpɛn' zaba la pʋʋgin, amaa fʋn yɛɛmi fʋ na'am fuud.” Ka o sid da tiaki o mɛŋi kpɛn' zaba la ni. 30 Aram Na'ab da pʋn tis o zaba tɛrekonam tuongatib nɔɔr ye, “Da zab nɛ sɔ'ɔsɔ, li ya'a anɛ kpi'em bɛɛ tadim, asɛɛ Israel Na'ab la ma'aa!” 31 Tɛrekonam zabzabidib tuongatib la nyɛ Na'ab Jehosafat la, ba da tɛn'ɛs ye, “Nɛ' lɛn kae bi'esʋg, Israel Na'ab la nwa!” Ka ba fɛndig ye ba zab nɛ o, ka Jehosafat nwɛ' kuŋ, ka Zugsɔb la sʋŋ o ka kɛ ka ba bas o. 32 Ka tɛrekonam la tuongatib la gɔs ka li ka' Israel Na'ab laa, ka ba bas ka pʋ lɛn kad o. 33 Amaa ka Aram nid tɛki o tiraugʋ tɔn yɔɔgʋ ka li keŋ gban'e Israel Na'ab la, ka piim la wiee o zaba la'ad la kpɛn' kʋns o. Na'ab la da yɛl onɛ dɔribid o zaba tɛreko la ye, “Fɛndigim tɛreko la ka ti yi zaba la yiŋ, ka m pu'alim nɛ.” 34 Zaba la da mu'oe daakan ka Na'ab la zi'enɛ kpa' Aram dim la, ka zaam ti ma'ae la ka o kpi.