Na'ab Baasa kum yɛla
16
1 Zugsɔb la pian'ad da kɛn Jehu onɛ an Hanani biig la san'an na tis Na'ab Baasa 2 ye, “M ʋki fʋ agɔla yis titanin na, ka gaŋi fʋ niŋi m nidib Israel dim tuongat, amaa fʋ dɔl Jeroboam suoya ka kɛ ka m nidib Israel dim la tʋm tʋʋmbɛ'ɛdi kɛ ka m sʋnf pɛlig nɛ ba. 3 Dinzug m na kanbis fʋn Baasa, nɛ fʋ yir la wʋsa. M na kɛ ka fʋ yir nwɛnɛ Nebat biig Jeroboam yir nɛ. 4 Baas na ɔnbi fʋ nimbanɛ kpi tempʋʋgin la, ka niis banɛ ian'ad agɔla la mɛ na di banɛ kpi tempʋʋg la yiŋ!”5 Ya'a kpɛlim nɛ yɛla banɛ da maal Na'ab Baasa na'am diib saŋa la, on da tʋm si'el nɛ on da nyaŋi maal si'el la, ba da sɔbi li kpɛn'ɛs Israel Na'anam Gbauŋʋn la. 6 Baasa da maal ka'alim ka ba mum o Tiza teŋin, ka o biig Ela di'e o zin'igi di na'am la.
7 Dinɛ lɛm paas la, Wina'am labaar da kɛn Wina'am nɔdi'es Jehu onɛ an Hanani biig la san'an na ka li anɛ tʋʋmbɛ'ɛd banɛ ka Baasa da tʋm la zug. O da kɛ ka Zugsɔb la sʋnf duoe ka li ka' nɛ on da tʋm tʋʋmbɛ'ɛd ban ka Jeroboam tʋm la buudi ma'aanɛ amaa on da kʋ Jeroboam yidim wʋsa la zug.
Ela nɛ Zimiri Na'am diib
8 Juda Na'ab Asa n da di na'am la li yʋma pisi nɛ ayuobʋ saŋa la, Baasa biig Ela da di Israel na'am zin'in Tiza teŋin yʋma ayi'.
9 Zimiri onɛ aan o na'ayikpɛɛm ka gɔsid Na'ab la zaba tɛrekonam pʋsʋk la da duoe gban'e pʋtɛn'ɛbɛ'ɛd Na'ab la yɛla. Saŋkan la Na'ab Ela da bɛ nɛ Ariza onɛ gɔsid na'ayir Tiza teŋin la yinne nu daam kʋʋl. 10 Zimiri da kpɛn' na nwɛ' Na'ab la bas ka kʋʋ o, Juda Na'ab Asa da di na'am la li yʋma pisi nɛ ayɔpɔi saŋa la. Ani ka o da di'e na'am la di.
11 On da di na'am ka zin'in o na'am gbauŋ zugʋ naae la, o da kʋ Na'ab Baasa yidim wʋsa. O da pʋ bas dau baa yinne, hali la'am nɛ o du'adib nɛ o zuanam wʋsa. 12 Alazug, Zimiri da san'am Baasa yidim wʋsa wʋʋ Zugsɔb la da zan'as on nɛ o yidim ka pian' tis o nɔdi'es Jehu si'em la. 13 Di anɛ Baasa nɛ o biribiŋ Ela da tʋm tʋʋmbɛ'ɛd ka mɛ kɛ ka Israel dim wʋsa tʋm bɛ'ɛd ka Zugsɔb la sʋnf duoe. Ba da kɛ ka Israel Wina'am la sʋnf pɛlig nɛ ba, ban da maan teŋgbana banɛ ka' gbin la.
14 Ya'a kpɛlim linɛ da maal Na'ab Ela na'am diib saŋa la nɛ on tʋm si'el la, ba da sɔbi ba kpɛn'ɛs Israel Na'anam Gbauŋʋn la.
15 Asa onɛ an Juda Na'ab la da dii o na'am la yʋma pisi nɛ ayɔpɔi saŋa la, Zimiri da di Tiza na'am daba ayɔpɔi. Saŋkan la, soogianam la da la'as nɛ Gibɛton dinɛ an Filistia dim teŋ la baba zabid. 16 Israel dimi da wʋm ba la'asʋg zin'igin la ye, Zimiri duoe zi'en na'ab la yɛla ka ba'asi kʋʋ o la, ba da nɔk Omir, onɛ an Israel soogianam tuongat la, diis o na'am daakan nɔɔ, ba la'asʋg la zin'igin. 17 Omir nɛ Israel dim la wʋsa da yi Gibɛton keŋ gilig Tiza teŋ la. 18 Zimiri da nyɛ ka ba nyaŋ tempʋʋg la, o zɔɔ keŋ kpɛn' na'ayir zɔŋŋin ka nyu'oe li nɛ bugum kpii anina. 19 Li anɛ on tʋm tʋʋmbɛ'ɛd, ka maan dinɛ ka' sʋm Zugsɔb la tuon, ka dɔl Na'ab Jeroboam suoya, nɛ tʋʋmbɛ'ɛd kanɛ ka o tʋm ka kɛ ka Israel dim mɛ tʋm la zug ka o niŋ ala.
20 Ya'a kpɛlim nɛ yɛla banɛ da maal Zimiri na'am diib saŋa nɛ on da zan'as Zugsɔb nɔɔr la, ba da sɔbi li kpɛn'ɛs Israel Na'anam Gbauŋʋn la.
Israel Na'ab Omir nɛ Tibin dataadʋg yɛla
21 Israel nidib la da pʋdig nɛ zin'isa ayi'. Nidib la pʋsʋk da dɔl Ginaf biig Tibin bɔɔd ye o di na'am, ka pʋsʋk kanɛ kpɛlim la sʋŋid Omir. 22 Omir nya'andɔlib la paŋ da nyaŋ Ginaf biig Tibin. Alazug, ba da kʋ Tibin ka Omir di na'am la.
Omir di Israel na'am
23 Juda Na'ab Asa n da di na'am la li yʋma pistan' nɛ yinne saŋa la, Omir da di Israel na'am. O da di na'am la nɛ yʋma pii nɛ ayi', ka zin'in Tiza tempʋʋgin yʋma ayuobʋ. 24 O da da' Samaria kʋkʋn la Semer san'an nɛ anzurifa ligidi kɔbiga nɛ pisnu, ka mɛ' tempʋʋg kʋkʋn la zug ka pʋdi li yʋ'ʋr ye Samaria, nwɛnɛ Semer onɛ da sʋ'oe kʋkʋn la. 25 Amaa Na'ab Omir da tʋm bɛ'ɛd Zugsɔb la tuonnɛ gaad banɛ dɛŋ o tuon la wʋsa. 26 O da dɔl Jeroboam onɛ an Nebat biig la suoya nɛ o tʋʋmbɛ'ɛd dinɛ ka o da kɛ ka Israel dim wʋsa tʋm, ka kɛ ka Zugsɔb onɛ an Israel Wina'am la sʋnf pɛlig nɛ ba bada banɛ ka' suor la.
27 Ya'a kpɛlim nɛ yɛla banɛ da maal Na'ab Omir na'am diib saŋa la, ba da sɔbi kpɛn'ɛs Israel Na'anam Gbauŋʋn la.
28 Na'ab Omir da maal ka'alim ka ba mum o Samaria teŋin, ka o biig Ahab di'e o zin'igi di na'am.
Ahab di na'am
29 Juda Na'ab Asa n da di na'am la li yʋma pistan' nɛ anii saŋa la, Omir biig Ahab da di Israel na'am. O da zin'in nɛ Samaria teŋin yʋma pisi nɛ ayi'. 30 Omir biig Na'ab Ahab da tʋm tʋʋmbɛ'ɛd Zugsɔb la tuon hali gaad banɛ da dɛŋ o tuon la. 31 Li ka' on da dɔl Jeroboam onɛ an Nebat biig la suoya la ma'aanɛ, amaa o da di Jezebɛl onɛ an Sidon na'ab Efiba'al pu'ayua ka tʋmmi tisid Baal onɛ an teŋgban ka wɔ'ɔgid o la. 32 O da mɛ' dɔɔgʋ tis Baal, Samaria tempʋʋgin, ka mɛ' maan bimbimi li pʋʋgin. 33 Na'ab Ahab da lɛn sɛ teŋgban Asera dazi'edir la, ka tʋm linɛ duoe Zugsɔb la sʋnf hali. O da kɛ ka Israel Wina'am la sʋnf pɛligi gaad na'anam banɛ dɛŋ o tuon la wʋsa.
34 Na'ab Ahab saŋa la, Hiel onɛ yi Betel teŋin na la da lɛbisi mɛ' Jeriko teŋ la. On da ɛɛnb ɛɛnbir la ka o biribiŋ kpɛɛm Abiram kpi, ka on ti mɛɛ naad la ka o bikpaanr Segub kpi. Li da maal nɛ wʋʋ Zugsɔb pian'ad la da yɛl si'em tis Josua onɛ an Nun biig la.