Elaja nɛ sawak la yɛla
17
1 Elaja onɛ an Tisibi nid ka yi Tisibi teŋ kanɛ bɛ Gilead sʋ'ʋlimin la da yɛl Ahab ye, Zugsɔb onɛ an Israel Wina'am ka m pʋ'ʋsid o la sadigim vʋe la, mɛligim kʋ lii, ka yɛti saa, yʋma bi'ela banɛ kena la, ya'a ka' li ti yi man nɔɔrin naa.Wina'am diis Elaja diib
2 Zugsɔb labaar da kɛn Elaja san'an na yɛl o ye, 3 “Yim kpɛla lɛb ya-nya'aŋ, keŋ su'a Kerif bɔn'ɔfaligin linɛ bɛ Joodan nya'aŋ la. 4 Fʋ na nuud ku'om ku'osuorin la, m na kɛ ka agaand mɔr diibi kenna tisidif anina.”
5 Elaja da niŋ Zugsɔb la yɛl o si'em la ka keŋ Kerif bɔn'ɔfaligin la, Joodan nya'aŋi bɛɛ anina. 6 Agaand la da mɔr bodobodo nɛ ni'imi ken bɛogʋn-bɛogʋn nɛ zaam-zaam tisid o ka o dit, ka nuud ku'om ku'osuorin la.
Wina'am diis Elaja Zarefat teŋin
7 Ka li ti kena ka ku'osuor la kpiɛn kʋdig bɔzugɔ, saa da pʋ niid teŋin laa. 8 Ka Wina'am labaar kɛn Elaja san'an na yɛl o ye 9 “Duom tɔ'ɔtɔ keŋ Zarefat teŋin dinɛ bɛ Sidon sʋ'ʋlimin la zin'in ani. M yɛl pu'a sɔ' anina ye o tisif diib.” 10 O da duoe keŋ Zarefat, on da paae tempʋʋg la za'anɔɔrin la, pʋkɔɔnr sɔ' da bɛɛ ani kɔɔd daad. Ka o buol pu'a la yɛl o ye, “Kpɛn'ɛm gbin'e ku'om bi'ela tisim ka m nu” 11 On da duoe wa'ae ye o mɔr ku'om la na la, ka o lɛm buol o ye, “M bɛlimnɛ, ka mɔr bodobodo bi'ela na tisim!”
12 Ka o lɛbis ye, “Nɛ Zugsɔb Wina'am kanɛ vʋe la yʋ'ʋr zugɔ, mam pʋ mɔr bodobodo! M mɔri zɔm nu'ukukudugin nɛ kpaam bi'ela ka li bɛ laa gbinnin sa; din ka m la'asid daad ye m keŋ maal diib bi'ela ka man nɛ m biribiŋ la dii ti dikɛuu ka kpi.”
13 Ka Elaja yɛl o ye, “Da zɔt dabiem! Kem maal wʋʋ fʋn yɛl si'em la, amaa dɛŋim maal bodobodo fiinf na tisim, ka maal linɛ kpɛlim la ka fʋn nɛ fʋ biig la di. 14 Zugsɔb onɛ an Israel Wina'am la yɛl ye, fʋ zɔm la kʋ naae ka kpaam la mɛ kʋ naae, hali nɛ Wina'am na ti tis saa teŋgbauŋ la zug na.”
15 Pu'a la da kpɛn' maal wʋʋ Elaja yɛl o si'em la. Diib da bɛ ka Elaja nɛ pu'a la nɛ o yidim wʋsa dit daar wʋsa. 16 Zɔm la da pʋ naae ka kpaam la mɛ pʋ pɔ'ɔgɛ, nwɛnɛ Zugsɔb la da pian' tis Elaja si'em la.
Elaja vʋ'ʋg pʋkɔɔnr la biribiŋ
17 Li da paae saŋsi'a ka pu'a kanɛ sʋ'oe yir la biribiŋ la bɛn'ɛd. Ban'a la da wʋm o hali ka o ti ba'asi kpi. 18 Pu'a la da yɛl Elaja ye, “Mam nɛ fʋ bɔ ni, Wina'am nida? Fʋ kenɛ na ye fʋ tiɛn manɛ m tʋʋmbɛ'ɛd yɛla ka kʋʋ m biigaa?”
19 Ka Elaja yɛl o ye, “Mɔri fʋ biig la na!” Ka di'e o pu'a la nu'usin mɔr o dʋ dɔkanɛ ka o gbɛɛnd, ka ba mɛɛ li sʋn'ʋl zugin la, digil biig la o gadʋg zug. 20 Ka kaasi tis Zugsɔb la yɛl ye, “M Zugsɔb Wina'am, fʋ mɔri zutɔɔgʋ kɛn pu'a kanɛ ka man nɛ on bɛ la zugin na ka kɛ ka o biig la kpii?” 21 Ka tiɛn o mɛŋi pa'al biig la zug nɔɔr atan' ka kaasi tis Zugsɔb la ye, “M Zugsɔb Wina'am, kɛl ka biig la nyɔvʋr lɛb o san'an na!”
22 Zugsɔb la da wʋm Elaja kaasig ka kɛ ka biig la vʋ'ʋsʋm lɛb na ka o vʋ'ʋg. 23 Ka Elaja mɔr biig la sig teŋin na kpɛn' zakin tis o ma ka ye, “Gɔsima, fʋ biig la vʋ'ʋg ya!” 24 Ani ka pu'a la yɛl Elaja ye, “Nannanna m sid baŋ ye fʋ anɛ Wina'am nid, ka Zugsɔb pian'ad linɛ yiti fʋ nɔɔrin na la an sida.”