Elaja nɛ Baal teŋgban maannib
18
1 Li da yuugi paae yʋma atan' ka Zugsɔb la labaar kɛn Elaja san'an na ye, “Kem zaŋi fʋ mɛŋi pa'al Na'ab Ahab ka m na kɛ ka saa ni teŋin la.” 2 Alazug Elaja da duoe wa'ae Ahab san'an ye o pa'al o mɛŋ.Saŋkan la kɔ'ɔm da wʋm Samaria teŋ dim hali, 3 Na'ab Ahab da buol Obadia onɛ gɔsid na'ayir la o san'an na. (Obadia da anɛ onɛ niŋ Zugsɔb la yadda sʋ'ʋŋa, hali ka pɛsigi o mɛŋi tis o. 4 Saŋkan la ka Jezebɛl da kʋʋd Zugsɔb nɔdi'esidib la, Obadia da nɔk nɔdi'esidib kɔbiga su'a tampinlɛma ni zin'is ayi', zin'ig yinne wʋsa da anɛ nidib pisnu. Ka mɔr diib nɛ ku'om kennɛ tisidi ba.) 5 Ahab da yɛl Obadia ye, “Giligim gɔs zin'ibanɛ ka ku'om miid saŋa wʋsa, nɛ bɔn'ɔdin, ka daasi'erɛɛ ti na paam mɔma'asa tisi ti widi la ka ba ɔnb ka vʋe ka ti bʋnkɔnbid la wʋsa da kpii.” 6 Dinzug ba da pʋdig teŋ la ban na iee paae si'em bɛn. Ahab da lɛb zin'ig yinne ka Obadia mɛ lɛb zin'ig yinne. 7 Obadia da keŋ sia'al Elaja. O da baŋ o ka su'un teŋinɛ na'as o ka yɛl ye, “Li sid anɛ fʋnɛɛ, m zugdaan Elaja?”
8 Ka o lɛbis ye, “Ɛɛn! Kem yɛli fʋ zugdaan la ye, ‘Elaja bɛ kpɛla.’ ”
9 Obadia da bu'os o ye, “M zugdaana, m taal an bɔ ka fʋ bɔɔd ye fʋ zaŋimi niŋ Na'ab Ahab nu'ugin ka o kʋʋ ma? 10 Hali nɛ Zugsɔb onɛ aan fʋ Wina'am la yʋ'ʋr zugɔ, teŋ bɛɛ na'am sʋ'ʋlim kae ka m zugdaan pʋ tʋm sɔ' ye o iee fɔ. Ka ba ya'a lɛb na ka ye ba pʋ nyɛɛ fɔ, o na kɛ ka ba pɔ ye ba sid pʋ nyɛɛ fɔ. 11 Amaa nannanna fʋ yɛlim ye m kem yɛli m zugdaan la ye, ‘Elaja bɛ kpɛla.’ 12 Lin an si'em la, m ya'a basif kpɛla ka keŋ daasi'erɛ Zugsɔb la Siig na zii fʋ keŋ zin'isi'a. M ya'a keŋ yɛl Na'ab Ahab, ka o kena iee fʋ pʋ nyɛɛ, o na kʋʋm. Tɛnr ye m biilimin sa ka m pʋ'ʋsid Zugsɔb la. 13 M zugdaana, fʋ pʋ wʋm man tʋm si'em Jezebɛl n daa kʋʋd nɔdi'esidib laa? M daa su'a Zugsɔb nɔdi'esidib la kɔbiga tampinlɛma ni pisnu nu zin'is ayi' ka tisidi ba diib nɛ ku'om. 14 Ka nannanna ka fʋ yɛtim ye m kem Na'ab san'anɛ yɛl o ye, ‘Elaja bɛ kpɛla la.’ O na kʋʋm!” 15 Ka Elaja lɛbis o ye, “Zugsɔb Paŋtita'ar Sɔb onɛ ka m pʋ'ʋsid la sadigim vʋe la, m na zaŋi m mɛŋi pa'al Ahab zina.”
Elaja nɛ Na'ab Ahab
16 Obadia da keŋ Na'ab Ahab san'anɛ yɛl o. Ka Ahab keŋ Elaja san'an. 17 On da nyɛ Elaja la ka yɛl o ye, “Fʋn kanɛ ieed yɛla Israel teŋin la nwaa?”
18 Elaja da lɛbis o ye, “Mam pʋ ieed yɛla Israel teŋinɛ, amaa li anɛ fʋn nɛ fʋ saam yidim. Fʋ bas Zugsɔb zi'ela la ka dɔl Baal teŋgbana la. 19 Nannanna, la'asim Israel nidib wʋsa ka ya sia'alim Kaamel zuorin la. Dɔl Baal nɔdi'esidib kɔbisnaasi nɛ pisnu la na, nɛ Asera nɔdi'esidib kɔbisnaasi banɛ la'am dit nɛ Jezebɛl la.”
Kaamel zuor zug Makir
20 Na'ab Ahab sid da tʋm buol Israel dim wʋsa nɛ nɔdi'esidib la Kaamel zuorin. 21 Elaja da gaad nidib la tuonnɛ yɛli ba ye, “Ya bɔɔd ye li yuugi paae wala ka ya fɛndigi ya pʋtɛnda ayi', yi' la ni? Ya ya'a baŋ ye Zugsɔb la an Wina'am yanam dɔl o, amaa li ya'a lɛn anɛ Baal yanam dɔl o.”
Amaa ka nidib la pʋ yɛl si'ela. 22 Elaja da lɛn yɛli ba ye, “Mam ma'aa an Zugsɔb la nɔdi'esi kpɛlim, amaa Baal mɔr nɔdi'esidib kɔbisnaasi nɛ pisnu. 23 Bɔɔm na'araad ayi' tisi ti. Ka kɛ ka ba mɛŋ gaŋ ban bɔɔd sɔ' kɔdigi bɛs o pa'al daad zug, amaa ba da nyu'oe bugum. Mam mɛ na maal onɛ kpɛlim la pa'al daad zug ka kʋ nyu'oe bugum mɛnɛ. 24 Ya na buoli ya teŋgban la yʋ'ʋr, ka mam mɛ buol Zugsɔb la yʋ'ʋr. Win kanɛ ka ba na buol ka o siak nɛ bugum la anɛ Wina'am asida.” Ka nidib la wʋsa yɛl ye, “Fʋn yɛl si'el la an sʋm!”
25 Elaja da yɛl Baal nɔdi'esidib la ye, “Gaŋimi na'araad la yinne maal yiiga, yanamɛ sadigim zu'oe la. Buolimi ya teŋgban la yʋ'ʋr, amaa da nyu'oe bugum!” 26 Ka ba nɔk na'araug kanɛ ka ba di'e la maal.
Ka ba buol Baal yʋ'ʋr bɛogʋn tat-tat-tat hali ti paae nintaŋ tisʋʋs, ye, “Baal, siakimi ti buolʋg!” Ka ba tansid agɔla gɔla amaa sɔ' pʋ siakɛ, ka li fɔn baanlimm. Ka ba wa'a gilig bimbim kanɛ ka ba maal la.
27 Ka li ti paae nintaŋ tisʋʋs ka Elaja pin'ili la'adi ba ye, “Tansimi bɛdegʋ, ye bi'esʋg kae o anɛ win! Daasi'erɛɛ o nan ka'anɛ ya'a bɛɛ o nan tɛn'ɛsid nɛ, ya'a ka' ala o keŋi ye o dʋ'ʋn bɛɛ o nwienɛ, ya'a ka' ala o gbisid nɛ, asɛɛ ka ya nie o!” 28 Ka ba tansidi agɔla gɔla, ka mɔr sʋ'ʋs nɛ kpana nwaadi ba mɛŋ wʋʋ ba malima da an si'em la ka ziim ti kena yit. 29 Winnig da buli kena gbɛlig ka ba kpɛn ken tuonnɛ tansidi pian'ad hali ti paae zaam maan saŋa. Amaa sɔ' pʋ siakɛ, ka li fɔn baanlimm, ka sɔ' mɛ pʋ kɛlisɛ.
30 Ani ka Elaja yɛl nidib la wʋsa ye, “Kemi mam san'an na,” ka nidib la kɛɛn o san'an na. Ka o maal Zugsɔb la maan daka linɛ da san'am la. 31 Elaja da nɔk kuga pii nɛ ayi' ka kugir yinne wʋsa zi'enɛ pa'al Jakob biis pii nɛ ayi', onɛ ni ka Zugsɔb la labaar da yina yɛt ye, “Fʋ yʋ'ʋr na buon Israel la.” 32 O da nɔk kuga la mɛ' bimbim nɛ Zugsɔb la yʋ'ʋr zug. Ka tu bʋmbɔki giligi li ka li yalim ka ku'om galamnama anaasi na nyaŋi niŋ anina. 33 Ka o maal daad la pa'al, ka kɔdig na'araug la bɛsi pa'al daad la zug. Ani ka o yʋ'ʋn yɛli ba ye, “Pɛ'ɛlimi yʋya anaasi nɛ ku'om ka kpa'ae niŋ maan la nɛ daad la zug!”
34 Ban niŋi naae la ka o ye ba lɛn niŋi ala ya'as, ka ba niŋi li ya'as. Ka o lɛn ye ba niŋim pɛ'ɛs nɔɔr atan', ka ba niŋi paas atan'. 35 Ka ku'om la pʋbigi sig bimbim la teŋiri pɛ'ɛl bʋmbɔk la.
36 Maan la saŋaa da paae la, ka Wina'am nɔdi'es Elaja li'el na ka sɔs Wina'am ye, “Zugsɔba, Abraham Wina'am, Isaak Wina'am, Israel Wina'am, kɛl ka sɔ' wʋsa baŋ zina ye fʋ sid anɛ Israel Wina'am ka mam mɛ aan fʋ tʋmtʋm, ka tʋm nɛ' wʋsa ka li anɛ fʋnɛ tisim nɔɔr. 37 Siakimi m sɔsʋg Zugsɔba, siakimi m sɔsʋg, ka din ka nimbama na baŋ ye fʋ anɛ Zugsɔb Wina'am, ka na fɛndigi ba sʋnya lɛbi fʋ san'an na ya'as!”
38 Ani ka Zugsɔb bugum la li na di maan la nɛ daad nɛ kuga la la'am nɛ teŋ la hali ka lɛlig ku'om linɛ bɛ bʋmbɔkin la.
39 Nidib la wʋsa nyɛ nwa la, ka lii avanba ka kaas ye, “Zugsɔb la anɛ Wina'am, Zugsɔb la anɛ Wina'am!”
40 Ka Elaja tansi ba ye, “Gban'ami Baal nɔdi'esidib la, da kɛ ka nid baa yinne zɔɔ!” Ka ba gban'e ba, ka Elaja mɔri ba sig Kison bɔn'ɔgin la kʋʋ ba wʋsa ani.
Elaja di'e Wina'am pian'ad ye saa na ni
41 Elaja da yɛl Na'ab Ahab ye, “Kulim yinne di ka nu, ka sakʋdʋg damya!” 42 Ahab da keŋ di ka nu, amaa Elaja da duoe keŋ dʋ Kaamel zuor zugʋ igin teŋin ka o nindaa bɛɛ o duma teŋsʋk.
43 O da yɛl o sankpan'as ye, “Kem gɔsi atɛuk la baba!”
O da keŋ gɔs ka yɛl ye, “Si'el kae!”
Nɔɔra ayɔpɔi ka Elaja yɛl o ye, “Lɛm gɔs!”
44 Ka dinɛ pɛ'ɛsi ayɔpɔi la sankpan'as la lɛb na yɛl ye, “Saŋgbanbili zem wʋʋ ninsaal nu'ug nɛ dʋt atɛukʋn la na.”
Elaja da yɛl o ye, “Kem yɛl Na'ab Ahab ye o kpɛn'ɛmi o tɛreko la ni kul tɔ'ɔtɔ ka saa la da paae o suorɛ!”