Elaja zɔya ka bas Jezebɛl
19
1 Na'ab Ahab da yɛl o pu'a Jezebɛl Elaja tʋm si'em, nɛ on kʋ nɔdi'esidib la si'em. 2 Jezebɛl da tʋm yɛl Elaja ye, “M pɔya mɛnɛ! Bɛog anwa win, m ya'a pʋ kʋʋf nwɛnɛ fʋn sa kʋ sieba si'em la, wina la on kʋʋmim.”Elaja zɔɔ keŋ Horeb zuorin
3 Dabiem da gban'e Elaja ka o zɔ ye o faaɛn o nyɔvʋr. On da paae Beerseba Juda sʋ'ʋlimin la, o da bas o sankpan'as anina. 4 On mɛŋ da keŋ dabismum kennɛ kpɛn' sian'arin. O da paae saad tiigin zin'in tiig la gbinnin ka sɔs Wina'am bɔɔd ye o kpi. O da yɛl ye, “Zugsɔba, li siak ala, di'emi m nyɔvʋr, ka mam pʋ gati m yaanama,” 5 ka diginɛ gbis. Zugsɔb maliak da kɛn vuguri na si'is o ka yɛl ye, “Duom di!” 6 Ka o gɔsi o zug baba nyɛ ka ba sɛn'ɛl bodobodo bugumin, ka ku'om nɛ gan'ar zi'e. Ka o di ka nu ka lɛbi diginɛ gbis.
7 Wina'am maliak da lɛb na ya'asi si'is o ka ye, “Duom di, ka fʋ suor nan wa'am!” 8 O da duoe di ka nu, ka diib la tis o paŋ ka o duoe keŋ dabpisnaasi, yʋ'ʋŋ nɛ nintaŋ wʋsa, ti paae Horeb linɛ an Wina'am zuorin la. 9 Anina ka o kpɛn' tampinlɛuŋʋn gbɛn yʋ'ʋŋ kan la.
Wina'am sa'al Elaja
Zugsɔb labaar da kɛɛn o san'an na bu'os o ye, “Elaja, fʋ tʋm bɔ kpɛla?”
10 Ka o lɛbis ye, “M sʋnf gban'anɛ, ye m tʋm Zugsɔb Wina'am Paŋtita'ar Sɔb la tʋʋma, amaa Israel dim zan'asi fʋ nɔnaar la, ka nwa'ae fʋ bimbima la bas, ka kʋʋ fʋ nɔdi'esidib la. Mam ma'aa kpɛlim ka ba mɛ mɔɔd ye ba kʋ mam!”
11 Ka Zugsɔb la yɛl o ye, “Yim keŋ zuorin la zi'en Zugsɔb la tuon ka Zugsɔb la bɔɔd ye o gaad.” Sisi'etita'ar da dam nwɛ' zuor la buak ka widig tampiins Zugsɔb la tuon; amaa Zugsɔb la da pʋ bɛ sisi'em la nii. Sisi'em la nya'aŋ ka teŋ dammid hali mi'im, amaa Zugsɔb la da ka' anina. 12 Teŋ la dammʋg nya'aŋ ka bugum yina, amaa Zugsɔb la da ka' bugum la nii. Ka bugum la nya'aŋ ka kʋkɔbaanlig nyaan pian'. 13 Elaja wʋmi li la, o tɛk o fuugʋ lusi o nindaa yina zi'en tampinlɛuŋ la nɔɔrin. Ka kʋkɔr la bu'os o ye, “Fʋ tʋm bɔ kpɛla, Elaja?”
14 Ka o lɛbis ye, “M sʋnf gban'anɛ, ye m tʋm Zugsɔb Wina'am Paŋtita'ar Sɔb la tʋʋma, amaa Israel dim zan'asi fʋ nɔnaar la nɛ, ka nwa'ae fʋ bimbima la bas, ka kʋʋ fʋ nɔdi'esidib la. Mam ma'aa kpɛlim ka ba mɛ mɔɔd ye ba kʋ mam.”
15 Zugsɔb la da yɛl o ye, “Lɛm dɔl fʋn dɔl suosi'a kena la, ka keŋ Damaskus sian'arin la. Fʋ ya'a paae anina, fʋn nɔkim malʋŋ kpaam bu'oe niŋ Hazael zugʋ diis o Aram na'am. 16 Ka mɛ bu'oe malʋŋ kpaam niŋ Nimsi biig Jehu zugʋ diis o Israel na'am, ka keŋ Elasia onɛ an Safat biig ka yi Abɛl Mehola teŋin la bu'oe malʋŋ kpaam niŋ o zug ka o zi'enɛ fʋ nɔba zugʋ an nɔdi'es. 17 Jehu na kʋ onɛ wʋsa zɔɔ yi Hazael san'an, ka Elasia mɛ na kʋ onɛ wʋsa zɔɔ yi Jehu san'an. 18 La'am nɛ wala wʋsa, nidib tusa ayɔpɔi nan kpɛm bɛ Israel teŋin, banɛ nam pʋ igin Baal tuonnɛ ka ba nɔɔr mɛ nam pʋ pian' na'as o!”
Elasia buolʋg
19 Elaja da yii anina keŋ nyɛ Safat biig Elasia, ka on nɛ o nidib mɔr na'akunya pii nɛ ayi' kuod, ka o mɛŋ gban'e niigi kuunr kanɛ paas pii nɛ ayi' la. Elaja da keŋ paae o san'an ka nɔk o fuugʋ lɔbi gɛɛl o. 20 Elasia da bas niigi la kuob ka zɔti dɔl Elaja ka ye, “Kɛl ka m lɛbi kɛɛsi m ba' nɛ m ma ka lɛb na!”
Ka Elaja yɛl o ye, “Lɛm! M maalif bɔ?”
21 Elasia da bas o ka lɛb. O da zaŋ o lɔlis la kʋ ka kɔ' yɔksin daad la nyu'oe bugum dʋg ni'im la tis nidib la ka ba ɔnb. Ka o yʋ'ʋn yii keŋ dɔl Elaja tʋmmi tisid o.