David di Israel wʋsa na'am
(1Yɛ 11:1-9; 4:1-7)
5
1 Israel buudi la wʋsa da la'as David san'an Hebron teŋin na yɛl o ye, “Tinam nɛ fʋ anɛ du'am. 2 Saŋa kanɛ daa gaad ka Saul aan ti na'ab la, fʋnɛ an onɛ daa ɛɛnti gaad Israel nidib tuon zaba pʋʋgin, ka Zugsɔb la yɛl ye, ‘Fʋnɛ na an onɛ gur m nidib Israel dim la wʋʋ kɔnbkem nɛ, ka na liebi ba tuongat.’ ” 3 Israel kpɛɛmnam la wʋsa da la'as na'ab David san'an na Hebron teŋin. Na'ab la da maal nɔnaar nɛ ba Hebron teŋin Zugsɔb tuon. Ka ba bu'oe malʋŋ kpaam niŋ o zugʋ diis o na'am ka o sʋ'oe Israel wʋsa. 4 David n da di Israel na'am la ka anɛ yʋma pistan'. O da sʋ'oe teŋ la yʋma pisnaasi. 5 Hebron teŋin ka o da bɛ ka sʋ'oe Juda yʋma ayɔpɔi nɛ nwadis ayuobʋ, ka zin'in Jerusalem teŋin sʋ'oe Israel nɛ Juda wʋsa yʋma pistan' nɛ atan'.Jerusalem da lieb David teŋ tita'ar la yɛla
6 Na'ab la nɛ o nidib da duoe keŋ Jerusalem tempʋʋgin ye ba zab nɛ Jebus dim banɛ bɛɛ anina la. Jebus dim la da yɛl David ye, “Fʋ kʋ nyaŋi kpɛn' kpɛla naa, hali zʋnzɔɔs nɛ pɔnda na zabi kadi fʋ yis.” Ban da tɛn'ɛs ye, “David kʋ nyaŋi kpɛn' naa.” 7 La'am nɛ wala, David da nyaŋi ba kpi'euŋ zin'ig dinɛ bɛ Zion la, ka ba yʋ'ʋn buonnɛ li ye, David Teŋ. 8 Daakan la ka David yɛl ye, “Onɛ wʋsa bɔɔd ye o nyaŋ Jebus dim la, asɛɛ ka o dɔlis ku'osuor la, nyaŋi paae ‘pɔnda nɛ zʋnzɔɔs’ nwa, banɛ an David bi'emnam la.” Dinɛ kɛ ka ba ye, “pɔnda nɛ zʋnzɔɔs kʋ kpɛn' na'ayin la.” 9 David da keŋ zin'in teŋ la kpi'euŋ zin'ikanɛ ka o zabi nyaŋ la ni, ka ba buonnɛ li ye, David Tempʋʋg la. Ka o mɛ' zaŋguom kanɛ mɔr paŋi giligi li ka yʋ'ʋn mɛ' ya' bɛdegʋ ka li kilim tempʋʋg. 10 Ka o kpi'euŋ la yʋ'ʋn maligim zu'oe hali, bɔzugɔ Zugsɔb onɛ an Paŋtita'ar Sɔb la da bɛ nɛ o.
David nɛ Hiram dim naal nɔɔr
11 Taya Na'ab Hiram da tʋm nidib Na'ab David san'an ka tis o na'aziinr daad nɛ kampintanam nɛ banɛ mi' kuga mɛɛb ka ba mɛ' na'ayiri tis David. 12 David da baŋ ye Zugsɔb la kɛ ka o na'am la zi'en kiŋ-kiŋ Israel sʋ'ʋlimin, ka dʋ'ʋsi li o nidib Israel dim yɛla.
David n du'a biis Jerusalem teŋin
13 David n da duoe yi Hebron teŋin la nya'aŋ, o da di pu'ab Jerusalem teŋinɛ paas. Ka du'a biribis nɛ bipumisi paas. 14 Bibanɛ ka o da du'a anina la yʋda da anɛ Sammua nɛ Sobab nɛ Natan nɛ Solomon nɛ 15 Ibiha nɛ Elisua nɛ Nefeg nɛ Jafia nɛ 16 Elisama nɛ Eliada nɛ Elifelet.
David nyaŋ Filistia dim la yɛla
17 Filistia dim la da wʋm ye David di Israel na'am la, ka duoe nɛ ba zabzabidibi keŋ ieed o. Amaa David n da wʋm la ka duoe sigi kpɛn' zin'ikanɛ ka ba mɛ' ka li aan ba kpi'euŋ zin'ig la. 18 Ka Filistia dim la kena yadig Refa Dim Bɔn'ɔgin la wʋsa. 19 Ka David bu'os Zugsɔb la ye, “M kem zab nɛ Filistia dim laa? Fʋ na zaŋi ba niŋi m nu'usinɛɛ?” Ka Zugsɔb la lɛbis ye, “Kem, ka m sid na zaŋ Filistia dim la niŋi fʋ nu'usin.” 20 Ka David keŋ Baal Perazim, anina ka o nyaŋi ba. O da yɛl ye, “Nwɛnɛ ku'om tansid si'em la, ala ka Zugsɔb la mɛ tans na nyaŋi m dataas.” Dinzug ka ba buon anina ye Baal Perazim ka li gbin pa'al ye, Zugsɔb la Tans Na. 21 Filistia dim la da basi ba bada anina, ka David nɛ o nidib la vaae ba gaad.
22 Saŋa yinne ya'as ka Filistia dim la kena yadig Refa Dim Bɔn'ɔgin la wʋsa. 23 Ka David bu'os Zugsɔb la ka o lɛbis ye, “Da kpa' keŋ zab nɛ ba, amaa kem gaadi giligi ba nya'aŋi paae tibanɛ zi'e anina la baba pin'ili zab nɛ ba. 24 Fʋ ya'a ti wʋm ka li nwɛnɛ nidib nɔba nɔɔdi dammid tiis la zugin, fʋn duom tɔ'ɔtɔ bʋʋli ba. Bɔzugɔ li pa'al ye mam Zugsɔb la gaadi fʋ tuon ye m zab nɛ Filistia dim zabzabidib la.” 25 Ka David maal wʋʋ Zugsɔb la yɛl o si'em la, ka kʋ Filistia dim la wʋsa din yi Gibeon paae Giza.