David yir nɛ o yidim yɛla
14
1 Taya Na'ab Hiram da tʋm nidib Na'ab David san'an ka tis o na'aziinr daad nɛ kampintanam nɛ banɛ mi' kuga mɛɛb ka ba mɛ' na'ayiri tis o. 2 David da baŋ ye Zugsɔb la kɛ ka o na'am la zi'en kiŋ-kiŋ Israel sʋ'ʋlimin, ka dʋ'ʋsi li o nidib Israel dim yɛla.3 Jerusalem teŋin la David da di pu'abi paas. Ka du'a biribis nɛ bipumis bɛdegʋ paas. 4 Biis banɛ ka o du'a anina la yʋda nwa:
Sammua nɛ Sobab nɛ Natan nɛ Solomon nɛ 5 Ibiha nɛ Elisua nɛ Elpelet nɛ 6 Noga nɛ Nefeg nɛ Jafia nɛ 7 Elisama nɛ Eliada nɛ Elifelet.
David n nyaŋ Filistia dim la
8 Filistia dim la da wʋm ye ba bu'oe malʋŋ kpaam niŋ David zug ka diis o Israel na'am la, ba da duoe nɛ ba zabzabidibi keŋ ieed o. Amaa David da wʋmi ba yɛla ka yi ye o tʋ'ʋsi ba. 9 Ka Filistia dim la da kena paae Refa Dim Bɔn'ɔgin la pin'ili san'amid la'ad. 10 Ka David bu'os Wina'am ye, “M kem zab nɛ Filistia dim laa? Fʋ na zaŋi ba niŋi m nu'usinɛɛ?” Ka Zugsɔb la lɛbis ye, “Kem ka m sid na zaŋ Filistia dim la niŋi fʋ nu'usin.” 11 Ka David nɛ o nidib la keŋ Baal Perazim, anina ka o nyaŋi ba. Ka yɛl ye, “Nwɛnɛ ku'om tansidi yit si'em la, ala ka Wina'am mɛ tans na nyaŋi m dataas.” Dinzug ka ba buon anina ye, “Baal Perazim”. 12 Filistia dim la da lɔbi ba bada bas ani ka zɔ, ka David tis nɔɔr ye ba nyu'om bada la nɛ bugum. 13 Saŋa si'a ya'as ka Filistia dim la daa kena paae bɔn'ɔgin la ka pin'ili san'amid la'ad. 14 Ka David bu'os Wina'am ya'as ka o lɛbis ye, “Da kpa' keŋ zab nɛ ba, amaa kem kaae giligi ba nya'aŋi paae tibanɛ zi'e anina la baba pin'ili zab nɛ ba. 15 Fʋ ya'a ti wʋm ka li nwɛnɛ nidib nɔba nɔɔdi dammid tiis la zugin, fʋn yim zab nɛ ba. Bɔzugɔ din na pa'al ye mam Wina'am la gaadi fʋ tuon ye m zab nɛ Filistia dim zabzabidib la.” 16 Ka David maal wʋʋ Wina'am yɛl o si'em la, ka kʋ Filistia zabzabidib la wʋsa din yi Gibeon ti paae Giza teŋin. 17 Dinzug David yʋ'ʋr da tiig teŋ la wʋsa, ka Zugsɔb la kɛ ka tɛɛns la wʋsa zɔt David.