Ban zi Nɔnaar Daka la lɛb na si'em
13
1 David da nwɛ' sɔɔra nɛ o zabzabidib tuongatib banɛ sʋ'oe nidib tusir-tusir nɛ kɔbig-kɔbig la. 2 Ka yʋ'ʋn yɛl Israel nidib la wʋsa ye, “Ya ya'a siak ka gɔs ka li an ti Zugsɔb Wina'am la bɔɔdim, yanam on kɛ ka ti tɔlim labaari tis zin'ig wʋsa yɛli ti ba'abiis banɛ gilig Israel teŋ titɔndig bɛn la wʋsa, nɛ maanmaannib la nɛ Levi dɔɔg dim banɛ la'am bɛ nɛ ba, ba tɛɛnsin la, ka ba kena la'as nɛ ti. 3 Kɛlli ka ti zii Wina'am nɔnaar Daka la lɛbinɛ ti san'an na, bɔzugɔ ti da tammi li yɛla Saul na'am saŋa la nɛ.” 4 Nidib la wʋsa da siak on yɛl si'el la, bɔzugɔ ba da gɔs ka li dɔl suor.5 Alazug David da la'as Israel nidib la wʋsa din yi Siihor kɔldaug linɛ bɛ Egipt teŋin la ti paae Lebo-Hamat teŋin, ye ba zi Wina'am Daka la naam Kiriaf Jiarim teŋin lɛb na. 6 David nɛ Israel nidib la wʋsa da keŋ Baal teŋin linɛ bɛ Juda teŋgbauŋʋn ka ba buonnɛ li ye, Kiriaf Jiarim la, ye ba nɔk Wina'am Daka dinɛ ka Kerubnam bɛɛ li zug ka Wina'am girima nɛ o paŋ bɛɛ ba teŋsʋk, ka Zugsɔb yʋ'ʋr bɛɛ ani la.
7 Ka ba nɔk Wina'am Nɔnaar Daka la niŋ tɛreko paalin, mɔri yi Abinadab yin na, ka Uzaa nɛ Ahio banɛ an Abinadab biribis la dɔlisidi kat na'abanɛ vɛ'ɛd tɛreko la. 8 David nɛ Israel nidib la wʋsa da maannɛ sumalisim nɛ ba paŋ wʋsa Wina'am tuon. Ba da yʋ'ʋmnɛ ka piebid wiis ka nwɛ'ɛd googinam nɛ siyada nɛ na'atana.
9 Ban da paae Kidon teŋin zieŋ kanɛ ka ba bʋ'ʋd ki la, niigi la da tu'ug ka Daka la bik ka Uzaa zɔɔ ti'e ye li da luu. 10 Zugsɔb la sʋnf da duoe nɛ Uzaa, ka o nwɛ' o bas ka o kpi, on nɔk o nu'ugʋ si'is Daka la zug. O da kpi Wina'am tuon,
11 David sʋnf da pɛlig nɛ Zugsɔb la sʋnfʋ pɛlig nɛ Uzaa la zug. Ka lin yi saŋkan la paae zina ba buon zin'ig kan la ye, Perez Uzaa. 12 David da zɔ Wina'am dabiem daakan la, ka yɛl ye, “Mam ye m niŋ wala lɛn siak ka Wina'am Daka la kɛɛn m san'an na?” 13 O da pʋ bɔɔd ye o siaki di'e Wina'am Daka la ka li keŋ David Teŋin bɛɛ o san'anɛ. Ka lɛɛ mɔri li keŋ Obɛd-Edom onɛ an Gaf nid la yin. 14 Zugsɔb Daka la da kpɛm bɛ nɛ Obɛd-Edom onɛ an Gaf nid la yinne paae nwadis atan', ka Zugsɔb la niŋ on nɛ o yidim nɛ on mɔr si'el wʋsa zug bareka.