Zabzabidib banɛ sʋŋ David la yɛla
12
1 Nimbama da keŋ David san'an Ziklag teŋin, saŋa kanɛ ka Saul onɛ an Kis biig la da kad o yis o san'an la. Ba da anɛ zabzabidib banɛ da sʋŋ o zaba ni. 2 Ba da mɔri ba zaba la'ad, ka mɛ mi' tiraug tɔɔnb hali bɛɛ tun'e vɛnligid luobʋg datiuŋ nɛ adagɔbʋg wʋsa; ba da anɛ banɛ kpin nɛ Saul ka yi Benjamin dɔɔg la ni na, ba yʋda da anɛ:3 Ahieza nɛ Joas onɛ n da an kpɛɛmnam; Babayi' la da anɛ Semaa onɛ da an Gibea nid la biribis; nɛ Jeziel nɛ Pelet, banɛ da an Asmavef biribis nɛ Beraka nɛ Jehu onɛ an Anatof nid la, 4 Ismaya onɛ an Gibeon nid ka da an kpi'euŋ sɔb nidib pistan' la sʋʋgin, ka mɛ da an nidib pistan' la tuongatib yinne la; Jeremia nɛ Jahasi'el nɛ Johanan nɛ Jozabad onɛ da an Gedera teŋ nid la; 5 Eluzaae nɛ Jerimof nɛ Bealiya nɛ Semaraya nɛ Sefatia onɛ da an Haruf teŋ nid la; 6 Elkana nɛ Isaaya nɛ Azarel nɛ Joeza nɛ Jasobeam banɛ yi Kora tuŋʋn la; 7 Joela nɛ Zebadaya da anɛ Jeroham onɛ yi Geduor la biribis.
8 Gad teŋ nidib sieba da buaki keŋ sian'arin David san'an, zin'ikanɛ ka o maal ka li aan o kpi'euŋ zin'ig la. Ba da anɛ zabzabidib amɛŋa banɛ ti'eb ka gur zaba ka nyaŋidi zanl zaba la'ad nɛ li buudi wʋsa. Ba nindaas da nwɛnɛ gbigima nindaas nɛ, ka ba tun'e zɔɔg hali wʋʋ walig kanɛ bɛ kʋkʋna ni nɛ.
9 Ezer n da aan ba tuongat, tia'al Obadia, ka Eliab paas atan'. 10 Ka Misimana paas anaasi, ka Jeremia paas anu, 11 ka Atai paas ayuobʋ, ka Eliel paas ayɔpɔi 12 ka Johanan paas anii, ka Elzabad paas awai 13 ka Jeremia paas piiga, ka Makbanaae paas pii nɛ yinne.
14 Gad dɔɔg dim nwa da anɛ zabzabidib tuongatib; ka banɛ pʋ paae kpɛɛmnam la gɔt zabzabidib kɔbig-kɔbig, ka kpɛɛmnam la gɔt tusir-tusir. 15 Nidib nwa da mɔya hali: nwadkanɛ pin'in yiiga yʋʋm la pʋʋgin la, saŋa kan ka Joodan kɔldaug pɛ'ɛli badig la, ba da lɔ'ɔŋi zab nɛ banɛ bɛ bɔn'ɔdin la kad nimbanɛ bɛ kɔldaug la nya'aŋ nɛ li tuon la widigi ba wʋsa.
16 Ninsieba mɛ da yi Benjamin nɛ Juda dɔɔdin kɛn David kpi'euŋ zin'igin la na. 17 David da yii tʋ'ʋsi ba, ka yɛli ba ye, “Ya ya'a kennɛ m san'an na nɛ sumbʋgʋsʋm ye ya sʋŋim, m na siak ka mam nɛ yanam niŋ nɔɔr yinne. Amaa ya ya'a kena ye ya gbi' mam tisim dataas, la'am nɛ mam pʋ maal si'el la, ti yaanam Wina'am la na kadi ya saria.” 18 Ani ka Wina'am Siig la sig Amasai onɛ da an nidib pistan' la tuongat la zugin ka o yɛl ye,
“David, ti anɛ fʋ nidib!
Jese biiga, ti bɛ nɛ fʋ san'an!
Fʋ na nyaŋ, bi'esʋg kae,
ka banɛ sʋŋidif la mɛ na paam nyaŋir
bɔzugɔ fʋ Wina'am la na sʋ'ʋŋif.”
David da di'e ba ka kɛ ka ba lieb o zabzabidib tuongatib.
19 Manase dɔɔg la ni sieba mɛ da aaɛn kɛn David san'an na, saŋa kanɛ ka on nɛ Filistia dim da keŋ ye ba zab nɛ Saul la. Amaa on nɛ o nidib la da pʋ sʋŋ Filistia dim la bɔzugɔ Filistia tuongatib la da nwɛ' taab sɔɔra ka kadi ba ye ba lɛm kul. Ba da yɛl ye, “O pa'a ti lɛbi kuosi ti tis Saul onɛ aan o zugdaan kʋdig la.” 20 David n da lɛb Ziklag la, nimbama da naam Manase dɔɔg sʋ'ʋlim la ni buaki dɔl o. Ba yʋda da anɛ: Adina nɛ Jozabad nɛ Jediael nɛ Maikel nɛ Jozabad sɔ' nɛ Elihu nɛ Zilataae. Ba da anɛ kpɛɛmnam banɛ an nidib tusir-tusir tuongatib Manase dɔɔg la ni. 21 Ba da anɛ zabzabidib banɛ sʋnfʋ kpi'em, alazug ba da gaad David zabzabidib la tuonnɛ zabid nɛ banɛ da ginnɛ faand la. Lin nya'aŋ la, ba da anɛ Israel zabzabidib kpɛɛmnam. 22 Daar wʋsa nidib da kenna sʋŋid David, hali ka o ti mɔr zabzabidib bɛdegʋ ka ba ka' bɛnnɛ.
Ninsieba keŋi paas David Hebron teŋin la
23 Dap bɛdegʋ da ti'eb nɛ zaba la'adi keŋ David san'an Hebron teŋin ye ba sʋŋ ka Saul na'am la lɛb David san'an na wʋʋ Zugsɔb la da yɛl si'em la. Ba yʋda nwa: 24 Juda dap banɛ da zanl zaba la'ad nɛ li buudi wʋsa ti'ebi gur zaba da anɛ tusa ayuobʋ nɛ kɔbisnii (6,800); 25 Simeon dap banɛ an zabzabidib ka da ti'ebi gur zaba da anɛ tusa ayɔpɔi nɛ kɔbiga (7,100); 26 Levi dap da anɛ tusa anaasi nɛ kɔbis yuobʋ (4,600), 27 la'am nɛ Jehoyada onɛ an Aaron tuŋ la tuongat la, nɛ dap tusa atan' nɛ kɔbisyɔpɔi (3,700). 28 Zadok onɛ an dasaŋ kanɛ mɔr sʋnkpi'euŋ zaba ni la, mɛ da dɔl kpɛɛmnam pisi nɛ ayi' (22) yii o nidibin na; 29 Benjamin dap banɛ an Saul mɛŋ dɔɔg la, nidib da anɛ tusa atan' (3,000), amaa ba pamm da kpɛn dɔl Saul nya'aŋ hali ti paae saŋa kan la; 30 Efiram dap banɛ sʋnfʋ kpi'em nɛ zaba, ka mɛ an ninkpi'ema ba nidibin la, da anɛ tusa pisi nɛ kɔbisnii (20,800); 31 Manase dɔɔg pʋsʋk la ni dap banɛ ka ba da gaansi ba ye ba keŋ sʋŋ ka David di na'am la da anɛ tusa pii nɛ anii (18,000); 32 Isaka dap banɛ da kpansid ka mi' saŋa la ken si'em, ka mi' linɛ nar ye Israel dim maal la, da anɛ tuongatib kɔbisyi' (200) nɛ ba dɔɔg dim banɛ ka ba gaadi ba tuonnɛ pa'annɛ ba ban na maal si'em la; 33 Zebulun dap banɛ mi' zaba ka ti'eb nɛ ba zaba la'ad wʋsa ye ba sʋŋ David ka bi'esʋg kae la, da la'as nɛ nidib tusa pisnu (50,000); 34 Naftali dap banɛ an tuongatib la da anɛ tusir, la'am nɛ dap tusa pistan' nɛ ayɔpɔi (37,000) banɛ zanl zaba la'ad nɛ li buudi wʋsa; 35 Dan dap banɛ da ti'ebi gur zaba da anɛ tusa pisi nɛ anii nɛ kɔbis yuobʋ (28,600); 36 Aser dap banɛ da mi' zaba ka ti'ebi gur zaba da anɛ dap tusa pisnaasi (40,000); 37 ka din lɛb Joodan nya'aŋ baba la, Reuben nɛ Gad nɛ Manase dɔɔg pʋsʋk la ni, dap banɛ ti'eb nɛ zaba la'ad nɛ li buudi wʋsa da anɛ tusa kɔbiga nɛ pisi (120,000).
38 Bama wʋsa da anɛ zabzabidib banɛ gban'e nɛ ba sʋʋnr wʋsa ye ba keŋ Hebron teŋin diis David na'am. Israel dim banɛ paas la da gban'e nɛ nɔɔr yinne ye ba diis David Israel na'am. 39 Dap la da bɛ nɛ David san'an daba atan', ka dit ka nuud, bɔzugɔ ba yidim da tisi ba linɛ ka ba na dit. 40 Ala mɛn ba taaba banɛ bɛ lalli la wʋsa, wʋʋ Isaka nɛ Zebulun nɛ Naftali dɔɔd dim la, da nɔk bʋmis nɛ yʋgʋma nɛ widi nɛ niigi zi diibi kena tisi ba. Ba da mɔr zɔm nɛ tiis wala kɔn'ɔb-kɔn'ɔb nɛ daam nɛ kpaam nɛ niigi nɛ pɛ'ɛs bɛdegʋ na. Nɛ'ɛŋa wʋsa da pa'annɛ Israel dim sʋnfʋ ma'ae si'em.