David n lieb Israel wʋsa Na'ab la yɛla
11
1 Israel nidib la wʋsa da la'as taaba keŋ David san'an Hebron teŋin n yɛl o ye, “Tinam nɛ fʋ anɛ du'am, 2 saŋa kanɛ daa gaad ka Saul aan ti na'ab la, fʋnɛ an onɛ daa ɛɛnti gaad Israel nidib tuon zaba pʋʋgin, ka Zugsɔb la yɛl ye, ‘Fʋnɛ na an onɛ na guri m nidib Israel dim la wʋʋ kɔnbkem nɛ, ka na liebi ba tuongat.’ ” 3 Israel kpɛɛmnam la wʋsa da la'as na'ab la san'an na Hebron teŋin. Na'ab David da maal nɔnaar nɛ ba Hebron teŋin Zugsɔb la tuon. Ka ba diis o na'am ka o sʋ'oe Israel wʋsa, wʋʋ Zugsɔb la da kaanb si'em tis Samuel ka o yɛl o la.David nyaŋ Jerusalem la yɛla
4 David nɛ o nidib la wʋsa da duoe keŋ Jerusalem tempʋʋgin ye ba zab nɛ Jebus dim banɛ bɛ anina la. 5 Jebus dim la da yɛl David ye, “Fʋ kʋ nyaŋi kpɛn' kpɛla naa.” La'am nɛ wala, David da nyaŋi ba kpi'euŋ zin'ig dinɛ bɛ Zion, ka ba yʋ'ʋn buonnɛ li ye, David Teŋ la. 6 David da yɛl ye, “Onɛ nyaŋi gaad tuon ka ba zabi nyaŋ Jebus buudi la na lieb zabzabidib la kpɛɛm.” Ka Joab onɛ an Zeruyia biig la da gaad tuon yiiga, dinzug o da liebi ba kpɛɛm. 7 David da keŋ zin'in teŋ la kpi'euŋ zin'ikanɛ ka o zabi nyaŋ la ni, linzug ka ba da buonnɛ li ye, David Tempʋʋg la. 8 O da mɛ' zaŋguom kanɛ mɔr paŋi giligi li ka yʋ'ʋn mɛ' ya' bɛdegʋ ka li kilim tempʋʋg, ka Joab mɛ' linɛ kpɛlim la naae. 9 Ka David kpi'euŋ la yʋ'ʋn maligim zu'oe hali, bɔzugɔ Zugsɔb onɛ an Paŋtita'ar Sɔb la da bɛ nɛ o.
David zabzabidib banɛ kpi'em la yɛla
10 Bama da an David ninkpi'ema la tuongatib, ban nɛ Israel dim la wʋsa da la'as taaba kɛ ka David na'am la paam paŋi yaligi paae teŋ la bɛn wʋsa, wʋʋ Zugsɔb la da kaanb si'em la. 11 Banɛ da an David ninkpi'ema la yʋda nwana: onɛ da an Takɛmon nid la da an nidiba atan' la kpɛɛm. O da nɔk kpan nɛ kʋ nidib kɔbisnii zabir yinne ma'aa ni.
12 Onɛ tia'al da anɛ Eleazar onɛ an Dodo biig ka an Ahoohi nid la. On anɛ onɛ da paas nimbɛda atan' la ni. 13 O da la'am bɛ nɛ David Pas-Damim teŋin ka Filistia dim la la'as taaba ye ba zab nɛ ba. Israel zabzabidib la da zɔ ka bas Filistia dim la zin'ikanɛ ka mui bɔn'ɔg da bɛ la. 14 Amaa Eleazar nɛ David da paae pɔɔg la teŋsʋk la, ba da zi'enɛ zab nɛ Filistia dim la. Ka Zugsɔb la kɛ ka ba nyaŋ nyaŋtita'ar.
15 Nidib atan' banɛ da an nidib pistan' la kpɛɛmnam la da kɛn David san'an na, tampinyɔk dinɛ bɛ Adullam la. Ka Filistia dim la mɛ la'as Refa Dim Bɔn'ɔgin la zi'e ye ba zab. 16 Saŋkan la ka David da bɛ nɛ o zin'ikpi'euŋin la, ka Filistia zabzabidib la sieba pʋdigi keŋ bɛ Betilehem. 17 Ku'onuud da mɔr David ka o yɛl ye, “O! M bɔɔdi sɔ' naan gbin'e ku'om bulig kanɛ kpi'e Betilehem za'anɔɔrin la tisim!” 18 Ka o nimbɛda atan' la bʋŋ Filistia dim la teŋsʋkʋ gaadi keŋ paae bulig kanɛ kpi'e Betilehem za'anɔɔrin la gbin'e ku'om zii lɛb na tis David. Amaa o da zan'as ya ka pʋ nu ku'om la, ka kpa'ae li bas Zugsɔb la tuon, 19 ka yɛl ye, “Win da kɛ ka m tʋm nɛ'ɛŋaa! Li na nwɛnɛ banɛ kuosi ba nyɔvʋri keŋ la ziim ka m nu.” Alazug ka o zan'as ka pʋ nuu. Tʋʋm kpi'euŋ kanɛ ka dap atan' banɛ an sʋnkpi'euŋ dim la da tʋmm la.
20 Abisai onɛ an Joab pitʋ ka an Zeruyia biig la da an nidib pistan' la kpɛɛm. O da nɔk o kpan nɛ kʋ nidib kɔbistan' ka o yʋ'ʋr mɛ da yii nwɛnɛ nidiba atan' la nɛ. 21 Bi'esʋg kae nɛ on da di'e na'asi gaad nidib pistan' la, hali ka liebi ba tuongat, la'am nɛ ban da pʋ kaal o paas nidib atan' la sʋʋgin la.
22 Benaya, onɛ an Jehoyada biig la, da anɛ zabzabid hali, ka yi Kabziel teŋin na. O da mɔya hali. O da kʋ Moab ninkpi'ema ayi'. O da lɛn sig bʋmbɔkin kʋ gbigim, daar kanɛ ka sisalig da bɛ ka ku'om ga'aŋi nwɛnɛ sakuga la. 23 O mɛ da kʋ Egipt dau tita'ar onɛ wa'alim da gat ninsaal wa'alim, la'am nɛ on da zanl kpan o nu'ugin ka li wa'am hali la. Benaya da keŋ o san'an nɛ balaar ka zɛ kpan la Egipt dau la nu'ugin faaɛn ka nɔk o mɛŋ kpan nɛ kʋʋ o. 24 Jehoyada biig Benaya da tʋm si'em la. O mɛ da mɔr yʋ'ʋr wʋʋ nimbɛda atan' la nɛ. 25 O da di'e na'asi gaad nidib pistan' la, amaa o da pʋ paas nimbɛda atan' la nii. Ka David da kɛ ka o an banɛ gur la kpɛɛm.
26 Ninkpi'ema bama da anɛ: Asahel onɛ an Joab pitʋ la, nɛ Elhanan onɛ an Dodo biig ka yi Betilehem na la, 27 nɛ Seamma onɛ an Harod nid la, nɛ Helez onɛ an Palet nid la, 28 nɛ Ira onɛ an Ikes biig ka yi Tekoa na la nɛ Abieza onɛ yi Anatof teŋin na la, 29 nɛ Sibɛkai onɛ an Husea nid la, nɛ Yila onɛ an Ahoohi nid la, 30 nɛ Meharai onɛ an Netofa nid la, nɛ Heled onɛ an Baana biig ka an Netofa nid la, 31 nɛ Itai onɛ an Ribai biig ka yi Gibea Benjamin teŋin la, nɛ Benaya onɛ an Piraton nid la, 32 nɛ Hurai onɛ yi Gaas Bʋmbu'adin la na, nɛ Abiel onɛ an Aba teŋ nid la, 33 nɛ Asmavef onɛ an Baahum nid la, nɛ Eliyahaba onɛ an Saalbon nid la, nɛ 34 Hasem onɛ an Gizo nid la, nɛ Jonatan onɛ an Siage biig ka yi Harar na la, 35 nɛ Saka biig Ahiam onɛ an Harar nid la, nɛ Elifal onɛ an Ur biig la, nɛ 36 Hifa onɛ an Mekɛra nid la, nɛ Ahija onɛ an Pilon nid la, 37 nɛ Hesro onɛ an Kaamel nid la, nɛ Naarai onɛ an Eziba biig la, nɛ 38 Joel onɛ ba'abiigi an Natan la, nɛ Mibiha onɛ an Hagir biig la, 39 nɛ Zelek onɛ an Ammon nid la, nɛ Naharai onɛ an Beerot nid ka an onɛ ziid Joab onɛ an Zeruyia biig zaba la'ad la, 40 nɛ Ira nɛ Gareb banɛ an Yitir nidib la, 41 nɛ Uria onɛ an Hitti nid la, nɛ Zabad onɛ saamme an Alai la, 42 nɛ Adina onɛ saamme an Siiza onɛ yi Reuben dɔɔgin ka da sʋ'oe nidib pistan' banɛ bɛ nɛ o la, 43 nɛ Hanan onɛ an Maaka biig la, nɛ Joseafat onɛ an Mitan nid la 44 nɛ Uzia onɛ an Asitarof nid la, nɛ Seama nɛ Jeiel banɛ saamme da an Hotam onɛ an Aroa nid la, 45 nɛ Jediael onɛ an Simri biig la, nɛ o ba'abiig Joha onɛ an Tizi nid la, 46 nɛ Eliel onɛ an Mahavi nid la, nɛ Jeribaae nɛ Joseavia banɛ an Elinaam biribis la, nɛ Yitma onɛ an Moab buudi nid la, 47 nɛ Eliel nɛ Obɛd nɛ Jaasiel onɛ an Mezoba nid la.