Saul n kʋʋ o mɛŋ la yɛla
10
1 Filistia dim da zab nɛ Israel dim Giliboa zuorin la ka nyaŋ Israel dim la kʋʋ ba pamm, ka banɛ kpɛlim la zɔ. 2 Filistia dim la nini da mu'oe Saul nɛ o biribis la yɛla hali; ba da kʋʋ o biribis Jonatan nɛ Abinadab nɛ Malikisua. 3 Zaba la da ɔnsig nɛ hali gɛɛl Saul, ka tiratɔɔndib la nyaŋi tɔn Saul n pu'alim o bɛ'ɛd bɛ'ɛdi.4 Saul da yɛl onɛ ziid o zaba la'ad la ye, “Fuomi fʋ sʋ'ʋg la kunsimi kʋ, ya'a ka' ala nimbanɛ pʋ kpɛn' baŋʋ nwa na kena kunsimi kʋ ka li lieb nyannɛ tisim.” Amaa o zaba la'aziid la da zɔ dabiem ka pʋ siaki niŋ ala. Ka Saul fuoe o mɛŋ sʋ'ʋgʋ ba'a teŋin ka bas o mɛŋi lii li zugʋ kpi. 5 Zaba la'aziid la da nyɛ ka Saul kpi la, ka on mɛ fuoe o sʋ'ʋgʋ ba', ka mɛ bas o mɛŋi lii li zug, ka ba wʋsa la'am kpi. 6 Saul nɛ o biribis atan' la nɛ onɛ ziid o zaba la'ad, nɛ o yidim la wʋsa da la'am kpinɛ daar yinne. 7 Israel dim banɛ bɛ bɔn'ɔfaligin la da nyɛ soogianam la zɔt, ka Saul nɛ o biribis la wʋsa kpi la, ba da duoe zɔ ka basi ba tɛɛns la. Ka Filistia dim la keŋ di'e lii zin'in.
8 Bɛogʋ da nie ka Filistia dim la kena ye ba yɛɛs banɛ kpi la fuud la, ba da nyɛ Saul nɛ o biribis la dig Giliboa zuor la zug. 9 Ka ba yɛɛs o zaba la'ad la, ka fi'igi o zug, ka tʋm nidib ye ba keŋ mɔɔli gilig Filistia dim teŋ la wʋsa, ka yɛl labaar la tisi ba bada la nɛ ba nidib la wʋsa. 10 Ba da nɔk o zaba la'ad la niŋi ba bada la dɔɔgin ka nɔk o zug la ya'al ba'ar kanɛ buon Dagon la dɔɔgin. 11 Jabis Gilead nidib la wʋsa da wʋm Filistia dim la maal Saul niŋgbiŋ la si'em la, 12 ba nimbanɛ sʋnfʋ kpi'em ka ba pʋ lɛbid nya'aŋ zaba ni la, da duoe keŋ Betsean yʋ'ʋŋ kanɛ yak Saul nɛ o biribis la niŋgbina lɛb Jabis ka nɔki ba kɔnba la pin' titita'ar gbinnin Jabis teŋin, ka lɔ nɔɔr daba ayɔpɔi.