Saul kʋʋ o mɛŋ
31
1 Filistia dim da zab nɛ Israel dim la Giliboa zuor la zugʋ nyaŋi kʋʋ ba pamm, ka banɛ kpɛlim la zɔ. 2 Filistia dim la da mu'oe nini hali Saul nɛ o biis la yɛla; ba da kʋʋ o biis Jonatan nɛ Abinadab nɛ Malikisua. 3 Zaba la da ɔnsig nɛ hali gɛɛl Saul, ka tiratɔɔndib la da nyaŋi tɔn Saul n pu'alim o bɛ'ɛd bɛ'ɛdi. 4 Saul da yɛl onɛ ziidi o zaba la'ad la ye, “Fuomi fʋ sʋ'ʋg la kunsimi kʋ, ya'a ka' ala nimbanɛ pʋ kpɛn' baŋʋ nwa na kena n kunsimi kʋ ka li lieb nyannɛ tisim.” Amaa o zaba la'aziid la da zɔt dabiem ka pʋ siaki niŋ ala. Ka Saul fuoe o mɛŋ sʋ'ʋgʋ ba'a teŋin ka bas o mɛŋi lii li zugʋ kpi. 5 Zaba la'aziid la nyɛ ka Saul kpi la, ka on mɛ fuoe o sʋ'ʋgʋ ba', ka mɛ bas o mɛŋi li zug ka ba wʋsa la'am kpi daar yinne. 6 Saul nɛ o biis atan' la nɛ onɛ ziid o zaba la'ad, nɛ o nidib la wʋsa da la'am kpinɛ daar yinne. 7 Israel dim banɛ bɛ bɔn'ɔfaligin nɛ banɛ lɔ'ɔŋi bɛ Joodan baba la, nyɛ Israel soogianam la zɔ ka Saul nɛ o biis la wʋsa kpi la, ba da duoe zɔ ka basi ba tɛɛns la. Ka Filistia dim la di'e lii zin'in.8 Bɛogʋ nie ka Filistia dim la kena ye ba yɛɛs banɛ kpi la fuud la, ka nyɛ Saul nɛ o biis atan' la dig Giliboa zuor la zug. 9 Ba da fi'igi o zug, ka yɛɛsi o zaba la'ad la, ka tʋm nidib ye ba keŋ mɔɔli gilig Filistia dim teŋ la wʋsa, ka yɛl labaar la ba ba'ar dɔɔgin la nɛ ba nidib la wʋsa. 10 Ba da nɔk o zaba la'ad la niŋ Asitoref ba'ar dɔɔgin la, ka kpa' o niŋgbiŋ la tabil Betsean zaŋguom la. 11 Jabis Gilead nidib la da wʋm Filistia dim la maal Saul niŋgbiŋ la si'em la, 12 ba nimbanɛ sʋnfʋ kpi'em ka ba pʋ lɛbid nya'aŋ zaba ni la da duoe keŋ Betsean yʋ'ʋŋ kanɛ yak Saul nɛ o biis la niŋgbina lɛb Jabis n nyu'oe ba. 13 Ka nɔki ba kɔnba la pin' tisi'a gbinnin Jabis teŋin, ka lɔ nɔɔr daba ayɔpɔi.