David nyaŋ Amalek dim
30
1 David nɛ o nidib la da paae Ziklag daba atan' daar, zi' ka Amalek dim la da keŋ gbirigi zab nɛ Negef nɛ Ziklag n faaɛn ba ka nyu'oe teŋ la nɛ bugum. 2 Ka gban'e pu'ab la nɛ banɛ bɛɛ ani la wʋsa, dasam nɛ bʋnkʋt la wʋsa. Ba da pʋ kʋ sɔ'ɔsɔ, amaa ba da mɔri ba nɛ gaad. 3 David nɛ o nidib la da paae Ziklag na la, ba da nyɛ zin'ig la nyu'oe nɛ bugum, ka ba gban'e ba pu'ab nɛ ba biribis nɛ ba bipumisi mɔri ba gaad. 4 Li da kɛ ka David nɛ o nidib la kum hali ka paŋ ti lɛn ka' kumma. 5 Ba mɛ da gban'e David pu'aba ayi' la, banɛ da an Ahinoam onɛ yi Jezireel nɛ Abigel, Nabal onɛ yi Kaamel na la pʋkɔɔnr. 6 David sʋnf da san'am nɛ hali, bɔzugɔ nidib la da gban'ad nɛ ye ba lɔb o nɛ kuga. Sɔ' wʋsa sʋnf da duoe nɛ, o biribis nɛ bipumis yɛla. Amaa ka David paam kpɛmisʋg Zugsɔb onɛ aan o Wina'am la san'an. 7 Ka David yɛl Abiata onɛ an maanmaan kpɛɛm ka an Ahimelek biig la ye, “Mɔr dansik la na!” Abiata da mɔri li kɛɛn o san'an na. 8 Ka David bu'os Zugsɔb la ye, “M kadim banɛ kena faaɛn ti la bugirɛɛ? M na paae baa?” Ka o lɛbis o ye, “Kadimi ba bugir, ka fʋ sid na paae ba.” 9 David nɛ o nidib kɔbisyuobʋ banɛ bɛ nɛ o la da kɛn Beso bɔn'ɔfaligin la na, ka sieba kpɛlim nya'aŋ, 10 bɔzugɔ dap kɔbisyi' da gɛnnɛ ka pʋ nyaŋi lɔ'ɔŋ bɔn'ɔg la. Amaa David nɛ kɔbisnaasi banɛ kpɛlim la da kpɛn ken tuonnɛ kati ba bugir. 11 Ba da nyɛ Egipt nid pɔɔgin ka mɔr o kɛn David san'an na. Ba da tis o ku'om ka o nu ka tis o diib 12 linɛ da an kekama ka ba gbilim nɛ tiwala nu'ukukudis ayi' ka o di. Dau la da diya ka paŋ yʋ'ʋn kena, bɔzugɔ o da pʋ di bɛɛ nuu, daba atan' yʋ'ʋŋ nɛ nintaŋ wʋsa. 13 Ka David da bu'os o ye, “Fʋ dɔl anɔ'ɔnama, ka yaanɛ ka fʋ yina?” Ka o gandig o ye, “Mam anɛ Egipt nid, Amalek dau sɔ' yammʋg. Ban'a daa gba'am ka m zugdaan la kɛɛsimi bas daba atan' zina. 14 Tinamɛ daa keŋ Negef sʋ'ʋlim la zabi faaɛn Juda dim sieba banɛ an Keret nɛ Kaleb teŋ dim, ka nyaan nyu'oe Ziklag nɛ bugum la.” 15 Ka David bu'os o ye, “Fʋ na nyaŋi dɔllimi keŋ banɛ daa keŋ faaɛn la zin'iginɛɛ?” Ka o lɛbis ye, “Pɔɔm Wina'am ye fʋ kʋ kʋʋm bɛɛ nɔkimi tisim zugdaan la, ka m na dɔlli fʋ keŋi ba san'an.” 16 O da gaad tuonnɛ dɔl David n keŋ paae Amalek dim la, ka ba di'e zin'ig la wʋsa, dit ka nuud ka di'emid, ban nyaŋi vaae disieba yi Filistia dim teŋin nɛ Juda sʋ'ʋlimin la zug. 17 David da zab nɛ ba yi bɛogʋn ti ma'ae zaam ka sɔ' pʋ pɔnsɛ, asɛɛ dasam kɔbisnaasi banɛ nyaŋi ban' yʋgʋma zɔ la ma'aa. 18 David da nyaŋi di'e Amalek dim la vaae si'el la wʋsa, la'am nɛ o pu'aba ayi' la. 19 David da faaɛn bʋnkʋt nɛ dasam, biribis nɛ bipumis, hali nɛ la'abanɛ ka ba nɔk la wʋsa, mɔri lɛb. Baa si'el-si'el da pʋ bɔdigɛ. 20 O da faaɛn Amalek dim kɔnbid nɛ niigi la wʋsa, ka o nidib la kadi gaad tuon ka yɛt ye, “David la'adi nwa.” 21 Ka David kena paae dap kɔbisyi' banɛ da gɛn ka pʋ nyaŋi dɔlli ba ka kpɛlim nya'aŋ Beso bɔn'ɔfaligin la. Ba da duoe tʋ'ʋs David nɛ nimbanɛ dɔl o la. David nɛ o nidib la daa li'eli ba la, o da pʋ'ʋsi ba. 22 Amaa nimbɛ'ɛdnam banɛ daa gɛndig David nidib la ka ieed yɛla la da yɛl ye, “Bam pʋ nyaŋi keŋ nɛ tinam la, ti kʋ pʋdig la'abanɛ ka ti di'e la sieba tisi ba, amaa sɔ' wʋsa lɛɛ tun'e nɔk o mɛŋ pu'a nɛ o biisi keŋ.” 23 Ka David lɛbisi yɛl ye, “Ayei, da maalinɛ ala nɛ bʋnkanɛ ka Zugsɔb la tisi ti la. Onɛ nɔk banɛ kena zab nɛ ti la niŋi ti nu'usin ka ti nyaŋi ba. 24 Anɔ'ɔnɛ na kɛlis yanamɛ yɛt si'el la? Onɛ kpɛlim gur la'ad la nɛ onɛ keŋ zabir la pʋʋr na an yinne. Ba zan' na pʋdig azinzema.” 25 David da yɛl nɔɔrɛ digil, ka li an malʋŋʋ tis Israel hali ti paae zina. 26 David n da paae Ziklag na la, o da yis la'ad la sieba tis Juda kpɛɛmnam banɛ da aan o zuanam la ka yɛl ye, “Ya piini nwa la'abama yinɛ Zugsɔb dataasin la na.” 27 O da tis banɛ bɛ Betel la, nɛ Ramot Negef nɛ Jatir 28 nɛ banɛ bɛ Aroa nɛ Sifmof 29 nɛ Rakal nɛ banɛ bɛ Jerameel tɛɛnsin nɛ Keen dim la 30 nɛ banɛ bɛ Horma nɛ Bor-Asean nɛ Atak 31 nɛ Hebron nɛ nimbanɛ bɛ zin'ibanɛ wʋsa ka David nɛ o nidib la gɔɔnd la.