Akis kɛ ka David lɛb Ziklag
29
1 Filistia dim la da la'asi ba soogianam la wʋsa Afek teŋin, ka Israel mɛ la'as Jezireel bulig la baba. 2 Filistia teŋ sʋ'ʋdibi da dɔl taaba kɔbig-kɔbig nɛ tusir-tusir la, David nɛ o nidib la da dɔlnɛ Akis n dɛn'ɛd nya'aŋ. 3 Filistia kpɛɛmnam la da bu'os ye, “Ka Hibiru bama mɛnɛ?” Ka Akis lɛbisi ba ye, “Oŋa anɛ David. O da anɛ Saul onɛ an Israel Na'ab la kpɛɛmnam yinne. O bɛɛ m san'an ka li gaad yʋʋme nwa, ka lin yi daakanɛ ka o bas Saul n ti paae zina m pʋ nyɛ taal o nii.” 4 Amaa Filistia kpɛɛmnam la sʋnf daa duoe nɛ o ka ba lɛbis ye, “Kɛl ka dau la lɛbi keŋ zin'ikanɛ ka fʋ daa tis o la! Li ka' tilas ye o dɔlli ti keŋ zabaa, ka o na ti tuligi zabid nɛ ti. Fʋ zi' ye o na tun'e dɔl suokaŋa kʋʋ ti nidib la ka li ma'ae o zugdaan la sʋnfɔɔ?” 5 Ka' David kanɛ ka ba mɔri yʋ'ʋmmi wa'adi yɛt ye, “ ‘Saul kʋʋ o tusir, ka David kʋ tusa piiga laa?’ ” 6 Dinzug Akis da buol David ka yɛl o ye, “Nɛ Wina'am onɛ vʋe la mɛnɛ, fʋ anɛ onɛ ka ti tis sida. Fʋ ya'a dɔlli m soogianam la li naan malisi nɛ m bɔzugɔ, lin pin'il daakanɛ ka fʋ kɛɛn m san'an na la ti paae zina, m pʋ nyɛ taal si'a fʋ san'anɛ. Amaa teŋ sʋ'ʋdib la pʋ siak ye fʋ pɛ'ɛsɛ. 7 Fɛndigim lɛbi kul nɛ sumbʋgʋsʋm; da maal si'el linɛ na daam Filistia teŋ sʋ'ʋdib la sʋʋnrɛ.” 8 Ka David bu'os ye, “M maal taal bɔ ka fʋ nyɛ? Mam aan fʋ sankpan'asi bɛɛ fʋ san'an hali ti paae zina la, fʋ nyɛ taal bɔɔ m san'anɛ? Ka bɔ ka m kʋ nyaŋi keŋ zab nɛ fʋn onɛ aan m zugdaan la dataasɛ?” 9 Ka Akis lɛbis ye, “M mi' ye fʋ an sʋm m nini ni nwɛnɛ Wina'am maliak nɛ. La'am nɛ wala, Filistia kpɛɛmnam la ye, ‘O pʋ sʋ'ʋm ye o dɔlli ti keŋ zabirin la.’ 10 Alazugɔ, isigim dɔlli fʋ zugdaan yammis banɛ dɔlli fʋ kena la gaad.” 11 Dinzug David nɛ o nidib la da isig bɛogʋn lɛb Filistia dim teŋin la, ka Filistia dim la keŋ dʋ Jezireel.