1 Samuel 28

1 Di da paae saŋsi'a ka Filistia dim la lɛn la'as taaba ye ba zab nɛ Israel dim. Ka Akis yɛl David ye, “Baŋim ye asɛɛ ka fʋn nɛ fʋ nidib la bielim zaba la.” 2 Ka David yɛl ye, “Alaa fʋ na nyɛ nɛ fʋ mɛŋ nini man kanɛ aan fʋ sankpan'as la na nyaŋi maal si'el.” Ka Akis lɛbis ye, “Linɛ an sʋm! M na kɛ ka fʋ an onɛ gur mam nɛ m nyɔvʋr bɛn.”

Saul keŋ ba'akɔlʋg sɔb ni

3 Saŋkan la ka Samuel kpi ka Israel dim kaasi o kʋʋr, ka mum o, o mɛŋ teŋin Rama tempʋʋgin. Saul da kad ba'akɔn dim nɛ sɔɔnb la wʋsa yis teŋ la ni.

4 Filistia dim la da la'as taaba tiinsim zin' Seunim teŋin. Ka Saul nɛ Israel dim la mɛ la'asi tiinsim Giliboa kʋkʋna baba. 5 Saul n da nyɛ Filistia soogianam la, dabiem da gban'e o nɛ ka o sʋnf wʋsa san'am. 6 O da bu'os Zugsɔb la ye o baŋ yɛl la an si'em, amaa Zugsɔb la da pʋ gandigi yi zaansʋŋin bɛɛ maanmaan kpɛɛm bɛɛ nɔdi'esidib san'anɛ. 7 Saul yʋ'ʋn da yɛl banɛ tʋmmi tisid o la ye, “Ieemi pu'a kanɛ an ba'abʋgʋd la tisim, ka m keŋ o san'anɛ m bu'osi gɔs.” Ka ba yɛl o ye, “Pu'a yinne bɛ Endo.” 8 Ka Saul tiaki o mɛŋi yɛ kparikɛɛnd. Ka yʋ'ʋŋ sisɔbir ka on nɛ dapa ayi' da duoe keŋ pu'a la san'an yɛl o ye, “Bʋgʋm ba'adi tisim, ka buol dau onɛ ka m pʋdig o yʋ'ʋr la siig ka o yina.” 9 Amaa pu'a la lɛbis ye, “Sida fʋ mi' ye Saul kad sɔɔnb nɛ ba'akɔn dim wʋsa yis, ka bɔ ka ya bɔɔd ye ya bɛndim ka zi kum kɛɛn m zugin na?” 10 Ka Saul pɔ ye, “Sida ka m yɛtif, si'el kʋ niŋif tʋʋm kaŋa zugɔ.” 11 Ka pu'a la bu'os Saul ye, “Anɔ'ɔn ka m na buol ka o yina ka fʋ bu'osɛ?” Ka Saul lɛbis ye, “Buolim Samuel na!” 12 Pu'a la da nyɛ Samuel la, o da kaas kuŋ agɔla ka yɛl Saul ye, “Bɔɔ kɛ ka fʋ ma'ama? Fʋ anɛ Saul!” 13 Ka Na'ab la yɛl o ye, “Da zɔt dabiem. Fʋ nyɛ bɔ?” Ka pu'a la lɛbis ye, “M nyɛnɛ kpi'im ka o yit teŋin dʋt na.” 14 Ka o bu'os o ye, “O nwɛnɛ anɔ'ɔnɛ?” Ka o lɛbis ye, “O anɛ bʋnkʋdʋgʋ yɛ fuwɔk.” Ka Saul baŋ ye li anɛ Samuel, ka o digin avanba ka o nindaa kpa' teŋ. 15 Ka Samuel bu'os Saul ye, “Bɔzug kimm ka fʋ daamim hali kɛ ka m yina?” Ka Saul lɛbis ye, “Yɛlpakiri paam hali: Filistia dim la zabid nɛ mam ka Wina'am fɛndig ka basim. O pʋ lɛn gandigidimi yit nɔdi'esidibin bɛɛ zaansʋŋinɛ. Linzug ka m buolif ye fʋ yɛlim man na niŋ si'em.” 16 Ka Samuel lɛbisi yɛl o ye, “Nannanna Zugsɔb la sadigim fɛndig ka basif ka lɛbigi fʋ dataa, ka bɔ ka fʋ bu'osid mam? 17 Zugsɔb la tʋmnɛ wʋʋ on daa dɔlis mam ni yɛl si'em la. Zugsɔb la aaɛn sʋ'ʋlim la yisi fʋ nu'ugin zaŋi tisi fʋ kpi'es la yinne. Ɛɛn, o zaŋi tis David. 18 Fʋn pʋ siak Zugsɔb nɔɔr ka pʋ san'am Amalek dim la wʋʋ on daa ye fʋ niŋ si'em la, dinzug ka Zugsɔb la kɛ ka lina paaf zina. 19 Zugsɔb la na nɔk fʋn nɛ Israel wʋsa niŋ Filistia dim la nu'usin, bɛog fʋn nɛ fʋ biis la wʋsa na kpi. Zugsɔb la mɛ na kɛ ka Filistia dim na nyaŋi fʋ soogianam la.” 20 Ka Saul kpɛn gbirigi lu avanba, ka dabiem kpɛn' o, Samuel pian'ad la zug. O paŋ wʋsa da naae nɛ, bɔzugɔ yʋ'ʋŋ nɛ nintaŋ la wʋsa o da pʋ di si'ela.

21 Pu'a la da kɛn Saul san'an na nyɛ ka o kirid la, o yɛl o ye, “Naa, gɔsima! Man kanɛ aan fʋ sankpan'as pu'ak la siaki fʋ nɔɔr ka kuosi m nyɔvʋri tʋm fʋn yɛl ye m tʋm si'el la. 22 Nannanna, m bɛlimnɛ wʋm tisim ka m tisif diib ka fʋ di ka paam paŋi gaadi fʋ gaadʋg.” 23 O da zan'as ya ka ye, “M kʋ dii.” Amaa o nidib la la'as nɛ pu'a la ka ba pian' tis o, ka o wʋm tisi ba, ka duoe teŋin la zin'in kʋk zug. 24 Pu'a la da mɔr na'abilpɔl yin la, ka zaŋi kɔdig, ka nɔk zɔm maal bodobodo linɛ ka' danbinnɛ. 25 Ka zaŋi li tis Saul nɛ o nidib la, ka ba di. Yʋ'ʋŋ kan nɔɔ ka ba duoe gaad.