David bɛ Filistia dim teŋsʋk
27
1 David daa tɛn'ɛs o sʋʋnrin ye, “Dabisbama ni Saul ya'a paamim, o kʋ basi ma. Man na niŋ si'em anɛ m zɔɔ keŋ Filistia dim la san'an. Lin na kɛ ka Saul basim ieeb Israel teŋin wʋsa, ka m da luu o nu'uginɛ.” 2 Dinzug David nɛ o nidib kɔbisyuobʋ la da yii keŋ Akis onɛ an Maok biig ka an Gaf na'ab la san'an. 3 David nɛ o nidib da keŋ zin'in Akis san'an Gaf teŋin. Dau wʋsa da ken ka dɔlli o yidim. David mɛ da dɔl o pu'aba ayi', Ahinoam onɛ yi Jezireel nɛ Abigel onɛ yi Kaamel ka an Nabal pʋkɔɔnr la. 4 Ban da yɛl Saul ye David zɔɔ keŋ Gaf la, o da bas David ieeb. 5 Ka David yɛl Akis ye Naa, Na'aba, “Fʋ sʋnf ya'a malis nɛ mam, fʋn bɔɔm teŋi fʋ sʋ'ʋlimin la tisim ka m zin'in. Li pʋ nar ye mam nɛ fʋ la'am bɛ na'ateŋin kpɛla.” 6 Daakan la Akis da tis o Ziklag, ka dinzug ka li lieb Juda na'anam sʋ'ʋlim hali nɛ zina. 7 David da zin' Filistia teŋ sʋ'ʋlimin la nɛ yʋʋm nɛ nwadis anaasi.8 David nɛ o nidib la da keŋ zabi faaɛn Gesur dim nɛ Giriz nɛ Amalek dim la. (Kʋdimin sa nimbama da bɛnɛ teŋin la keŋ paae Seur nɛ Egipt.) 9 Saŋa kanɛ wʋsa ka David zab nɛ zin'isi'a o da ɛɛn pʋ kɛt ka dau bɛɛ pu'a kpɛlim vʋeya amaa ka lɛɛ nɔk pɛ'ɛs nɛ niigi nɛ bʋmis nɛ yʋgʋma nɛ fuud ka nyaan lɛb Akis san'an. 10 Akis ya'a da bu'os ye, “Ya ka ya keŋ faaɛn zina?” David na lɛbis ye, “Ti keŋ nɛ Negef linɛ bɛ Juda”, bɛɛ, “Negef linɛ bɛ Jerameel” bɛɛ, “Negef linɛ an Keen dim teŋ la.” 11 O da kʋʋd dap nɛ pu'ab wʋsa, ya'a ka' alaa ba na lɛb Gaf teŋin yɛl Na'ab Akis on tʋm si'el. On da tʋm si'em nwa, saŋkanɛ ka ba da bɛ Filistia dim sʋ'ʋlimin la wʋsa. 12 Akis da niŋ David yadda ka tɛn'ɛs o sʋʋnrin ye, “O nidib Israel dim la kisi o nɛ, alazugɔ o na aan m sankpan'as saŋa wʋsa.”