David lɛn zan'as Saul kʋʋb
26
1 Zif dim la da lɛn keŋ Saul san'an Gibea teŋin yɛl o ye, “Fʋ zi' ye David su'a nɛ tinam san'anɛɛ? Ɛɛn! O bɛ Hakila kʋkʋnin la, kpa' Jesimon teŋ la.” 2 Dinzug Saul da duoe sig Zif sian'arin la nɛ nidib tusa atan' banɛ ka o gaans Israel dim sʋʋgin la, ye ba iee David. 3 Saul da maali ba gbɛɛnb zin'ig la kpi'el suor linɛ bɛ Hakila kʋkʋnin kpi'e Jesimon la. Amaa on da baŋ ye Saul dɔlis o nɔba paae anina na la, 4 o da tʋm o nidib la sieba ye ba yii gɔs ye Saul paae naa? Ka ba lɛb na ye o pʋn paae na.5 Ka David yii keŋ zin'ikanɛ ka Saul kenna ye o diginɛ gu' la. O da nyɛ Saul nɛ Abner onɛ an Nier biig ka an soogianam la kpɛɛm la gu' zin'isi'a. Saul da dignɛ teŋsʋk ka soogianam la diginɛ gilig o. 6 David da bu'os Ahimelek onɛ an Hitti dau la nɛ Abisai, onɛ an Zeruyia biig ka an Joab pitʋ la ye, “Anɔ'ɔnɛ na dɔl mam ka ti keŋ Saul gbɛɛnb zin'igin la?” Ka Abisai da lɛbis ye, “Man! M na dɔlli fʋ keŋ.” 7 David nɛ Abisai da keŋ soogianam la san'an yʋ'ʋŋ, ka Saul bɛɛ ani digi gbisid nidib la teŋsʋk ka o kpan ba' teŋi kpi'e o zug baba. Abner nɛ soogianam la daa dig nɛ gilig o. 8 Abisai da yɛl David ye, “Zina Zugsɔb la nɔki fʋ dataa la niŋi fʋ nu'ugin. Nannanna kɛl ka m kʋns o ta'al nɛ teŋ la nɛ m kpan la vuguri. M kʋ kʋns o nɔɔra ayi'.” 9 Amaa David da yɛl Abisai ye, “Da kʋ oo! Anɔ'ɔnɛ na nɔk o nu'ugʋ si'is onɛ ka Zugsɔb la gaŋ ka bu'oe malʋŋ kpaam niŋ o zugin ka li niŋ na'ana tis o?” 10 Ka lɛn yɛl ye, “Asida sida, m bas o nɛ Wina'am, o saŋa na paae ka o kpi, ya'a ka ala o na keŋ nɛ zaba nii kpɛlim anina. 11 Amaa win na yis ka mam nɔki m nu'ugʋ si'is onɛ ka Zugsɔb la gaŋ ka bu'oe malʋŋ kpaam niŋ o zugin la. Nannanna, nɔkim o kpan la nɛ ku'om gan'ar la kpi'e o zugin la, ka ti keŋ.” 12 Ka David sid da nɔk kpan la, nɛ ku'om gan'ar linɛ kpi'e Saul zugin la, ka ba gaad. Sɔ' da pʋ nyɛ bɛɛ baŋi li yɛla bɛɛ nie gbɛɛminɛ. Ba wʋsa da gbis nɛ bɔzugɔ Zugsɔb la da kɛ ka ba gbis gbɛnkan buudi.
13 David da lɔ'ɔŋ gbɛogʋ lalig bi'ela dʋ kʋkʋn zug. Paalʋ kanɛ da bɛɛ ba teŋsʋk la da pʋ pɔɔda. 14 Ka o kaas kuŋi buol soogianam la nɛ Abner onɛ an Nier biig la ye, “Abner! Fʋ kʋ siaki m buolʋg laa?” Ka Abner lɛbis ye, “Fʋ aan anɔ'ɔnɛ buon Na'aba?” 15 Ka David lɛbis o ye, “Mɛ fʋ ye fʋ anɛ dau, bɛɛ ka' ala? Anɔ'ɔnɛ nwɛnɛ fʋ Israel teŋinɛ? Bɔ ka fʋ pʋ guri fʋ zugdaan onɛ an Na'ab la? Sɔ' pa'a kena ye o kʋʋ ya zugdaan onɛ an Na'ab la. 16 Fʋn maal si'el la ka' sʋ'ʋm. Nɛ Wina'am onɛ bɛ saazug nwa, fʋn nɛ fʋ nidib la nari kum, bɔzugɔ ya pʋ guri ya zugdaan onɛ ka Zugsɔb gaŋ ka bu'oe malʋŋ kpaam niŋ o zugin la. Gɔsim giligi ye Na'ab kpan la nɛ o ku'om gan'ar linɛ pa'a digi o zug baba la bɛ yaanɛ?” 17 Saul da baŋ David ka bu'os o ye, “Fʋ kʋkɔri laa, m biig David?” Ka David lɛbis ye, “Ɛɛn, m zugdaan Na'aba.” 18 Ka bu'os ye, “M zugdaana, m anɛ fʋ sankpan'as, bɔ ka fʋ kati m bugirɛ? M maalif bɔ, bɛɛ taal bɔ ka m tʋm? 19 Naa, m zugdaana, kɛlisimi fʋ sankpan'as la pian'ʋk. Li ya'a anɛ Zugsɔb la kɛ ka fʋ kisig man, on di'em maan. Amaa li ya'a anɛ saalibi tuguli ti, ba na paam nɔpɔɔr Zugsɔb la tuon! Ba kat mam m pʋʋr linɛ bɛ Zugsɔb la teŋin la, ka yɛt ye, ‘Kem dɔl bada.’ 20 Nannanna, da kɛ ka m kpi teŋ zʋŋ kanɛ ka' Zugsɔb la teŋa. Naa, bɔ ka Israel Na'ab la yina ieed silinsaukɔ? Li nwɛnɛ sɔ' na ieed kunduŋ zuoya ni.” 21 Ka Saul lɛbis ye, “Man tʋm taal. Lɛm na, m biig David, bɔzugɔ fʋ gɔs ka m nyɔvʋr mɔr nyɔɔd zina, m kʋ lɛm mɔ ye m san'amif ya'asɛ. Sida m tʋm nɛ nwɛnɛ zɔlʋg nɛ ka yidig bɛdegʋ.” 22 Ka David lɛbis ye, “Naa, gɔsima, fʋ kpan la nwa. Kɛl ka fʋ dasam la yinne kena di'e li. 23 Zugsɔb la yɔɔd nɛ onɛ wʋsa mɔr pʋpielim ka an sida sɔb. Zugsɔb nɔki fʋ niŋi m nu'ugin zina, amaa mam pʋ siak ye m nɔki m nu'ugʋ si'is onɛ ka Zugsɔb gaŋ ka bu'oe malʋŋ kpaam niŋ o zugin la. 24 Nwɛnɛ man sid nyɛ ka fʋ vʋm la mɔr nyɔɔd zina la, ala mɛn ka Zugsɔb la mɛ nyɛ mam din mɛn ka yisim yɛla wʋsa pʋʋgin.” 25 Ka Saul yɛl David ye, “M biig David, fʋ na paam albareka. Fʋ na tʋm nyalima ka sid nyaŋ.”
Ka David daa keŋ o ken, ka Saul mɛ lɛbi kul.