David nɛ Nabal nɛ Abigel
25
1 Samuel da kpiya, ka Israel dim wʋsa la'asi kaasid o kʋʋr. Ba da mum o, o yin linɛ bɛ Rama la. Ka David tɔɔm keŋ Maon sian'arin la.2-3 Dau sɔ' da bɛ Maon teŋin an bʋndaan, ka mɔr paalʋ bɛdegʋ teŋ kanɛ buon Kaamel la baba ka da mɔr bʋʋs tusir, nɛ pɛ'ɛs tusa atan'. O yʋ'ʋri da buon Nabal ka o pu'a yʋ'ʋr buon Abigel. O da anɛ pu'a kanɛ mɔr ya'am ka vɛnl, amaa o sid, onɛ da an Kaleb tuŋ nid la, da anɛ onɛ pʋ lɔdigid o nindaa ka o si'el mɛ pʋ lut teŋa. Saŋa da paaeya ka ba kiesid o pɛ'ɛs kɔnbid Kaamel teŋin, 4 ka David bɛ sian'arin la, ka wʋm. 5 Ka o tʋm dasam piiga ka yɛli ba ye, “Kemi Nabal san'an Kaamel teŋin pʋ'ʋs o ka ye manɛ tʋmi ya na. 6 Yɛlimi nɛ o ye, ‘Win na pɛligi fʋ zug! Wina'am mɛ na yaligi fʋ zak nɛ fʋ mɔrim wʋsa! 7 Tɔ, di nwɛnɛ m wʋm ye fʋ kiesidi fʋ pɛ'ɛs kɔnbid, ka fʋ kɔnbkemnibi daa bɛ nɛ ti la, ti daa pʋ maannɛ ba bɛ'ɛdɛ. Ka saŋa kanɛ ka ba daa bɛ Kaamel la wʋsa ba si'el pʋ bɔdigɛ. 8 Bu'osimi fʋ yammis la ka ba na yɛlif sida. Alazugɔ gɔsim maal si'eli tisim dasam nwa, lin maal sʋ'ʋm sia'ali ya dabisir daar la. M bɛlimnɛ, tisimi ti fʋn mɔr si'el wʋsa.’ ”
9 David nidib la paae la, ba yɛl Nabal labaar linɛ yi David san'an na. Ka yʋ'ʋn gu'usid. 10 Ka o bu'os yammis la ye, “David kaŋa aan anɔ'ɔnɛ? Anɔ'ɔnɛ an Jese bikaŋa? Nannanna yammis pamm yʋ'ʋn zɔtnɛ ka basidi ba zugdaannam. 11 Bɔ ka m nɔkidi m diib nɛ ku'om nɛ m ni'im kanɛ ka m kʋ ye m tis banɛ kiesi m pɛ'ɛs kɔnbid la tisid nimbanɛ ka sɔ' zi' ban yi zin'isi'a na?” 12 David nidib la da fɛndigi lɛb. Ba da paae yɛl David on pian' si'el wʋsa. 13 Ka David lɛbisi yɛli ba ye, “Zaŋiminɛ ya zaba sʋ'ʋs!” Ka ba zaŋi zaba sʋ'ʋs ka David mɛ zaŋ o din. Dap la da paae kɔbisnaasi dɔl David n keŋ, ka kɔbisyi' kpɛlim gur la'ad la.
14 Nabal yammis la yinne da yɛl Abigel o zugdaan pu'a la ye, “David tʋm o nidib ye ba mɔr o pʋ'ʋsʋg na tisi ti zugdaan la, ka o tʋ'ʋsi ba nɛ tʋ'ʋd. 15 La'am nɛ nimbama daa pʋ tʋm bɛ'ɛdi tisi ti la. Ba nan zi' maali ti bɛ'ɛdɛ, tinamɛ da bɛ mɔɔgin kpi'e ba la, ti si'el nan zi' bɔdigɛ. 16 Tinamɛ daa kemmi ti kɔnbid zin'ikanɛ ka ba bɛ la, ba daa nwɛnɛ zaŋguomi giligi ti yʋ'ʋŋ nɛ nintaŋ wʋsa. 17 Nannanna tɛn'ɛsim gɔs fʋn na niŋ si'em ka tɔɔg da paae ti zugdaan la nɛ o yidima. O anɛ nimbɛ'og hali ka sɔ' kʋ nyaŋi pian' tis o.” 18 Abigel da niŋ tɔ'ɔtɔ nɔk bodobodo kɔbisyi', nɛ daam gan'a ayi', nɛ pɛ'ɛs anu banɛ ka ba kʋ m maal sʋ'ʋŋa, ka su kawɛnsɛn'ɛda bɔto anu, nɛ tiwal banɛ ka ba buon rezin walgbila kɔbiga, nɛ kekama walgbila kɔbisyi' la'asi li wʋsa lɔɔ pa'al bʋmis zug. 19 Ka yɛl yammis la ye, “Gaadimi tuon, ka m na dɔlli ya nya'aŋ.” Amaa o da pʋ yɛl o sid Nabal. 20 O da ban'a o bʋŋ la paae zuor teŋsʋk linɛ an bɔn'ɔfalig la, ka David nɛ o nidib la mɛ zuligidi kpa'ad o ka o tʋ'ʋsi ba. 21 David da tɛn'ɛs o sʋʋnrin ye, “Alaa, man daa gur dau kaŋa arezak la sian'arin ka o si'el pʋ bɔdig la wʋsa anɛ zaalim? O nɔknɛ bɛ'ɛdi yɔɔd man tʋʋm sʋŋ la. 22 Tan', bɛog bɛkɛunga anwa win, m ya'a pʋ mɛlis dau kaŋa nɛ o dap la wʋsaa, Wina'am on bu'osim!”
23 Abigel n da nyɛ David la o da sigi o bʋŋ la zug tɔ'ɔtɔ igin David tuon ka su'uni o nindaa teŋin 24 igin o nɔba ni ka yɛl ye, “M zugdaana, kɛl ka taal la bɛ mam zug ma'aa. M bɛlimnɛ, dim suguru ka m pian' tisif. Kɛlisimi fʋ sankpan'as la mɔr si'el ye o yɛl. 25 M zugdaana, li pʋ sʋ'ʋm ye fʋ kɛlis Nabal onɛ an nimbɛ'og la pian'adɛ. O anɛ wʋʋ o yʋ'ʋr la yɛl si'em la. O yʋ'ʋr la gbin anɛ ‘Gɛdʋg’, ka o sid tʋm wʋʋ gɛdʋg nɛ. Hali mam pʋn pʋ nyɛ nimbanɛ ka fʋ tʋm la naa, m zugdaana. 26 M zugdaana, m mi' ye ti Zugsɔb Wina'am la gu'uf ka fʋ pʋ yis ziim ka mɛ pʋ yɔ bɛ'ɛdi lɛbis nɛ fʋ mɛŋ nu'usɛ. Nɛ Wina'am paŋ, kɛl ka fʋ dataas, nɛ banɛ mɔɔd ye ba san'amif la ba'as wʋʋ Nabal nɛ. 27 Piini nwana ka m mɔr na ye m tis fʋn nɛ banɛ dɔllif la wʋsa, m zugdaana. 28 M bɛlimnɛ kɛlli m taali bas, ka m anɛ fʋ sankpan'as asida sida. Zugsɔb la na kɛ ka fʋ sʋ'ʋlim yalig ka yuug, bɔzugɔ fʋ zabidnɛ Zugsɔb la mɛŋ zaba, m zugdaana. Da kɛ ka sɔ' nyɛ yɛlbɛ'ɛdi fʋ nii, hali nɛ fʋ nyɔvʋr bɛnnɛ. 29 M zugdaana, la'am nɛ sɔ' duoe zi'e ye o yisi fʋ nyɔvʋr la, fʋ nyɔvʋr su'anɛ Zugsɔb Wina'am nu'usin. Amaa fʋ dataas la nyɔvʋr na yii keŋ lu nwɛnɛ ban yuligid kugiri yisid luobʋgʋn si'em la. 30 M zugdaana, Zugsɔb la ya'a ti tʋm tisif wʋʋ on kaanb si'em la, o na gaŋif ka fʋ an Israel tuongat. 31 M zugdaana, da lɛm mɔri li fʋ sʋnfʋn ye fʋ yis ziim bɛɛ yɔ bɛ'ɛd san'ami fʋ mɛŋa. Ka Zugsɔb la ya'a tisif nyaŋir fʋn tiɛnmi m yɛla ka da tam.”
32 Ka David yɛl Abigel ye, “Na'asi anɛ Zugsɔb onɛ an Israel Wina'am la din! Onɛ tʋmif zina ye fʋ kena sia'alim. 33 Albareka anɛ fʋ din, fʋn mɔr ya'am si'em la zug. Fʋ gu'um ka m pʋ yis ziim zinaa ka mɛ pʋ yɔ bɛ'ɛd sam nɛ m mɛŋ nu'ugɔ. 34 Li ya'a ka' Zugsɔb onɛ an Israel Wina'am la vʋe ka gu'um la zugɔ, m naan san'amini ya. Fʋ ya'a pʋ kɛɛn tɔ'ɔtɔ na sia'alini ma, Nabal nɛ o tʋmtʋm la baa yinne kʋ vʋe bɛog bɛkɛunga nwa winnɛ.” 35 Ka David siaki di'e la'abanɛ ka o mɔr la wʋsa ka yɛl o ye, “Lɛm kul nɛ sumbʋgʋsʋm. M wʋmi fʋ pian'ad la, ka siaki fʋ sɔsʋg la.”
36 Abigel da lɛbi paae nyɛ ka Nabal buol nidibi la'as ka maal diib ka ba dit ka nuud nwɛnɛ o anɛ na'ab nɛ. O sʋnf daa malis nɛ hali ka o nuu kʋʋl. Alazug Abigel da pʋ yɛl o si'ela, hali ka bɛog ti nie. 37 Bɛogʋ da nie ka Nabal nini yʋ'ʋn pilig la, ka o pu'a yɛl o si'el wʋsa, ka o sʋnf san'am ka o ga'aŋ wʋʋ kugir nɛ. 38 Di dabpiiga nya'aŋ la, Zugsɔb la da nwɛ' Nabal ka o kpi. 39 David n da wʋm ye Nabal kpiya la, o da yɛl ye, “Zugsɔb la yʋ'ʋr paam dʋ'ʋsʋg, onɛ kɛ ka m pʋ zab nɛ Nabal la'am nɛ on maal linɛ pʋ malis la! O gu'oe mam o sankpan'as la ka m pʋ tʋm bɛ'ɛdɛ, ka lɛɛ kɛ ka Nabal mɛŋ tʋʋmbɛ'ɛd sigi o mɛŋ zugin na.” David da tʋm Abigel san'an yɛl o ye o bɔɔd ye o lɛbig o pu'a. 40 O yammis la da keŋ Kaamel n yɛl Abigel ye, “David tʋmmi ti fʋ san'an na, ye ti mɔrif na ka fʋ lɛbig o pu'a.” 41 O da su'uni o nindaa teŋin ka ye, “Mam anɛ ya tʋmtʋm pu'ak, ka ti'eb ye m tʋm tisi ya, hali ka pie yanam banɛ an m zugdaan la yammis la nɔba.” 42 Abigel da duoe tɔ'ɔtɔ ti'ebi ban' bʋŋ, ka o zak bipumis anu dɔl o, ka ban nɛ ban tʋm ninsieba la dɔl taaba keŋ David san'an ka o lieb o pu'a.