David zan'as Saul kʋʋb
24
1 Saul n da kad Filistia dim la naae ka lɛb na la, ba da yɛl o ye, “David bɛ En-Gedi sian'arin.” 2 Dinzug Saul da gaans dap tusa atan' yi Israel sʋ'ʋlim wʋsa ni ka ba yii ieed David nɛ o nidib la kpi'e zin'ikanɛ ka ba buon ye, Wɛog Bʋʋs Tampiins la. 3 O da paae kɔnbid dɔɔd banɛ kpi'e suor baba ka tampinyɔk bɛɛ ani ka kpɛn' ye o nyɛ' bin; zi' ka David nɛ o nidib la pʋn dɛŋin kpɛn' tampinyɔkin la bɛ pʋʋgin-pʋʋgin sa. 4 Ka David dap la yɛl ye, “Dabis bamanam buudi la ka Zugsɔb la da pian' tisif ye, ‘M na nɔki fʋ dataas la niŋi fʋ nu'usin, ka fʋ maali ba fʋn bɔɔd si'em.’ ” Ka David duoe baanlimm ka Saul pʋ baŋɛ, ka o nwaae Saul fuug nɔɔr. 5 Lin nya'aŋ, David sʋnf da san'am nɛ, on nwaae fuug la nɔɔr la, 6 ka o yɛl o nidib ye, “Wina'am na yis ka m tʋm tʋʋm kaŋa tisim zugdaan onɛ ka Zugsɔb gaŋ o ka bu'oe malʋŋ kpaam niŋ o zugin la, bɛɛ ʋki m nu'ugʋ ties oo; on an onɛ ka Zugsɔb la gaŋ la zug.” 7 David da nɔk nɛ pian'abama diin o nidib la ka ba pʋ zab nɛ Saul. Ka Saul ti yi tampinyɔkin la gaad. 8 Ka David mɛ yi naa buol Saul ye, “M zugdaan Na'aba!” Ka Saul gi'e, ka David su'un nɛ o nindaa teŋin 9 ka yɛl o ye, “Bɔɔ kɛ ka fʋ kɛlisid nimbanɛ ma'adif ye David bɔɔdi fʋ bɔɔb la? 10 Zina fʋ mɛŋ nyɛ Zugsɔb la nɔki fʋ niŋi m nu'usin tampinyɔk la pʋʋgin si'em. Sieba muk nɛ ye m kʋʋmif ka m zan'as; m yɛli ba ye, ‘Mam kʋ ʋki m nu'ugʋ si'isi m zugdaana, bɔzugɔ o anɛ onɛ ka Zugsɔb la gaŋ ka bu'oe malʋŋ kpaam niŋ o zugin.’ 11 Gɔsima, m Saamma, fʋ fuug nɔɔri nwa ka m zanli m nu'ugin! M nwaae li nɛ yis ka lɛɛ pʋ kʋʋ fɔ. Nannanna tɛn'ɛsim ka baŋ ye mam pʋ gban'e bɛ'ɛdɛ ka mɛ ka' onɛ na yii fʋ nya'aŋa. Mam pʋ tʋm taal si'a tisi fɔ, amaa fʋ ieedim nɛ ye fʋ kʋʋ m. 12 Zugsɔb la na yɔ taal kanɛ ka fʋ tʋm tis mam la, amaa man nu'ug kʋ si'isi fɔ. 13 Wʋʋ kpɛɛmnam mɔri ba yɛlsim ye, ‘Tʋʋmbɛ'ɛd dim san'an ka bɛ'ɛd tʋmid.’ Alazugɔ man nu'ug kʋ si'isi fɔ. 14 Mam aan anɔ'ɔn ka Israel dim na'ab la yina kati ma? Man kanɛ nwɛnɛ bakpiilʋŋ bɛɛ silinsauk laa? 15 Zugsɔb la na kad mam nɛ fʋn saria, ka tɛk onɛ ka' bʋʋd la tʋbir. O mɛŋ na niŋ dinɛ nari tis mam, ka faanmi yisi fʋ nu'ugin.” 16 David n da yɛl nɛ' naae la, ka Saul bu'os ye, “Fʋ kʋkɔri laa, m biig David?” Ka kum agɔla gɔla. 17 Ka yɛl o ye, “Fʋ mɔr pʋpielim gaad mam, fʋ maal mam sʋ'ʋŋa, ka mam lɛɛ maalif bɛ'ɛd. 18 Fʋ yɛlim nannanna tʋʋm sʋŋ kanɛ ka fʋ tʋm tis mam; Zugsɔb la nɔkimi niŋi fʋ nu'ugin, amaa fʋ pʋ kʋʋ ma. 19 Nid ya'a paami o dataa, o na bas o ka o gaad yɔlim nɛɛ? Zugsɔb la na yɔɔf sʋ'ʋŋa fʋn maal sʋ'ʋm si'a tis mam zina la. 20 M mi' ye fʋ sid na lieb Israel na'ab, ka sʋ'ʋlim la na paam yaligiri fʋ nu'usin. 21 Nannanna pɔɔm nɛ Zugsɔb la yʋ'ʋr ye fʋ kʋ kɛnsigi m yaas tuŋ, bɛɛ yisi m yʋ'ʋri m yidiminɛ.” 22 David da pɔɔ tis Saul. Ka Saul lɛbi kul amaa David nɛ o nidib la da duoe paae zin'ikpi'euŋ la.