David zabi faaɛn Kiela dim
23
1 Ba da yɛl David ye, “Gɔsima, Filistia dim la zabid nɛ Kiela teŋ ka faandi ba ki zieŋin la.” 2 O da keŋ Zugsɔb la tuonnɛ bu'os o ye, “M kem zab nɛ Filistia dim la faaɛn Kiela dim laa?” Ka Zugsɔb la lɛbis ye, “Kem zab nɛ ba ka faaɛn ba.” 3 Amaa David nidib la da yɛl o ye, “Hali Juda teŋin kpɛla nwa tinam zɔti dabiem, li yʋ'ʋn na an wala ti ya'a keŋ Kiela ye ti zab nɛ Filistia zabzabidib la?” 4 Ka David lɛn lɛb Zugsɔb la san'an ya'as ye o bu'os o, ka Zugsɔb la lɛbis o ye, “Kemi, ka m na kɛ ka fʋ nyaŋ Filistia dim la.” 5 Alazug David nɛ o nidib la da keŋ Kiela teŋin zab nɛ Filistia dim la nyaŋi ba ka faaɛn ba bʋnkɔnbid wʋsa gaad. Ala ka David da faaɛn Kiela teŋ dim la. 6 (Abiata onɛ an Ahimelek biig la da zɔɔ keŋ David san'an Kiela teŋin la, o da mɔr maanmaan dansik la na tis o.)Saul kat David ye o kʋ
7 Ba da yɛl Saul ye David kpɛn' Kiela teŋin la, ka o yɛl ye, “Wina'am gban'e o tisim, bɔzugɔ o kpɛn'ɛsi o mɛŋ sanrega, on kpɛn' teŋ kanɛ mɔr zaŋguoma nɛ li kʋlʋŋ kpi'ema la.” 8 Saul da buol o zabzabidib la wʋsa la'as ye ba keŋ zab, ka ye ba kem Kiela n gu' David nɛ o nidib la. 9 David n da baŋ ye Saul gban'adi gban'abɛ'ɛd o yɛla la, o yɛl Abiata onɛ an maanmaan la ye, “Mɔr dansik la na!” 10 Ka David bu'os ye, “Ti Zugsɔb onɛ an Israel Wina'am, man onɛ aan fʋ sankpan'as la wʋm ya nyain ye Saul gban'e nɛ ye o kena san'am Kiela mam zug. 11 Kiela teŋ dim na gban'ami tis oo? Saul na kena wʋʋ man wʋm si'em laa? M Zugsɔba, fʋn onɛ an Israel Wina'am la, gandigim ka pa'alim.” Ka Zugsɔb la lɛbis o ye, “O na kena.” 12 Ka David lɛm bu'os ye, “Kiela teŋ dim la na gban'e mam nɛ m nidib la tis Saul bɛɛ?” Ka Zugsɔb la lɛbis o ye, “Ba na niŋ ala.” 13 Alazug David nɛ o nimbanɛ kalli an wʋʋ kɔbis yuobʋ la da yi Kiela kpɛn ken zin'is kɔn'ɔb-kɔn'ɔb. Saul n da wʋm ye David yi Kiela la, o da pʋ lɛn keŋ ani ya'asɛ. 14 David da su'a bɛ Zif teŋ sian'arin la, nɛ kʋkʋna la ni. Daar wʋsa Saul da ieed o nɛ, amaa Wina'am da pʋ kɛ ka Saul nyɛɛ o.
15 David n da nam bɛ Hores linɛ bɛ Zif sian'arin la, o da wʋm ye Saul yina mɔɔd ye o kʋʋ o. 16 Saul biig Jonatan da keŋ David san'an Hores ye o kpɛmis o yadda Wina'am san'an. 17 O yɛl o ye, “Da zɔt dabiem. M saam Saul kʋ nyaŋi niŋif si'ela. Asɛɛ fʋ ba'asi lieb Israel Na'ab, ka man tia'ali fʋ zug. Hali m saam mɛŋ mi' ye li anɛ ala.” 18 Babayi' la da pɔya ka naal taaba nɔɔr Zugsɔb la tuon. Ka Jonatan lɛbi kul yin, amaa David da kpɛlim Hores.
19 Zif dim la da keŋ Saul san'an Gibea teŋin yɛl o ye, “Fʋ zi' ye David su'a nɛ tinam san'anɛ? Ɛɛn! O bɛ Hores sian'anr sʋʋgin la, Hakila kʋkʋnin la, lɛbisid dagɔbʋg baba Jesimon teŋin la. 20 Nannanna, Na'aba, kem fʋn bɔɔd saŋa si'a wʋsa na ka li anɛ tinam tʋʋm ye ti gban'e o tisif.” 21 Ka Saul lɛbisi ba ye, “Zugsɔb la na niŋi ya zug bareka, ya ba'a bɛ nɛ mam la zug. 22 Lɛm maligim vɛɛnsi baŋi on bɛ zin'isi'a nɛ onɛ nyɛɛ o la. Ka ba yɛlim ye o anɛ bibia hali. 23 Mɔɔmi ka baŋ o suak zin'ibanɛ ka o mɔr la wʋsa, ka lɛbi na tisim labaar kanɛ an viki. Ka m dɔlli ya ka ti keŋ iee o. Hali baa ti ya'a na iee o Juda sʋ'ʋlim la wʋsa ka paam o gban'e, ti na niŋ ala.”
24 Dinzug ba da yii gaad Saul tuonnɛ keŋ Zif. Saŋkan la David nɛ o nidib la da keŋ Maon sian'arin linɛ bɛ Araba lɛbisid Jesimon teŋ dagɔbʋg la. 25 Saul nɛ o nidib la da pin'il ieeb. David n da wʋm la, o keŋ nɛ Maon sian'arin kpɛn' tampinsi'a lɛuŋʋn su'a. Ka Saul wʋm ka keŋ Maon sian'arin la ieed David. 26 Saul da dɔlisid nɛ zuor la lʋgir yinne, ka David nɛ o nidib la mɛ dɔl lʋgkaŋa la, mɔɔd ye ba niŋ tɔ'ɔtɔ zɔ ka bas Saul bɔzugɔ, Saul nɛ o nidib la da mirid David nɛ o nidib la ye ba gban'e ba. 27 Ka ninsɔ' mɔr labaar na yɛl Saul ye, “Kem tɔ'ɔtɔ na! Filistia dim la kena bɔɔdi zabi faaɛn teŋ la.” 28 Ka Saul bas David kadib ka keŋ ye o tʋ'ʋs Filistia dim la. Linzugʋ kɛ ka ba buon zin'ikan la ye Sela-Hammalekof. 29 Ka David yii anina keŋ zin'ikpi'euŋ dinɛ bɛ En-Gedi la.