David bɛ Adullam nɛ Misipa
22
1 David da bas Gaf ka zɔɔ keŋ Adullam teŋinɛ su'a tampinyɔkin. O bieyanam nɛ o sizuop nɛ o saam nidib la da wʋmi li la, ba da keŋ o san'an. 2 Banɛ wʋsa da mɔr sʋnsa'aŋ, bɛɛ sama, bɛɛ yɛla la da la'as o san'an. Ka o lɛbigi ba tuongat. Dap nwɛnɛ kɔbisnaasi da bɛɛ o san'an. 3 David da yii ani keŋ Misipa linɛ bɛ Moab sʋ'ʋlimin la, ka yɛl Moab Na'ab ye, “Kɛl ka m ma nɛ m saam kena bɛɛ fʋ san'an hali nɛ man na ti baŋ Zugsɔb la bɔɔd ye o maal si'eli tisim.” 4 Alazug o da basi ba ka ba bɛ Moab Na'ab la san'an, saŋa kan wʋsa ka David bɛɛ o kpi'euŋ zin'ig la. 5 Amaa Gad onɛ an Zugsɔb nɔdi'es la yɛl David ye, “Da bɛ kpi'euŋ zin'igin la, kem Juda teŋin.” Alazug David da yii ani keŋ Heref sian'arin.6 Ka Saul wʋm ye ba nyɛ David nɛ o nidib la, li saŋa la ka o mɔr kpan o nu'ugin, zin' tisi'a linɛ bɛ Gibea kʋkʋn zug la gbinnin, ka o ninkpi'ema la wʋsa gilig o. 7 Ka Saul yɛli ba ye, “Kɛlisimi, Benjamin nidiba! Jese biig la na nyaŋi tisi ya pɔɔd nɛ tibanɛ wan lɔmbɔn'ɔdɛɛ? O na kɛ ka ya lieb soogianam tusir-tusir nɛ kɔbig-kɔbig tuongatiba? 8 Linzug ka ya la'asi su'a gban'e bɛ'ɛd man yɛlaa? Hali ya sɔ' pʋ yɛl mam saŋkan ka m biig la maal nɔnaar nɛ Jese biig la. Ya'a an sida, ya ba'a kae nɛ mam, ka ya nid baa yinne pʋ tɛn'ɛsi yɛlim ye m biig la naal nɛ man sankpan'as ka ba ieed mam suoya wʋʋ on niŋ si'em zina laa.” 9 Ka Doyig onɛ an Edom buudi dau la da zi'e nɛ Saul kpi'emnam la, ka yɛl ye, “Man nyɛ Jese biig la ka o keŋ Ahimelek san'an, onɛ an Ahitub biig ka bɛ Nob teŋin la. 10 Ahimelek bu'os Zugsɔb la lin nar ye David tʋm si'em. Ka mɛ tis o diib, nɛ Goliyaf onɛ an Filistia nid la zaba sʋ'ʋg.” 11 Na'ab la da tʋm buol maanmaan Ahimelek onɛ an Ahitub biig la nɛ o saam yidim wʋsa banɛ daa an maanmaannibi bɛ Nob teŋin la, ka ba kena. 12 Saul yɛl ye, “Fʋn kanɛ an Ahitub biiga, kɛlisim!” Ka o siak ye, “Naa, m zugdaana!” 13 Ka Saul yɛl o ye, “Bɔ ka fʋn nɛ Jese biig la su'a gban'e gban'abɛ'ɛdi m yɛla, ka fʋ tis o bodobodo nɛ sʋ'ʋg, ka bu'os Zugsɔb la tis o? Ka li kɛ ka o zana'si m nɔɔr ka yʋ'ʋn digi pigidim anwa?” 14 Ka Ahimelek lɛbis o ye, “Naa, fʋ yammis la wʋsa ni, anɔ'ɔnɛ an sida sɔb wʋʋ David onɛ aan fʋ diem la? Ka' o anɛ banɛ gurif la tuongat, ka fʋ yidim tisid o girima hali? 15 Nɛ'ɛŋa an yiiga ka mam bu'os Wina'am tis oo? Ayei! Na'aba, da mɔr pʋtɛn'ɛbɛ'ɛd nɛ man kanɛ aan fʋ sankpan'as la, bɛɛ m saam yidima, ka mam zi' yɛlbanɛ maan la yɛla baa bi'elaa.” 16 Amaa Na'ab la daa lɛbisi yɛl o ye, “Ahimelek, li anɛ tilas ye fʋ kpi, fʋn nɛ fʋ saam yidim la wʋsa.” 17 Ka Na'ab la yɛlbanɛ gur o ka zi'e kpi'e o la ye, “Fɛndigim kʋʋe Zugsɔb maanmaannib la, ka ba mɛ niŋ nɛ nɔɔr yinne nɛ David. Ba daa mi' ye o zɔtnɛ yit man san'an, ka pʋ yɛli ma.” Amaa o kpi'emnam la daa pʋ siak ye ba si'is Zugsɔb maanmaannib la. 18 Na'ab la da yɛl Doyig ye, “Alaa fʋn fɛndigim nwɛ' maanmaannib la kʋ.” Doyig onɛ an Edom dau la da fɛndigi nwɛ' baa kʋ. Daakan la o kʋ dap pisnii nɛ anu banɛ da yɛ maanmaannib dansikanam la. 19 O mɛ da san'am Nob linɛ an maanmaannib teŋ la, nɛ dap nɛ pu'ab nɛ biis nɛ bilies nɛ niigi nɛ bʋmis nɛ pɛ'ɛs. 20 Amaa Abiata onɛ an Ahimelek biig la da nyaŋi su'a zɔɔ keŋ David san'an. 21 O da yɛl David ye Saul kʋ Zugsɔb maanmaannib la. 22 Ka David yɛl Abiata ye, “M daa nyɛ Doyig onɛ an Edom dau la anina ka pʋn baŋ ye o na yɛl Saul. Man zug ka ba kʋʋ fʋ saam yidim la wʋsa! 23 Kpɛlim kpɛla nɛ man; da zɔt dabiem; dau kanɛ ieedi fʋ nyɔvʋr la mɛ ieednɛ man din mɛn. Fʋ na paam yɔlisim mam san'an.”