David bɛ Nob
21
1 David da keŋ Nob, Ahimelek onɛ an maanmaan la san'an. Dabiem da kpɛn' Ahimelek on nyɛɛ o ka o aan o kɔn'ɔkɔn' la, ka o bu'os o ye, “Bɔɔ kɛ ka fʋ kennɛ fʋ kɔn'ɔkɔn'? Bɔɔ kɛ ka sɔ' pʋ dɔlli fɔ?” 2 Ka David lɛbisi yɛl Ahimelek onɛ an maanmaan la ye, “Na'abi tisim tʋʋm si'a ka yɛlim ye, ‘Li pʋ sʋ'ʋm ye sɔ' baŋi fʋ ken la gbin nɛ man yɛlif ye fʋ maal si'ela.’ Ya'a kpɛlim nɛ man nidib la m yɛli ba ban na sia'alim zin'isi'a. 3 Nannanna, dibɔ ka fʋ mɔri fʋ nu'uginɛ? Tisimim bodobodo gbila anu, bɛɛ fʋn nyɛ si'el wʋsa.” 4 Amaa maanmaan kpɛɛm la lɛbisi yɛl David ye, “Mam pʋ mɔr bodobodo zaal kpɛla, m mɔri bodobodo kanɛ an Zugsɔb la din. Fʋn nɛ fʋ nidib la ya'a sa pʋ digin nɛ pu'aba, ya na tun'e ɔnbi li.” 5 Ka David lɛbis ye, “Da kɛ ka li paki fɔ; hali ti ya'a ken, ken kanɛ pʋ tɛbisa ti pʋ li'en pu'aba, ka li kɛ ka ti an kasi. Ka kɛl dabiskaŋa an nimmua dabisirɛ. Nidib la anɛ kasi.” 6 Ka maanmaan kpɛɛm la nɔk bodobodo linɛ an Wina'am din la tis o, bodobodo si'a da lɛn kae anii asɛɛ linɛ ka ba digil Zugsɔb tuon la ma'aa, ka ba yis ka lɛdig bodobodo tʋʋl daakan la. 7 Saul yammis yinne da bɛɛ ani daakan la, ka ba gban'e o zin'il Zugsɔb la tuon. O da anɛ Doyig onɛ an Edom buudi la nid, ka an Saul kɔnbkemnib la kpɛɛm. 8 David bu'os Ahimelek ye, “Fʋ pʋ mɔr kpan bɛɛ zaba sʋ'ʋg kpɛlaa? M pʋ mɔri m sʋ'ʋg bɛɛ zaba lauk si'a naa, bɔzugɔ Na'ab la titʋmis la anɛ gbirigir.” 9 Ka maanmaan la lɛbis ye, “Goliyaf onɛ an Filistia nid, ka fʋ daa kʋʋ o Ela bɔn'ɔgin la, o sʋ'ʋg la bɛ kpɛla ka ba kpilim nɛ fuug ka li bɛ dansik la nya'aŋ. Fʋ ya'a bɔɔdaa fʋn nɔkimi li, ka sʋ'ʋg lɛn kae kpɛla ya'a ka' linɛ.” Ka David lɛbis ye, “Sʋ'ʋg lɛn kae nwɛnɛ lii, nɔkim tisim na!”David bɛ Gaf
10 Daakan la David da zɔɔ yi Saul san'anɛ keŋ Akis onɛ an Gaf na'ab la san'an. 11 Amaa Akis yammis la da bu'os ye, “Ka' David n nwaa, ka' onɛ aan o teŋ na'ab laa? Ka' on ka ba mɔri yʋ'ʋm ka wa'ad laa? Ba yɛt ye, ‘Saul kʋ tusir, ka David kʋ tusa piiga’ ” 12 Nɛ' da iank David ya'am ka o pin'ili zɔt Akis onɛ an Gaf na'ab la dabiem. 13 O da ma'anɛ maal o mɛŋ wʋʋ o zugʋ fɛndignɛ ba tuon; ka on bɛɛ ba nu'usin la zug o niŋidi nwɛnɛ gɛɛŋ nɛ, ka mɔr si'elnamɛ bɔɔnd za'anɔɔr dalamma la zug ka kɛ ka nintɔɔnd sɔnnɛ dɔlisidi o tieŋi sigid teŋin. 14 Akis bu'os o yammis la ye, “Gɔsim dau la! O anɛ gɛɛŋ! Bɔ ka ya zii o kɛɛn m san'an na? 15 Man kɔ'ɔŋ nɛ gɛɛmis ka ya ziid oŋa ken kpɛla na ka o niŋid nɛ'ɛnamɛ m tuonnɛɛ? Li anɛ tilas ye dau kaŋa kpɛn' m yin naa?”