David nɛ Jonatan yɛla
20
1 David da zɔɔ yi Nayof Rama sʋ'ʋlim keŋ Jonatan san'an bu'os o ye, “M maal bɔ? Tʋʋmbɛ'ɛd bɔ ka m tʋm? M tʋmi fʋ saam tʋʋmbɛ'ɛd bɔ kimm ka o mɔɔd ye o yisi m nyɔvʋrɛ?” 2 Ka Jonatan lɛbisi yɛl o ye, “Ayei, fʋ kʋ kpii! Gɔsima m saam nan zi' tʋm si'el ka li an bʋntita'ar bɛɛ bʋmbil ka pʋ nwɛ' mam sɔɔraa. O na niŋ walaa su'a mam nɛ'? Li ka' ala!” 3 Amaa David da pɔya ka yɛl ye, “Fʋ saam mi' ye fʋ pʋ di'em mam yɛlaa, alazug o gban'anɛ o sʋʋnrin ye, ‘M kʋ kɛ ka Jonatan baŋ nɛ', ka li na daam o.’ Amaa nɛ Zugsɔb kanɛ vʋe la yʋ'ʋr zug, nɛ man nɛ fʋnɛ zi'e kpɛla la, li kpɛlimnɛ fiin nɛ man naan kpiin.” 4 Jonatan yɛl David ye, “Fʋn bɔɔd ye m tʋm si'el wʋsa tisif, m na tʋm.” 5 Ka David lɛbis ye, “Gɔsima, bɛogʋ an nwadpaalig di'ema, ka li sʋ'ʋm ye man nɛ na'ab la la'am di; amaa kɛl ka m keŋ su'a pɔɔgin la ka dabisir la gaadi yi bɛogʋn ka zaam ma'ae. 6 Fʋ saam ya'a pʋ nyɛɛ ma, fʋn on yɛl o ye, David sɔsnɛ suor man san'an ye o niŋ tɔ'ɔtɔ keŋ Betilehem o mɛŋ teŋin, ka ba tuŋ la mɔri yʋʋm-yʋʋm maan. 7 O ya'a yɛl ye li an sʋm alaa, mam onɛ aan fʋ sankpan'as la paam yɔlisim. Amaa o sʋnf ya'a duoe, fʋn baŋim ye o gban'anɛ ye o mugusim. 8 Maalim sʋ'ʋm tis mam onɛ aan fʋ sankpan'as la, bɔzugɔ fʋ da kɛ ka ti naal nɔɔri lieb yinne Zugsɔb la tuon. M ya'a tʋm taal, fʋ mɛŋ kʋʋmim! Bɔ ka fʋ na zaŋimi tisi fʋ saam la?” 9 Ka Jonatan lɛbis ye, “Ayei! Mam ya'a mi'in ye m saam mɔɔdnɛ ye o san'amif, m naan kʋ yɛli nɛ fɔɔ?” 10 David bu'os o ye, “Anɔ'ɔnɛ ye o yɛl mam, ka fʋ saam ya'a lɛbisidi fʋ pian'ad ka li anɛ nyinyiug ma'aanɛ?” 11 Jonatan yɛl o ye, “Kem na! Kɛl ka ti yii keŋ pɔɔgin la.” Ka babayi' la da dɔl taaba yi.12 Jonatan da yɛl David ye, “Mam pɔ nɛ Zugsɔb onɛ an Israel Wina'am la ye daar anwa win, m na pian' tisim saam, ka li ya'a malis o ye fʋ lɛb na, m na tɔlim labaar na ka fʋ wʋm. 13 Amaa o ya'a gban'anɛ ye o san'amif Zugsɔb la on kɛl ka li wʋm mam sʋ'ʋŋa m ya'a pʋ kɛ ka fʋ baŋ ka mɔri fʋ yi nɛ laafii. Zugsɔb la na bɛ nɛf wʋʋ on da bɛnɛ m saam si'em la. 14 Amaa piemi fʋ pʋʋgʋ yɛlim sida nwɛnɛ Zugsɔb la m nyɔvʋr bɛn wʋsa, ka ba kʋ kʋʋma. 15 Mɛ da kɛ ka fʋ zuod la naae nɛ man yidima hali baa Zugsɔb la ya'a ti yis David dataas wʋsa dunia kaŋa ni.” 16 Alazug Jonatan da maal nɔnaar nɛ David yidim ka kaanbi yɛl ye, “Zugsɔb la na bu'os David dataas bu'osa.” 17 Jonatan da kɛ ka David maligim tɛndigi o kaanbʋg la pa'an on nɔŋ o si'em, bɔzugɔ o nɔŋ o wʋʋ on nɔŋ o mɛŋ si'em la. 18 Ka Jonatan yɛl David ye, “Bɛog anɛ nwadpaalig di'ema; fʋ ka'alim la na pak bɔzugɔ fʋ zin'isir la na dig zaalim. 19 Di'ema la yimbɛogʋ zaŋi ken zaam la, yim keŋ zin'ikanɛ ka fʋ daa dɛŋi su'a yɛl kaŋa daa pin'il la, zi'enɛ kpi'en Ezel kugir la. 20 M na tɔn piema atan' ani baba, ka li nwɛnɛ m nyɛnɛ si'el ka tɔɔnd nɛ. 21 M na tʋm biig ka yɛl o ye, ‘Kem iee piema la na!’ M ya'a yɛl o ye, ‘Gɔsima, piema la kpi'enɛ fʋn zi'e zin'isi'a la, pi'isimi baa mɔr kpɛla na’, fʋn kem na ka Zugsɔb kanɛ vʋe la yʋ'ʋr zug, fʋ nyɛ yɔlisim; dabiem kae. 22 Amaa m ya'a yɛl biig la ye, ‘Gɔsima, piema la digi fʋ tuon la!’ Li anɛ tilas ye fʋ gaad, bɔzugɔ li pa'al ye fʋ gaadim. 23 Yɛl kanɛ ka fʋn nɛ mam pian' li yɛla la tiɛnm, ka Zugsɔb la aan ti kasɛt saŋa linɛ ka' naarɛ.”
24 David sid da su'a pɔɔgin la, ka nwadpaal di'ema la da paae la, Na'ab la da zin' ye o di. 25 O da zin'inɛ on ɛɛn zin' zin'isi'a saŋa wʋsa kpi'e dɔkpin la kpa' Jonatan, ka Abner tia'al Saul, amaa David zin'ig la da anɛ zaalim. 26 Saul da pʋ yɛl si'el daakanɛ, bɔzugɔ o da tɛn'ɛsi ye, “Daasi'erɛɛ si'eli kɛ ka David kae nyain nɛ ka li kɛ ka o pʋ kɛn malʋŋ la naa. Asida o ka' nyain nɛ.” 27 Amaa bɛogʋ da nie la, nwadig la dabisa ayi' daar, David zin'ig la da anɛ zaalim ya'as. Ka Saul bu'os o biig Jonatan ye, “Bɔɔ kɛ ka Jese biig la pʋ kenaa di su'os nɛ zina wʋsa?” 28 Ka Jonatan lɛbis ye, “David sɔsnɛ suor man san'an ye o keŋ Betilehem. 29 O yɛl ye, ‘Kɛl ka m keŋ, bɔzugɔ ti yidim mɔri maan ye ba maal, ka m bier ye li anɛ tilas ye m bɛɛ ani. Man ya'a sid an onɛ ka fʋ nɔŋim, fʋn on kɛl ka m keŋ nyɛɛ ba.’ Linɛ kɛ ka o pʋ nyaŋi kena zin'in nɛ fʋ di la.” 30 Saul sʋnf da duoe nɛ Jonatan hali, ka o yɛl o ye, “Fʋn kanɛ an pu'a kanɛ ki'isid ka tʋm linɛ ka' sʋ'ʋm biiga! Fʋ tɛn'ɛs ye m zi' ye fʋ niŋ nɛ nɔɔr yinne nɛ Jese biig la? Fʋ zi' ye li anɛ nyannɛ tis fʋn nɛ fʋ ma kanɛ du'af laa? 31 Jese biig la nam bɛ dunia la, fʋn nɛ fʋ sʋ'ʋlim la wʋsa kʋ zi'enɛ. Nannanna tʋm ka ba mɔr o na, ka asɛɛ o kpi!” 32 Ka Jonatan lɛbisi bu'os o saam ye, “Bɔzugʋ kɛ ka li nar ye o kpi? O maal bɔ?” 33 Ka Saul tɔn Jonatan nɛ kpan ye o kʋʋ o. Ani ka Jonatan baŋ ye o saam gban'anɛ ye o kʋ David.
34 Jonatan da duoe kʋk la zug nɛ ɛndʋg; nwadig la dabisa ayi' la daar la o da pʋ dii, bɔzugɔ o sʋnf da san'am nɛ, nɛ nyan tʋʋma linɛ ka o saam maan David la. 35 Bɛkɛung Jonatan da yii keŋ pɔɔgin la wʋʋ on nɛ David n pʋn gban'e si'em la. O da ken ka dɔl biribiŋ bil, 36 ka yɛl o ye, “Zɔm keŋ iee piim banɛ ka m tɔn la.” Biig la zɔt la, ka o tɔn piim yinne ka li gaŋ o. 37 Biig la da paae zin'ikanɛ ka Jonatan piema la lu la, ka Jonatan buol o ye, “Piim la pʋ lu nɛ fʋ tuonnɛɛ?” 38 Ka o tans ye, “Niŋim tɔ'ɔtɔ! Kem tɔ'ɔtɔ! Da zi'enɛ!” Ka biig la pi'ig piim la lɛbi o zugdaan la san'an. 39 (Biig la da zi' linɛ maana, amaa Jonatan nɛ David ma'aa da mi'). 40 Jonatan da nɔk o zaba la'ad la tis biig la, ka yɛl o ye, “Ziimi ba lɛb tempʋʋgin la.”
41 Biig la gaad la, David yi dagɔbʋg baba (kugir la zin'igin) kena igin Jonatan tuon nɔɔra atan' ka su'uni o nindaa teŋin. Ka ba kuak taaba ka ba wʋsa kaas, amaa David daa kaas bɛdegʋ gat o tiraan la. 42 Jonatan da yɛl David ye, “Kem nɛ sumbʋgʋsʋm, bɔzugɔ ti pɔɔ tis taaba nɛ Zugsɔb la yʋ'ʋr ye, ti ye ti anɛ zuod. Ka ye, ‘Zugsɔb la an kasɛta sɔb man nɛ fʋ teŋsʋk, fʋ yaas nɛ man yaas saŋa linɛ ka' bɛnnɛ!’ ”
Ka David gaad ka Jonatan lɛb tempʋʋgin la.