Saul bɔɔd ye o kʋ David
19
1 Saul da yɛl Jonatan nɛ banɛ tʋmmi tisid o la wʋsa ye, ba kʋʋm David. Amaa Jonatan da nɔŋ David nɛ hali. 2 Jonatan da sa'al o ye, “M saam Saul ieedi suor ye o kʋʋf, alazug bɛog bɛkɛung fʋn mid ka fʋ yi paalʋ na; saa bɔɔm zin'isi'a su'a. 3 M na yii zi'enɛ m saam san'an paalʋ kanɛ ka fʋ su'a la baba. M na pian' fʋ yɛla tis o, ka yɛlif on yɛl si'el wʋsa.” 4 Ka Jonatan tu'as David n an sʋm si'em tis o saam Saul, ka yɛl o ye, “Naa, da tʋmi fʋ sankpan'as David bɛ'ɛdɛ, bɔzugɔ o pʋ tʋmif bɛ'ɛdɛ, amaa o lɛɛ tʋmnɛ linɛ an sʋ'ʋm tisif. 5 Bɔzugɔ, o da kuos o nyɔvʋri zab nɛ Filistia dau la kʋʋ o. Zugsɔb la da di nyaŋ tita'ari tis Israel ka fʋ da nyɛɛ li ka mɔr sumalisim. Bɔzug ka fʋ na kʋ dau onɛ ka' taal wʋʋ David ka li gbin kae?” 6 Saul da di'e Jonatan sa'alʋg la ka pɔ ye, “Nɛ Zugsɔb kanɛ vʋe la yʋ'ʋr zugɔɔ, m kʋ kɛ ka ba kʋ David ya'asɛ.” 7 Jonatan da buol David ka yɛl o sɔnsig la ken naae si'em wʋsa. O da zii o kɛn Saul san'an na ka o bɛ nɛ o wʋʋ on daa pʋn bɛnɛ o si'em la. 8 Zaba da lɛn kɔ' ya'as ka David yii zab nɛ Filistia dim la. O da tʋ'ʋsi ba nɛ paŋ hali ka ba gʋ'ʋŋi zɔ ka bas o.9 Amaa sibɛ'ɛd da yi Zugsɔb la san'anɛ kena kpɛn' Saul ka o zin' o yin ka zanl kpan o nu'ugin. David n da nwɛ'ɛd kɔn la, 10 ka Saul da bɔɔd ye o nwɛ' o nɛ kpan la tabil dɔkpin, amaa David da nyaŋi li'iŋ ka Saul nwɛ' kpan la ka li keŋ kpɛn' dɔkpinnin. Yʋ'ʋŋ kan, David da zɔnɛ su'a. 11 Saul da tʋm nidib ye ba keŋ David yinne su'a gur ka bɛog ya'a nie ka ba kʋʋ o. Amaa Mikal, David pu'a la, da sa'al o ye, “Fʋ ya'a pʋ zɔ yʋ'ʋŋa faaɛn fʋ mɛŋa bɛog ya'a nie ba na kʋʋf.” 12 Alazug, Mikal da yis David n tud takoro sigis ka o zɔɔ su'a. 13 Ka Mikal da nɔk bʋnsi'a linɛ nwɛnɛ nid nɛ pa'al David gadʋg la zug, ka pili li nɛ fuug ka vʋns bʋʋg kɔnbidi vili niŋi li zug baba la. 14 Saul n da tʋm nidib la ye ba keŋ gban'e David la, Mikal da yɛl ye, “O bɛn'ɛdnɛ.” 15 Ka Saul lɛn lɛbisi ba ye ba kem nyɛ David mɛŋ ka yɛli ba ye, “Ʋkimini o nɛ gadʋg la wʋsa kɛɛn m san'an na ka m kʋʋ o.” 16 Amaa nidib la da kpɛn' gɔsi nyɛ ka bʋn la pa'ae gadʋg la zug, ka li zug baba la an bʋʋg kɔnbid. 17 Saul da bu'os Mikal ye, “Fʋ niŋ wala ma' mam wala ka kɛ ka m dataa zɔɔ bɔdigɛ?” Ka Mikal lɛbis o ye o yɛlim ye, “Kɛl ka m gaad, ya'a ka' alaa m na kʋʋf.” 18 David n da nyaŋi zɔɔ pɔns la, o da keŋ Samuel san'an Rama teŋin yɛl o Saul n maal o si'el wʋsa. Ka on nɛ Samuel keŋ Nayof n zin'inɛ ani.
19 Saul n daa wʋm labaar ye David bɛ Nayof, Rama sʋ'ʋlim la, 20 o da tʋm nidib ye ba keŋ gban'e o na. Amaa ba da nyɛ nɔdi'esidib ka ba la'as bɛdegʋ di'esid Wina'am pian'adi tisid nidib nwɛnɛ ban ɛɛnti niŋid si'em la, ka Samuel paasi ba aan ba tuongat, ka Wina'am Siig la sig Saul nidib la zugin na ka ba mɛ pin'ili di'esid Wina'am pian'adi tisid nidib la. 21 Ba da keŋ yɛl Saul linɛ maan la, ka o lɛn tʋm nidib bɛdegʋ ya'as. Ka ban mɛ pin'ili di'esid Wina'am pian'ad. Saul da lɛn tʋm nidibi paas nɔɔra atan'. Ka ban mɛ maan wʋʋ nɔdi'esidib la nɛ. 22 Ka Saul mɛ yʋ'ʋn duoe keŋ Rama paae Seku bultita'ar la ni bu'os ye, “Samuel nɛ David bɛ yaanɛ?” Ka ba lɛbis o ye, “Ba bɛnɛ Nayof linɛ bɛ Rama la.” 23 Ka Saul keŋ Nayof linɛ bɛ Rama la. Amaa Wina'am Siig mɛ da sig o zugin na, ka o pin'ili di'esid Wina'am pian'ad hali ti paae Nayof. 24 O da yɛɛsi o fuud ka li Samuel tuonnɛ tansid wʋʋ nɔdi'esidib la. O da dig suokan zug dabiskan nɛ li yʋ'ʋŋ la wʋsa. Linɛ kɛ ka nidib yɛl ye, “Saul mɛ paas nɔdi'esidibin la nɛɛ?”