Saul bɛn'ɛd David fufum
18
1 David nɛ Saul n sɔnsi naae la, ka Jonatan ya'am kpɛn' David ka o nɔŋ o nwɛnɛ o mɛŋ nɛ. 2 Lin da yi daakan la, Saul da kɛ ka David kpɛlim o san'an ka pʋ lɛn kul o saam yin ya'asɛ. 3 Jonatan da naal nɔɔr nɛ David bɔzugɔ o da nɔŋ o nɛ wʋʋ o mɛŋ nɛ. 4 Jonatan da yɛɛg o dansik linɛ ka o yɛ la tis David, nɛ o pʋʋgin fubil hali nɛ o sʋ'ʋg nɛ tiraug nɛ sɛnbidiŋ. 5 Tʋʋm kanɛ wʋsa ka Saul da ɛɛn tis David ye o tʋm, o da tʋmmi li nɛ sʋ'ʋŋa hali, linzug da kɛ ka Saul nɔk o diis o soogianam la kpɛɛm yinne. Ka li malis nidib la wʋsa, nɛ Saul mɛŋ kpɛɛmnam la gba.6 David n da kʋ Filistia dau la naae ka nidib la lɛbid yin la, pu'ab da yi Israel tɛɛns la wʋsa ni la'as ye ba tʋ'ʋs Na'ab Saul ka yʋ'ʋm yʋʋma ka wa'ad nɛ sumalisim nɛ siyada nɛ wiis. 7 Ban da wa'ad la ba da yʋ'ʋm nɛ yɛt ye, “Saul kʋ nɛ tusir ka David on kʋ tusa piiga” 8 Saul sʋnf da san'am nɛ hali, ban da yʋ'ʋmmi pɛndigid la ka li daam Saul. Ka o yʋ'ʋn tɛn'ɛsid o sʋʋnrin ye, “Gɔsim ban dʋ'ʋsid David yʋ'ʋr ye o kʋ tusa piiga! Amaa mam kʋ nɛ tusir ma'aa. Bɔɔ yʋ'ʋn kpɛlim, li ka' on na di'e m na'am sʋ'ʋlim laa?” 9 Lin da yi daakan la, Saul yʋ'ʋn da bɛn'ɛd David nɛ fufum.
10 Bɛogʋ da nie la sibɛ'ɛd da yi Wina'am san'an na nɛ paŋi kpɛn' Saul. O da bɛnɛ o yinne tansid ka wa'ad wʋʋ nɔdi'es nɛ, ka David zin' nwɛ'ɛd kɔn la nwɛnɛ on ɛɛnti pʋn nwɛ'ɛd si'em la. Saul mɛ da zanl kpanni o nu'ugin. 11 Ka tɔn nɛ paŋ, ka tɛn'ɛsid ye, “M na vʋdig David n tabil dɔkpin.” Amaa David da nyaŋi li'iŋ nɔɔra ayi'. 12 Saul da zɔt David nɛ, bɔzugɔ Zugsɔb la da bɛ David san'an ka lɛɛ bas Saul. 13 O da kɛ ka David yii o san'an ka diis o soogianam tusir kpɛɛm, ka tisi ba tʋʋm ye ba yii tʋm. 14 On da tʋm tʋʋm si'a wʋsa nyaŋir da bɛnɛ bɔzugɔ Zugsɔb la da bɛɛ o san'an. 15 Saul n da nyɛ ka o nyaŋid si'el wʋsa si'em la, o da maligim zɔt o nɛ hali. 16 Amaa Israel nɛ Juda dim wʋsa da nɔŋ o nɛ hali bɔzugɔ onɛ gati ba tuon ka ba maan si'el wʋsa.
17 Saul da yɛl David ye, “M bipuŋ kpɛɛm Merab nwana, m na nɔk o tisif ka fʋ di. Mɔɔm tʋm tis mam nɛ sʋnkpi'euŋ. Ka zab Zugsɔb la zaba la.” Saul da tɛn'ɛs nɛ ye, “M kʋ nɔki m nu'ugʋ si'is oo. M na kɛ ka Filistia dim la lɛɛ niŋ ala.” 18 Amaa David lɛbisi yɛl Saul ye, “Ka mam aan anɔ'ɔnɛ? M yidim nɛ m saam dɔɔg nidib la wʋsa mɛ aan anɔ'ɔnam ka man ti nar ye m an na'ab diema?” 19 Alazug saŋaa da paae ye ba zaŋ Saul bipuŋ Merab n tis David la, ba da zaŋ o tis Adriel onɛ yi Mehola la.
20 Amaa Saul bipuŋ Mikal ya'am da kpɛn' nɛ David, ka ban da yɛl Saul la, o sʋnf da ma'ae nɛ hali, 21 ka o tɛn'ɛs o sʋʋnrin ye, “M na nɔk o tis o ka o lieb bɛndig linɛ na kɛ ka Filistia dim la kʋʋ o.” Alazug Saul da yɛl David ye, “Nannanna suor yinne lɛn yɔ'ɔg ya'asi tisif ka fʋ na nyaŋi lɛbigi m diem.” 22 Saul da yɛlbanɛ tʋmmi tisid o la ye; “Su'am pian' tisi David o kɔn'ɔkɔn' ye, ‘Gɔsima, na'ab la sʋnf malis nɛf, ka o tʋmtʋmnib la wʋsa mɛ nɔŋi fʋ yɛla dinzug, nannanna, siakim lieb o diem.’ ” 23 Ba da yɛt David nɛ'ɛnam saŋa wʋsa. Amaa David da lɛbis ye, “Ya tɛn'ɛs ye li anɛ na'ana nɛ man na lieb Na'ab diemaa? Mam anɛ nɔŋdaan ka sɔ' zi' ma.” 24 Saul yammis la da yɛl o David n lɛbis si'em la, 25 o da yɛl ye, “Yɛlimi David ye, ‘Na'ab la pʋ bɔɔd pu'asʋlli fʋ san'anɛ. On bɔɔd si'el anɛ ye fʋ kʋ Filistia dim kɔbiga ka nwaasi ba yu'ogbana mɔr na tis o, ka li pa'al ye fʋ yɔɔ o dataas sam.’ ” Saul gban'ar la wʋsa da anɛ ye David kpɛn' Filistia dim la nu'usin. 26 Sankpan'asnam la da lɛbi yɛl David ala la, o sʋnf da ma'ae nɛ on bɔɔdi kilim Na'ab diem la zug. Saŋa da nan pʋ paae la 27 ka David nɛ o nidib pʋn yii kʋ Filistia dim la kɔbisyi' nɔki ba yu'ogbana la kal la bɛn la kena tis Na'ab la, linɛ na kɛ ka o lieb o diem. Saul da nɔk o bipuŋ Mikal n tis o ka o di. 28 Saul n da baŋ ye Zugsɔb la bɛ nɛ David, ka o bipuŋ Mikal mɛ bɔɔd David la, 29 Saul da maligim zɔɔ o nɛ dabiem hali, ka o lɛbig o dataa nɛ o nyɔvʋr bɛn. 30 Filistia soogia kpɛɛmnam la da yit nɛ saŋa wʋsa zabid, ban da ɛɛnti pɛndigid si'em la zug David da paamid nyaŋir nɛ ya'an saŋa wʋsa gat Saul kpɛɛmnam la wʋsa, ka o yʋ'ʋr tiig zin'ig wʋsa.