David n pian' o naar pian'ad
23
1 David onɛ an Jese biig la naar pian'adi nwa.Jese biribiŋ onɛ ka Wina'am dʋ'ʋs o la pian'ʋkʋ la;
dau kanɛ ka Jakob Wina'am bu'oe malʋŋ kpaam niŋ o zug la,
o anɛ Israel yʋʋm yʋ'ʋm.
2 Zugsɔb Siig la pian' yii m san'an na,
o pian'ad la da bɛ nɛ m zilimin.
3 Israel Wina'am la pian' ya. Israel Tampiing la yɛlim ye,
“Sɔ' ya'a sʋ'oe nidib ka guri ba nɛ pʋpielim,
o ya'a guri ba nɛ Wina'am zɔtim,
4 o nwɛnɛ winnigi na tans bɛogʋn ka li nie nɛ,
bɛkɛung kanɛ ka saŋgbana kae,
ka nwɛnɛ saa na nii nie ka mɔɔd yit teŋin na nɛ.”
5 “Man yir an sʋ'ʋŋa tis Wina'am.
O pʋ maal o nɔnaar dinɛ ka' naar la nɛ mam?
Ka mɛ gu' si'el wʋsa ka li an sʋ'ʋŋaa?
O kʋ maali m yɛla wʋsa hali, ka faaɛn maa?
O na tisim man bɔɔd si'el wʋsa.
6 Amaa nimbɛ'ɛdnam la, ba na lɔbi ba kpikpɛŋ sa
wʋʋ gɔn'ɔs dinɛ ka ba kʋ siaki zaŋ nu'usi ku'olɛ.
7 Onɛ wʋsa ye o si'is gɔn'ɔs zaŋid nɛ kʋnt daug bɛɛ kpandaug.
Ba na nyu'oe ba nɛ bugum, ban dig zin'isi'a la.”
David zabzabidib banɛ da kpi'em la
8 Yʋ'ʋbama anɛ nintitada banɛ da an Na'ab David nidib la: Joseb Basibef onɛ da an Takɛmon nid la da an nimbɛda atan' la kpɛɛm. O da nɔk kpan nɛ kʋ nidib kɔbisnii zabir yinne ma'aa ni.
9 Onɛ tia'al anɛ Eleazar onɛ an Dodai biig ka an Ahoohi nid la. O anɛ onɛ da paas nimbɛda atan' la ni. Li da paae saŋa si'a ka Filistia dim la'as Pas-Damim ye ba zab, ka Eleazar nɛ David tʋ'ʋdi ba. Ka dabiem kpɛn' Israel dim zabzabidib la ka ba zɔ, 10 amaa Eleazar da zi'en ka kʋ Filistia dim la hali ka o nu'ug ti kena gɛn ka ga'aŋi tabinɛ o sʋ'ʋg la. Zugsɔb la da tisi ba nyaŋir dabiskan la daar. Zabzabidib la da lɛb Eleazar san'an na amaa ba da yɛɛsnɛ kpi'imnam la la'ad ma'aa.
11 Onɛ da tia'al on zug da anɛ Seamma onɛ an Agee biig ka an Harar nid la. Filistia dim la da la'as zin'isi'a ye ba zab ka li an bɛŋa pɔɔg, ka Israel dim la zɔ ka basi ba, 12 amaa Seamma da zi'en pɔɔg la teŋsʋkʋ zab. O da zab nɛ Filistia dim la, ka Zugsɔb tis o paŋ ka o nyaŋi ba hali.
13 Li da anɛ Bunib saŋa ya'as ka nidib atan' banɛ an nidib pistan' la kpɛɛmnam la kɛn David san'an na, tampinyɔkin dinɛ bɛ Adullam la. Ka Filistia dim la mɛ la'as Refa Dim Bɔn'ɔgin la zi'e ye ba zab. 14 Saŋkan la David da bɛ nɛ o zin'ikpi'euŋin la, ka Filistia zabzabidib la bɛ Betilehem. 15 Ku'onuud da mɔr David ka o yɛl ye, “O! M bɔɔd ye sɔ' gbin'e ku'om bulig kanɛ kpi'e Betilehem za'anɔɔrin la na tisinim!” 16 Ka o nimbɛda atan' la bʋŋ Filistia dim la teŋsʋkʋ gaadi keŋ paae bulig kanɛ kpi'e Betilehem za'anɔɔrin la gbin'e ku'om la zii lɛb na tis David. Amaa o da zan'as ya ka pʋ nu ku'om la, ka kpa'ae li bas Zugsɔb la tuon, 17 ka yɛl ye, “Win da kɛ ka m tʋm nɛ'ɛŋaa, m Zugsɔba! Li na nwɛnɛ nimbanɛ kuosi ba nyɔvʋri keŋ la ziim ka m nu.” Alazug ka o zan'as ka pʋ nuu. Tʋʋm kpi'ema banɛ ka nimbɛda atan' nwa da tʋm nwana.
18 Abisai onɛ an Joab pitʋ ka an Zeruyia biig la da an nidib pistan' la kpɛɛm. O da ʋk o kpan nɛ kʋ nidib kɔbistan' ka o yʋ'ʋr mɛ da yii nwɛnɛ nidiba atan' la nɛ. 19 O da di'e na'asi gaad nidib pistan' la, hali ka lɛbigi ba tuongat, la'am nɛ ban da pʋ kaal o paas nimbɛda atan' la sʋʋgin la.
20 Benaya, onɛ an Jehoyada biig la, da anɛ zabzabid hali, ka yi Kabziel teŋin na. O da mɔya hali. O da kʋ Moab nimbɛda ayi'. O da lɛn sig bʋmbɔkin kʋ gbigim, daar kanɛ ka sisalig da bɛ ka ku'om ga'aŋi nwɛnɛ sakuga la. 21 O mɛ da kʋ Egipt dau tita'ar la'am nɛ on da zanl kpan o nu'ugin la. Benaya da keŋ o san'an nɛ balaar ka zɛ kpan la Egipt dim dau la nu'ugin faaɛn ka nɔk o mɛŋ kpan nɛ kʋʋ o. 22 Jehoyada biig Benaya da tʋm si'em la. O mɛ da mɔr yʋ'ʋr wʋʋ nimbɛda atan' la nɛ. 23 O da di'e na'asi gaad nidib pistan' la, amaa o da pʋ paas nimbɛda atan' la nii. Ka David da kɛ ka o sʋ'oe banɛ gur on mɛŋ la. 24 Nidib pistan' la da anɛ: Asahel onɛ an Joab mabiig la, nɛ Elhanan onɛ an Dodo biig ka yi Betilehem na la nɛ 25 Seamma nɛ Elika banɛ yi Harod na la, 26 nɛ Helez onɛ an Palet nid la, nɛ Ira onɛ an Ikes biig ka yi Tekoa na la, nɛ 27 Abieza onɛ yi Anatof la, nɛ Mebunai onɛ an Husea nid la, nɛ 28 Zalmon onɛ an Ahoohi nid la, nɛ Meharai onɛ an Netofa nid la, nɛ 29 Heled onɛ an Baana biig ka an Netofa nid la, nɛ Itai onɛ an Ribai biig ka yi Gibea Benjamin teŋin la, nɛ 30 Benaya onɛ an Piraton nid la, nɛ Hidai onɛ yi Gaas Bʋmbu'adin la na, 31 nɛ Abi-Albon onɛ an Aba teŋ nid la nɛ Asmavef onɛ an Baahum nid la, 32 nɛ Eliyahaba onɛ an Saalbon nid la, nɛ Jasien biis, nɛ Jonatan 33 onɛ ka o saam an Seamma ka o yi Harar na la, nɛ Siarar biig Ahiam onɛ an Harar nid la, 34 nɛ Elifelet onɛ ka o saam an Ahasbai ka o an Maaka nid la, nɛ Ahitofel biig Eliam onɛ yi Gilo na la, 35 nɛ Hesro onɛ an Kaamel nid la, nɛ Paarai onɛ an Arib nid la, 36 nɛ Igal onɛ an Natan biig ka yi Zoba na la, nɛ Bani onɛ an Gad nid la, 37 nɛ Zelek onɛ an Ammon nid la, nɛ Naharai onɛ an Beerot nid (ka an onɛ ziid Joab zaba la'ad la, Joab onɛ an Zeruyia biig la), 38 nɛ Ira nɛ Gareb banɛ an Yitir nidib la, 39 nɛ Uria onɛ an Hitti nid la. Ba wʋsa da anɛ nidib pistan' nɛ ayɔpɔi.