Na'ab David n kaal zabzabidib la
24
1 Zugsɔb la sʋnf da lɛm pɛlig nɛ Israel dim ya'as ka o kɛ ka Na'ab David maal dinɛ mɔr san'auŋ na tisi ba, o da yɛl ye, “Kem kaali Israel nɛ Juda dim la.”2 Na'ab la da yɛl Joab nɛ zaba tuongatib banɛ bɛɛ o san'an la ye, “Kemi Israel buudi la wʋsa ni, din yi Dan n paae Beerseba, kaalimini ba ka m baŋ ban zem si'em.”
3 Amaa Joab da lɛbis Na'ab la ye, “Naa, fʋ Zugsɔb Wina'am la na paas zabzabidib la kal ka li tʋgisi paae zin'is kɔbiga, ka kɛ ka m zugdaan onɛ an Na'ab la nini nyɛɛ li. Amaa bɔɔ kɛ ka fʋ bɔɔd ye fʋ tʋm nɛ'ɛŋa, m zugdaana?”
4 Amaa Na'ab la pian'ad da nyaŋi lim Joab nɛ tuongatib la pian'ad, alazug ba da yi Na'ab la san'ani keŋ kaal Israel zabzabidib la. 5 Ban da lɔ'ɔŋ Joodan kɔldaug la, ba da la'as nɛ zin'ikanɛ kpi'e Aroa tempʋʋg la dagɔbʋg bɔn'ɔgin la. Ba da dɔlli yi Gad n paae Jaza. 6 Ba da keŋ Gilead nɛ Tatim-Hodis sʋ'ʋlimin paae Dan-Jaan kaae Sidon baba. 7 Ka naan ani kpa' keŋ Taya teŋkpi'euŋ la gaadi paae Hivi nɛ Keenan dim tɛɛnsin la wʋsa. Li naar la ka ba gaadi keŋ hali paae Beerseba nɛ Negef dinɛ bɛ Juda la.
8 Ban da gilig teŋ la wʋsa naae la, ba da lɛb Jerusalem na nwadis awai nɛ dabpisi daar.
9 Joab da lɛb na yɛl Na'ab la zabzabidib la kal Israel pʋʋginɛ an si'em, ye ba anɛ nidib tusa kɔbisnii (800,000) banɛ mɔr paŋi na nyaŋi zab nɛ sʋ'ʋg, ka Juda an nidib tusa kɔbisnu (500,000).
Daba atan' sʋnsa'aŋ la yɛla
10 On da kaal nidib la naae la, David ya'am da lɛb na ka o yɛl Zugsɔb la ye, “M tʋm tʋʋmbɛ'ɛd bɛdegʋ nɛ man maal si'el la. Nannanna, Zugsɔba, m bɛlimnɛ, yisimi, fʋ tʋmtʋm la, tʋʋmbɛ'ɛdi bas, ka m tʋm zɔlim tʋʋma.”
11 Bɛogʋ da nied ka Na'ab David nam pʋ duoe gbɛɛmin la ka Zugsɔb pian'ad paae Gad onɛ an Wina'am nɔdi'es ka an onɛ tu'asid David bɛog sa yɛla la ye, 12 “Kem yɛl David ye Zugsɔb la yɛl si'em nwa. M tisif nɛ yɛla atan': gaŋim fʋn bɔɔd si'el ka m kɛ ka li tʋmi fʋ san'an.”
13 Ka Gad duoe keŋ Na'ab David san'an yɛl o ye, “Fʋ bɔɔd ye kɔ'ɔm lii fʋ teŋ sʋ'ʋlim la na yʋma atan', bɛɛ fʋ bɔɔd ye fʋ dataas kati dɔllif nwadis atan', bɛɛ fʋ bɔɔd ye ban'abɛ'og sig teŋgbauŋ la zug na daba atan'? Nannanna tɛn'ɛsim ka tisim gandigir ka m lɛbi yɛl onɛ tʋmi m la na.”
14 David da yɛl Gad ye, “M sʋʋnr san'am nɛ galis. Ti ya'a li Zugsɔb nu'usin sɔn'oe tinamɛ na li ninsaal nu'ugin, bɔzugɔ Zugsɔb la zɔt nimbaanlig pamm.”
15 Dinzugɔ Zugsɔb la da kɛ ka ban'abɛ'og sig Israel dimin, din yi daakan la bɛkɛung paae dabiskanɛ ka o zi'el la. Din da yi Dan teŋin keŋ paae Beerseba teŋin, nidib tusa pisyɔpɔi da kpi. 16 Maliak la da ʋk o nu'ug ye o san'am Jerusalem la, Zugsɔb la sʋnf da san'am nɛ tɔɔg kanɛ da maal la zug. Ka o yɛl maliak kanɛ kʋʋd nidib la ye, “Li sia'al ya: gu'om ala!” Zugsɔb maliak la da bɛ nɛ Arauna onɛ an Jebus nid la zieŋin.
17 David n da nyɛ maliak kanɛ nwɛ'ɛd nidib la kʋʋd la, o da yɛl Zugsɔb la ye, “Manɛ tʋm bɛ'ɛd nɛ dinɛ ka' sʋm. Bama nwɛnɛ pɛ'ɛs nɛ, ba maal bɔ? Kɛl ka tɔɔg la li man nɛ m yidim zugin.”
Na'ab David n maal maannɛ gu'oe yɛltɔɔd la yɛla
18 Daakan la Gad da keŋ Na'ab David san'anɛ yɛl o ye, “Kem Arauna onɛ an Jebus nid la zieŋin mɛ' malʋŋ bimbimi tis Zugsɔb la.” 19 David da keŋ niŋ wʋʋ Zugsɔb la yɛl Gad ye o yɛl o si'em la. 20 Arauna n da ʋk o nindaa gɔsi nyɛ ka Na'ab la nɛ o nidib kennɛ o san'an na la, o da yina igin ka o nindaa kpa' teŋin.
21 Ka yɛl ye, “Bɔ ka m zugdaan onɛ an m Na'ab la, kɛn man kanɛ aan fʋ tʋmtʋm la san'an na?”
Ka Na'ab David lɛbis o ye, “M ye m da' nɛ fʋ zieŋ nwa mɛ' maan bimbimi tis Zugsɔb la, ka daasi'erɛɛ tɔɔg dinɛ paae nidib la na gu'oe.”
22 Arauna da yɛl David ye, “Naa, nɔkim linɛ wʋsa ka fʋ bɔɔdi maal maan la, m zugdaana. Na'araadi nwa, nɔkim maal malʋŋ kanɛ ka ba nyu'od la. La'abanɛ ka ti mɔri bʋ'ʋd ki la, nɛ yu'asin daadi nwa, ka fʋ na zaŋi nyu'oe bugum. 23 Na'aba, man Arauna nɔk si'eli nwa tisif.” Ka lɛn yɛl Na'ab la ye, “Zugsɔb Wina'am la na di'e fʋ maan.”
24 Amaa Na'ab la yɛl Arauna ye, “Ayei, mam bɔɔd ye m yɔɔf nɛ. M kʋ maal maan dinɛ an nyu'or maan la tis Zugsɔb ka pʋ yɔɔ li sammɛ.”