David n kaal zabzabidib la yɛla
21
1 Sʋntaana da duoe zi'en Israel yɛla ka ma' David ye o kaal Israel dim la wʋsa. 2 Linzug David da yɛl Joab nɛ zabzabidib tuongatib la ye, “Kem kaali Israel dim la lin pin'il Beerseba keŋ paae Dan teŋin, ka lɛb na yɛlim ka m baŋ nidib la kalli zem si'em.”3 Amaa Joab da lɛbis Na'ab la ye, “Naa, fʋ Zugsɔb Wina'am la na paas zabzabidib la kal ka li paae zin'is kɔbiga. M zugdaan na'aba, ba wʋsa ka'anɛ fʋ nidibaa? Bɔ ka m zugdaan bɔɔd ye o maal nɛ'? Bɔ ka o bɔɔdi zi taal kaŋa kɛn Israel zugin na?”
4 Na'ab la pian'ad da nyaŋi lim Joab pian'ad, alazug Joab da yii keŋ gilig Israel teŋ la wʋsa ka nyaan lɛb Jerusalem na. 5 Joab n da lɛb na yɛl Na'ab la zabzabidib la kal Israel pʋʋgin, ye ba anɛ nidib tusa tusir nɛ tusa kɔbiga (1,100,000) banɛ mɔr paŋi na nyaŋi zab nɛ sʋ'ʋg, ka Juda an nidib tusa kɔbisnaasi nɛ tusa pisyɔpɔi (470,000). 6 Amaa Joab da pʋ paas Levi nɛ Benjamin dɔɔd la kallin laa bɔzugɔ na'ab la da tis nɔsi'a la da pʋ malis Joab sʋʋnrɛ.
7 Wina'am sʋʋnr da san'am yɛl kaŋa zug ka o kɛ ka namisʋg sig Israel dim zugin na.
8 Linzug David da yɛl Zugsɔb la ye, “M tʋm tʋʋmbɛ'ɛd bɛdegʋ nɛ man maal si'el la. Nannanna, Zugsɔba, m bɛlimnɛ, yisimi m tʋʋmbɛ'ɛdi bas, ka m tʋm zɔlim tʋʋma.”
9 Zugsɔb la da yɛl Gad, onɛ nyɛt nier yɛla tisid David la ye, 10 “Kem yɛl David ye, ‘Man Zugsɔb la tisif nɛ yɛla atan' ye fʋ gaŋ fʋn bɔɔd si'el ka m kɛ ka li niŋ ala.’ ”
11 Ka Gad duoe keŋ Na'ab David san'an yɛl o ye, “Zugsɔb la yɛl si'eli nwa, ‘Gaŋim fʋn bɔɔd si'el: 12 fʋ bɔɔd ye kɔ'ɔm lii fʋ teŋ sʋ'ʋlim la na yʋma atan', bɛɛ fʋ bɔɔd ye fʋ dataas kati dɔllif nɛ sʋ'ʋs nwadis atan', bɛɛ fʋ bɔɔd ye Zugsɔb la zab nɛ ya nɛ o sʋ'ʋg, ka ban'abɛ'og sig teŋin la na ka Zugsɔb maliak la kʋ nidib zin'is wʋsa Israel teŋin daba atan'?’ Nannanna tɛn'ɛsim ka tisim gandigir ka m lɛbi yɛl onɛ tʋmim na la.”
13 David da yɛl Gad ye, “M sʋʋnr san'am nɛ galis. Ti ya'a li Zugsɔb nu'usin sɔn'oe tinamɛ na li ninsaal nu'ugin, bɔzugɔ Zugsɔb la zɔt nimbaanlig pamm.”
14 Dinzugɔ Zugsɔb la da kɛ ka ban'abɛ'og sig Israel dimin, din yi daakan la bɛkɛung m paae daakanɛ ka o zi'el la, ka nidib tusa pisyɔpɔi (70,000) kpi. 15 Maliak la da ʋk o nu'ug ye o san'am Jerusalem la, Zugsɔb la sʋnf da san'am nɛ, tɔɔg kanɛ da maal la zug. Ka o yɛl maliak kanɛ kʋʋd nidib la ye, “Li sia'al ya: gu'om ala!” Zugsɔb maliak la da bɛ nɛ Arauna onɛ an Jebus nid la zieŋin. 16 David da ʋk o nindaa nyɛ Zugsɔb maliak la ka o zi'e arezana nɛ dunia teŋsʋk, ka fuoe sʋ'ʋgʋ zanl ka li wa'alim keŋ paae Jerusalem tempʋʋg. Ka David nɛ kpɛɛmnam la yɛ bɔtkʋda pa'annɛ ba sʋnsa'aŋ ka digin avanba ka ba nindaa kpa' teŋ.
17 David da bu'os Wina'am ye, “Ka' manɛ daa tis nɔɔr ye ba kaalim dap la tisi maa? Manɛ tʋm bɛ'ɛd nɛ linɛ ka' sʋm. Bama nwɛnɛ pɛ'ɛs nɛ, ba maal bɔ? Kɛl ka tɔɔg la li man nɛ m yidim zugin, amaa da kɛ ka tɔkaŋa kpɛlimi fʋ nidib la zugɔ.”
Na'ab David maal maannɛ gu'oe yɛltɔɔd la
18 Ka maliak la tis Gad nɔɔr ye o yɛl Na'ab David ye o kem mɛ' maan bimbimi zi'el Arauna onɛ an Jebus nid la zieŋin. 19 David da keŋ niŋ wʋʋ Zugsɔb la yɛl Gad ye o yɛl o nɛ Zugsɔb la yʋ'ʋr si'em la.
20 Arauna n da bʋ'ʋd o ki la ka gi'e nyɛ maliak la; o biribis anaasi banɛ da bɛɛ o san'an la da su'a ba mɛŋ. 21 Ka David mɛ li'en na, Arauna da gɔsi nyɛ David la ka yi zieŋin la tʋ'ʋs o ka igin ka o nindaa kpa' teŋin.
22 David da yɛl o ye, “Tisimi fʋ zieŋ la ka m mɛ' maan bimbimi tis Zugsɔb la, ka daasi'erɛɛ tɔɔg linɛ paae nidib la na gu'oe. Kuosim tisim wʋʋ lin nar si'em.”
23 Arauna da yɛl David ye, “Naa, nɔkim linɛ wʋsa ka fʋ bɔɔd ye fʋ maal maan la, m zugdaana. Na'araadi nwa, nɔkimi ba maal malʋŋ kanɛ ka ba nyu'od la. La'abanɛ ka ti mɔri bʋ'ʋd ki la, nɛ yɔksin daadi nwa, ka fʋ na zaŋi nyu'oe bugum, ka kɛ ka ki la lɛbigi li zʋʋd maan. M na tis nɛ'ɛnam wʋsa.” 24 Amaa Na'ab la yɛl Arauna ye, “Ayei, asɛɛ ka m yɔɔ fʋ di ligidii an si'em la nɔɔ. Man kʋ nɔk linɛ an fʋn dinnɛ tis Zugsɔb la, bɛɛ m maal maan linɛ an nyu'or maannɛ tis Zugsɔb la ka pʋ yɔɔ li sammɛ.” 25 Alazug David da tis Arauna anzurifa ligidi ka li pʋ pɔɔda paalʋ la yɛla. 26 David da mɛ' bimbim anina ka maal nyu'or malʋŋ nɛ taaba la'asʋg maan. O da buol Zugsɔb la ka o gandig nɛ bugum ka li yi arezana ni sig nyu'or maan la zug na.
27 Zugsɔb la da pian' tis maliak la ka o lɛbis o sʋ'ʋg la sʋʋ li tɛɛngʋn. 28 Saŋa kan la, David da nyɛ ka Zugsɔb la wʋm tis o Arauna onɛ an Jebus nid zieŋin la, o da maal maan ani. 29 Zugsɔb Fuug Sʋgʋr linɛ ka Moses da maal sian'arin la nɛ nyu'or maan daka la da bɛ nɛ maan zin'igin Gibeon teŋin. 30 Amaa David da pʋ nyaŋi keŋ ani bu'os Wina'am si'el yɛllɛ, bɔzugɔ o da zɔti Zugsɔb maliak la sʋ'ʋg la dabiem.