22
1 David da yɛl ye, “Zugsɔb Wina'am Yir la na bɛ kpɛla ka Israel dim maan daka la na zi'e anina.”Pʋ'ʋsim yir la mɛɛb ti'ebʋg yɛla
2 Na'ab David da la'as saam banɛ bɛ Israel teŋin la wʋsa, ka gaans nidibi ba teŋsʋk banɛ mi' kuga kpi'eb ye ba kpi'e kugbanɛ ka ba na nɔki mɛ' Wina'am Pʋ'ʋsim Yir la. 3 O da tis kʋntnam bɛdegʋ linɛ ka ba na maal kʋlis la kpa'as nɛ li tabidisi kpɛn'ɛs za'anɔya la, nɛ kʋntzɛn'ug bɛdegʋ ka li tɛbisim zu'oe. 4 O mɛ da tis na'aziinr daad ka li zu'oe ka pʋ mɔr kallɛ, bɔzugɔ Sidon nɛ Taya dim la da zii ba bɛdegʋ na tis o.
5 David da tɛn'ɛs o pʋtɛn'ɛrin ye, “M biig Solomon anɛ dasaŋ, ka pʋ mi' wʋʋ lin nar si'em. Yir kanɛ ka ti ye ti mɛɛ tis Zugsɔb la nar ye li zu'oe ka vɛnl ka nidib na pian' li yɛla dunia wʋsa ni. Alazug man na ti'ebi li yɛla.” Dinzug David da ti'eb sʋ'ʋŋa ka nyaan kpi.
6 O da buol o biig Solomon ka tis o nɔɔr ye o mɛ' yiri tis Zugsɔb onɛ an Israel Wina'am la. 7 David da yɛl Solomon ye, “M biiga, m mɔri li m sʋʋnrin ye m mɛ' yiri tis Zugsɔb onɛ aan m Wina'am la yʋ'ʋr. 8 Amaa Zugsɔb la yɛlim si'eli nwa ye, ‘Fʋ kʋ nidib bɛdegʋ ka zab zaba bɛdegʋ. Li pʋ nar ye fʋ an onɛ na mɛ' Pʋ'ʋsim Yiri tisi ma, bɔzugɔ fʋ yis ziim bɛdegʋ dunia pʋʋgin man nini ni. 9 Amaa fʋ na du'a biribiŋ kanɛ ka m sid na tis o sumbʋgʋsʋm nɛ yɔlisim yii o dataasin dunia lʋga la wʋsa ni. O yʋ'ʋr na buon ye Solomon,a ka m na tis Israel suguru ka ba zin' baanlimm o na'am saŋa. 10 Onɛ na mɛ' yir la mam yʋ'ʋr zug. O na aan m biig ka man na aan o ba', ka m na kɛ ka o na'am la zi'enɛ sʋ'oe Israel yʋma linɛ ka' bɛnnɛ.’
11 “Nannanna, m biiga, Zugsɔb la na bɛ nɛf, fʋ na paam nyaŋir ka mɛ' yiri tisi fʋ Zugsɔb Wina'am la wʋʋ on pʋn yɛl ye fʋ na niŋ si'em la. 12 Zugsɔb la na tisif baŋir nɛ ya'am o ya'a ti kɛ ka fʋ lieb Israel tuongat, ka li kɛ ka fʋ nyaŋi dɔl Zugsɔb onɛ aan fʋ Wina'am la. 13 Fʋ na paam nyaŋir fʋ ya'a dɔl Zugsɔb la zi'ela nɛ o wada banɛ ka o da tis Moses ye o yɛl Israel la. Kpɛ'ɛŋimi fʋ mɛŋ ka mɔr sʋnkpi'euŋ. Da zɔt dabiem bɛɛ kɛ ka fʋ sʋnf san'am.
14 “M mɔɔ nyɛ sanlima nɛ anzurifa nɛ kʋntzɛn'ug nɛ kuntmɛŋir nɛ daad nɛ kuga linɛ na mɛ' yir la ka li wʋsa zu'oe hali. Fʋ mɛ na tun'e paas sieba. 15 Fʋ mɔr tʋmtʋmnib bɛdegʋ; banɛ kpi'ed kuga nɛ banɛ mɛɛd nɛ kampintanam, la'am nɛ banɛ mi' tʋʋma nɛ li buudi wʋsa. 16 Fʋ mɛ mɔr banɛ mi' sanlima nɛ anzurifa nɛ kʋntzɛn'ug nɛ kuntmɛŋir tʋʋma wʋsa ka ba ka' kallɛ. Nannanna pin'ilim tʋʋma la ka Wina'am na bɛ nɛf.”
17 Na'ab David da lɛn tis Israel kpɛɛmnam la wʋsa nɔɔr ye ba sʋŋ o biig Solomon. 18 O da yɛli ba ye, “Zugsɔb onɛ aan ya Wina'am la bɛ nɛ ya ka tisi ya vʋ'ʋsʋm zin'ig wʋsa. O nɔk teŋ la nidib wʋsa niŋi m nu'ugin, ka teŋ la lieb Zugsɔb la nɛ o nidib la din. 19 Nannanna, pɛsigiminɛ ya mɛŋ nɛ ya sʋnf wʋsa ka iee Zugsɔb onɛ aan ya Wina'am la. Pin'ilim mɛɛ Zugsɔb Wina'am Pʋ'ʋsim Yir la ka li kɛ ka ya nyaŋi mɔr Zugsɔb Nɔnaar Daka la nɛ la'abanɛ an nyain ka an Wina'am din la kɛn dɔkanɛ ka ya mɛ' ye ya tis Zugsɔb yʋ'ʋr la ni na.”