Levi dɔɔg yɛla
23
1 Na'ab David n da kʋdig la o da diis o biig Solomon Israel na'am.2 O mɛ da la'as Israel kpɛɛmnam nɛ maanmaannib nɛ Levi dɔɔg la nidib. 3 Levi dim banɛ da paae yʋma pistan' bɛɛ gaad ala la wʋsa ba da kaali ba, ka ba dap wʋsa kal da duoe nɛ tusa pistan' nɛ anii (38,000). 4 David da yɛl ye, “Nimbama sʋʋgin, tusa pisi nɛ anaasi (24,000) na gɔsid Zugsɔb Pʋ'ʋsim Yir la tʋʋma yɛla, ka tusa ayuobʋ (6,000) an kpɛɛmnam nɛ sariakatib. 5 Dap tusa anaasi (4,000) na gur za'anɔya la ka tusa anaasi (4,000) mɛ na zun'od Zugsɔb la nɛ yʋ'ʋma la'abanɛ ka man Na'ab David tis la.”
6 David da pʋdig Levi dɔɔg la kɔn'ɔb-kɔn'ɔb wʋʋ ba yaab Levi biribis la an si'em la. Ka banɛ an: Gerson nɛ Kohat nɛ Merari.
Gerson tuŋ la:
7 Gerson tuŋʋn la da anɛ:
Ladan nɛ Simie.
8 Ladan biribis da anɛ:
Jehel onɛ da an kpɛɛm nɛ Zetam nɛ Joel. Ba wʋsa da la'as nɛ atan'.
9 Simie biribis da anɛ:
Sielomof nɛ Haziel nɛ Aran. Ba wʋsa da la'as nɛ atan'.
Bama da an Ladan tuŋ la tuongatib.
10 Simie biribis la mɛ da anɛ:
Jahaf nɛ Ziza nɛ Jeus nɛ Beria. Bama da an Simie biribis. Ba wʋsa da la'as nɛ anaasi.
11 Jahaf n da an kpɛɛm, ka Ziza tia'al, amaa Jeus nɛ Beria da pʋ mɔr biribis bɛdegʋʋ; alazug ba da kaali ba nɛ wʋʋ yir yinne ka mɛ tisi ba tʋʋm yinne.
Kohat tuŋ la:
12 Kohat biribis da anɛ:
Amram nɛ Izar nɛ Hebron nɛ Uziel. Ba wʋsa da la'as nɛ anaasi.
13 Amram biribis da anɛ:
Aaron nɛ Moses.
Aaron da anɛ onɛ ka ba gaŋ ka o bɛɛ o kɔn', on nɛ o yaas la, saŋa linɛ ka' bɛnnɛ, ye ba pɛsig la'abanɛ an kasi la, ka maan maana tisid Zugsɔb la, ka tʋmmi tisid o, ka kaanb bareka niŋi ba zug Zugsɔb la yʋ'ʋrin saŋa linɛ ka' bɛnnɛ.
14 Ba da kaal Moses onɛ an Wina'am nid la biribisi paas Levi dɔɔg la ni.
15 Moses biribis da anɛ:
Gersom nɛ Elieza.
16 Gersom biribis la:
Subael da aan ba kpɛɛm.
17 Elieza biribis la:
Rehabia da aan ba kpɛɛm.
Elieza da pʋ lɛm mɔr biribiŋ si'a ya'asɛ, amaa Rehabia biribis da zu'oya.
18 Izar biribis la:
Sielomif da aan ba kpɛɛm.
19 Hebron biribis la:
Jeria da an kpɛɛm, ka Amaraya tia'ali ayi' ka Jahaziel tia'al atan' ka Jekameam tia'al anaasi.
20 Uziel biribis la:
Maika da an kpɛɛm ka Isaaya tia'al ayi'.
Merari tuŋ la:
21 Merari biribis da anɛ:
Mahli nɛ Musi.
Mahli biribis da anɛ:
Eleazar nɛ Kis.
22 Eleazar da kpiya ka pʋ mɔr biribisɛ. O da mɔr nɛ bipumis ma'aa. Ba saam pitʋ Kis biribis la da dii ba.
23 Musi biribis da anɛ:
Mahli nɛ Eda nɛ Jerimof. Ba wʋsa da la'as nɛ atan'.
24 Bama da anɛ Levi yaas nɛ ba tuŋ nɛ yir wʋsa zugdaannam, wʋʋ ban sɔbi ba yʋda ka kaali ba yinne-yinne si'em la, ba da anɛ banɛ an tʋmtʋmnib ka an wʋʋ yʋma pisi bɛɛ gaad ala ka tʋm Zugsɔb Pʋ'ʋsim Yin la. 25 David da dɛŋi yɛl ye, “Zugsɔb onɛ an Israel Wina'am la sadigim tis o nidib vʋ'ʋsʋm ka kena zin'in Jerusalem saŋa linɛ ka' bɛn la, 26 li pʋ lɛn sʋm ye Levi dɔɔg la ziid Pʋ'ʋsim Sʋgʋr la bɛɛ la'abanɛ ka ba mɔri tʋm ani la.” 27 Nwɛnɛ David n da tis nɔsi'a ka nyaan kpi la, ba da kaal Levi dim banɛ an yʋma pisi bɛɛ gaad ala la.
28 Levi dɔɔg dim la tʋʋma da anɛ ba sʋŋ Aaron yaas la ka ba tʋm Zugsɔb Pʋ'ʋsim Yin la tʋʋma: banɛ na gur za'ambɛŋ la, nɛ dɔbanɛ bɛ kpikpɛŋ la, ka maan la'ad la ka ba lieb kasi, ka lɛn tʋm tʋʋm sieba banɛ bɛ Wina'am Pʋ'ʋsim Yin la. 29 Ba tʋʋma da anɛ ba nɔk bodobodo la pa'al teebul la zug, ka lɛn gɔsid zɔmbaanlig linɛ maan zʋʋd maan la nɛ linɛ nwɛnɛ sa'akɔnt kpi'emis linɛ pʋ gɛndigid danbin la; banɛ da maan bodobodo buudi wʋsa, ka makid la'ad nɛ piini buudi wʋsa. 30 Ba tʋʋma da lɛn anɛ ye ba zi'e ba zin'igin bɛogʋn nɛ zaam pʋ'ʋsid Zugsɔb la bareka ka zun'od o yʋ'ʋr. 31 Ba da lɛn tʋmnɛ saŋa kanɛ wʋsa ka ba maal nyu'or maan Vʋ'ʋsʋm Daar bɛɛ nwadpaalig bɛɛ malima banɛ bɛ wʋsa, ka tʋm Zugsɔb la tuon saŋa wʋsa nɛ lin nar ye ba kal an si'em nɛ ban pa'al ye ba maal si'em la. 32 Alazug, Levi dim la da sʋ'oe La'asʋg Fuug Sʋgʋr la nɛ zin'ikanɛ an nyain la yɛla, ka sʋŋidi ba ba'abiis banɛ an Aaron yaas la tʋm Zugsɔb Pʋ'ʋsim Yir la tʋʋma.