Ban da pʋdig maanmaannib la tʋʋma si'em nwa
24
1 Ban da pʋdig Aaron yaas la si'em nwa: Aaron biribis la da anɛ Nadab nɛ Abihu nɛ Eleazar nɛ Itamar. 2 Amaa Nadab nɛ Abihu da dɛŋi kpi ka ba saam nam pʋ kpii, ba da nam pʋ mɔr biisɛ: alazug Eleazar nɛ Itamar n da tʋm maana la tʋʋma. 3 Zadok onɛ an Eleazar yaaŋ la nɛ Ahimelek onɛ da an Itamar yaaŋ la da sʋŋ Na'ab David ka o pʋdig tʋʋma la kɔn'ɔb kɔn'ɔbi tis Levi dim la ka pa'ali ba ban na tʋm si'em. 4 Kpɛɛmnam bɛdegʋ da bɛ Eleazar yaas la nii gat Itamar yaasin la, ka ba pʋdigi ba wʋʋ lin nar si'em; yidaannam pii nɛ ayuobʋ da yi Eleazar yaasin la, ka anii yi Itamar yaasin la na. 5 Ba da pʋdigi ba nɛ ka baregaŋ kae, ba da maalnɛ bʋgʋlʋm-bʋgʋlʋm gaŋ, bɔzugɔ Pʋ'ʋsim Yir la kpɛɛmnam nɛ Wina'am gaŋ sieba ka ba tʋmm o tʋʋma la mɛ da bɛ Eleazar nɛ Itamar yaasin la.6 Pa'an onɛ yʋ'ʋri buon Semaya ka an Netanɛl biig ka an Levi dɔɔg nid la da sɔbid yʋda la Na'ab la nɛ kpɛɛmnam la tuon: kpɛɛmnam la da anɛ Zadok onɛ an maanmaan kpɛɛm la, nɛ Ahimelek onɛ da aan Abiata biig la, nɛ banɛ gat maanmaannib nɛ Levi dɔɔg dim tuon la. Ba da gaŋ nid yinne Eleazar gbinnin ka gaŋ yinne mɛn Itamar gbinnin la.
7 Yiiga bʋgʋlʋm-bʋgʋlʋm la da gaŋnɛ Jehoyarib, ka linɛ tia'al la gaŋ Jedaya. 8 Ka linɛ paas atan' la gaŋ Harim, ka linɛ paas anaasi la gaŋ Seorim. 9 Ka linɛ paas anu la gaŋ Malkija, ka linɛ paas ayuobʋ la gaŋ Mijamin. 10 Ka linɛ paas ayɔpɔi la gaŋ Hakos, ka linɛ paas anii la gaŋ Abija. 11 Ka linɛ paas awai la gaŋ Jesua, ka linɛ paas piiga la gaŋ Siekania. 12 Ka linɛ paas pii nɛ yinne la gaŋ Eliyaasib, ka linɛ paas pii nɛ ayi' la gaŋ Jakim. 13 Ka linɛ paas pii nɛ atan' la gaŋ Huppa, ka linɛ paas pii nɛ anaasi la gaŋ Jesebeab. 14 Ka linɛ paas pii nɛ anu la gaŋ Bilga, ka pii nɛ ayuobʋ la gaŋ Imer. 15 Ka pii nɛ ayɔpɔi la gaŋ Hezir, ka pii nɛ anii la gaŋ Hapizis. 16 Ka pii nɛ awai la gaŋ Petahaya, ka pisi la gaŋ Jehezekel. 17 Ka pisi nɛ yinne la da gaŋ Jakin, ka pisi nɛ ayi' la gaŋ Gamul. 18 Ka pisi nɛ atan' la gaŋ Delaya, ka pisi nɛ anaasi la gaŋ Maazia.
19 Ban da tɛn'ɛli ba si'em nwa ka ba tʋm Zugsɔb Pʋ'ʋsim Yir tʋʋma la, saŋkanɛ wʋsa ka ba kpɛn' ye ba tʋm nwɛnɛ zi'ela banɛ ka ba da di'e ba yaab Aaron san'an la, ka dɔlisid wʋʋ Zugsɔb onɛ an Israel Wina'am la da pa'al o si'em la.
Levi dim banɛ kpɛlim la nwa
20 Levi dim la ni banɛ kpɛlim nwa: Amram tuŋʋn la ba da gaŋnɛ Subael; ka Subael tuŋʋn la ka ba gaŋ Jehideya. 21 Rehabia tuŋʋn la Isaaya da an kpɛɛm. 22 Izar tuŋʋn la ba da gaŋnɛ Sielomof; ka Sielomof tuŋʋn la ka ba gaŋ Jahaf. 23 Hebron biisin la Jeria da an kpɛɛm, ka Amaraya tia'al ayi', ka Jahaziel tia'al atan', ka Jekameam tia'al anaasi. 24 Uziel biig da anɛ Maika; ka Maika biig da an Siamir. 25 Maika ba'abiig da anɛ Isaaya; ka Isaaya biig an Zakaria. 26 Merari biribis da anɛ: Mahli nɛ Musi: Jaazia biig da anɛ Beno. 27 Merari yaas banɛ da yit Jaazia ni da anɛ; Beno nɛ Seoham nɛ Zakur nɛ Ibri. 28 Mahli biig da anɛ Eleazar, amaa on da ka' biribisɛ. 29 Kis tuŋʋn la: Kis biig da anɛ Jerameel. 30 Musi biribis da anɛ Mahli nɛ Eder nɛ Jerimof. Bama da an Levi dim la ka li dɔl wʋʋ ba tuŋʋ an si'em.
31 Ba mɛ da maal bʋgʋlʋm-bʋgʋlʋm, wʋʋ ba ba'abiis banɛ an Aaron yaas la da niŋ si'em la, Na'ab David nɛ Zadok nɛ Ahimelek nɛ maanmaannib tuongatib nɛ maanmaannib la wʋsa tuon. Ba da maan bikpɛɛmnam nɛ banɛ an bibaanlʋg la nɛ azinzema.