David yʋ'ʋm yʋʋma on yii o dataas nu'usin la yɛla
(Yʋm 18)
22
1 Na'ab David da yʋ'ʋm yʋʋm kaŋa tis Zugsɔb la on faaɛn o yis o dataas nɛ Saul nu'usin la. 2 O da yʋ'ʋm ye,“Zugsɔb la aan m tampiing,
m suak zin'ikpi'euŋ nɛ m faangid.
3 M Wina'am la aan m tampiing,
o san'an ka m su'ad.
Onɛ lusidim ka aan m vʋm la paŋ.
O anɛ m kpi'euŋ zin'ig nɛ m faangid.
O faanmi yi zabbɔɔdib la nu'usin.
4 M buol Zugsɔb onɛ nar nɛ zun'or la,
ka paam yɔlisim yii m dataas nu'usin.
5 Kum lɔbi giligimi nwɛnɛ nwiis nɛ,
ka kum ku'onwiis pilim yɔɔg-yɔɔg.
6 Ayaʋg lɔb nwiisi giligim,
ka Akum bɛndim nɛ baans.
7 M mugusʋg pʋʋgin m daa buolnɛ Zugsɔb la;
m daa kaasi buoli m Wina'am la.
Ka o naanɛ o Pʋ'ʋsim Yin la ka wʋm tisim,
m kukuma la daa paae o san'an ka kpɛn' o tʋba ni.
8 Teŋgbauŋ la damnɛ ka mi'im zika-zika,
hali ka saŋgbana la gbina dam,
ka kirid o sʋnfʋ duoe la zug.
9 Nyɔ'ɔs daa naanɛ o nyɔnya nii yina;
ka bugum linɛ kanbid yii o nɔɔrin na,
ka bugumsaana linɛ dit yii li pʋʋgin na.
10 O da buak agɔla ka sig na,
ka saŋgbansabilig bɛɛ o nɔba teŋir.
11 O da ban' Kerub la iank.
Ka sisi'em da'ad o ken tɔ'ɔtɔ wʋʋ niiŋ nɛ.
12 O da nɔk liki su'a o mɛŋ,
ka kɛ ka saa saŋgbansabilig gilig o.
13 Ka bugum naan sa-ian'asʋg nɛ
nɛɛsim linɛ bɛɛ o san'an la yina.
14 Zugsɔb la tans wʋʋ satansʋg nɛ arezana ni.
Onɛ Gaad Si'el Wʋsa la lɛn vu ya'as.
15 O da tɔn piema la widigi o bi'emnam la,
ka kadi ba nɛ sa-ian'astita'ar.
16 Zugsɔba, fʋ tansʋg nɛ
pɛbistita'ar kanɛ yii fʋ nyɔnya ni na la
kɛ ka Atɛuk ku'osuoya nɛ
teŋgbauŋ la ɛɛnbir nie paalʋ.
17 O naan nɛ agɔlli su'uni gban'e m nu'ugʋ
yaami yis ku'ozuluŋ pʋʋgin.
18 O faanmi yisi m dataas banɛ mɔr paŋ hali la ni,
banɛ kisim ka mɔr paŋi gatim la.
19 Ba daa kena ludimi m dabisbɛ'og daar,
amaa ka Zugsɔb la sʋŋim.
20 O daa mɔrimi yii keŋ zin'ikanɛ an yaliŋa.
O daa faanm on nɔŋim la zug.
21 Zugsɔb la tʋmnɛ tisim
wʋʋ man an pʋpiel si'em la.
M nu'usi an nyain la zug ka fʋ tisim piini.
22 Man dɔlis Zugsɔb suoya la wʋsa;
m pʋ tʋm tʋʋmbɛ'ɛdi
fɛndig ka basi m Wina'am.
23 M dɔlisid o wada la wʋsa,
m pʋ fɛndig ka bas o zi'ela la.
24 O pʋ nyɛ gba'ar si'a m san'anɛ,
m mɔɔ gban'e m mɛŋ ka pʋ tʋm bɛ'ɛdɛ.
25 M pʋpielim la zug ka Zugsɔb la niŋim zug bareka.
M nu'usi an nyain la zug ka o tisim piini.
26 Banɛ an sida dim la fʋ pa'annɛ ba ye fʋ anɛ sida sɔb,
banɛ ka' gba'ar la fʋ pa'annɛ ba ye fʋn mɛ ka' gba'arɛ.
27 Banɛ an nyain la fʋ pa'annɛ ba ye fʋ anɛ nyain.
Amaa banɛ bɛllim pʋ dɔl suor la,
fʋ mɛ pa'annɛ ba ye fʋ mi' ba gbin.
28 Fʋ faand banɛ siedi ba mɛŋ la,
amaa fʋ kpansid nyɛɛsim dim la ka na sigisi ba teŋin.
29 M Zugsɔba, fʋnɛ aan m fitir,
Zugsɔb la kɛ ka lik lieb nɛɛsim tisim.
30 Fʋ sʋŋir la zug, m na nyaŋi zab nɛ m dataas.
Wina'am paŋ zug, m na ianki gaŋ zaŋguom tita'ar.
31 Ya'a an sida, Wina'am suoya la an sʋ'ʋŋa.
Zugsɔb la pian'ad pʋ mɔr zirii;
onɛ lusid banɛ wʋsa su'a o san'an.
32 Anɔ'ɔnɛ an Wina'am ka ya'a ka' Zugsɔb la?
Ka anɔ'ɔnɛ an Tampiing kanɛ kpi'em ka li ya'a ka' ti Wina'am la?
33 Li anɛ Wina'am la tisidim paŋ,
ka maannɛ m suor sʋ'ʋŋa.
34 O maali m nɔba wʋʋ walig nɔba nɛ,
ka dʋ'ʋsimi zi'el zuor zug.
35 O pa'alim man na zab si'em,
m nu'us tun'e pɔnd kʋntzɛn'ug tiraug.
36 Fʋ zaŋ nɛ zaba gbanti'edʋgʋ lusim ka m nyaŋi m dataas.
Fʋ sʋŋir kɛ ka m an nintita'ar.
37 Fʋ yalig suokanɛ bɛɛ m tuon la,
ka m nɔba kʋ sadigɛ.
38 M kadi m dataasi nyaŋi ba,
ka pʋ fɛndig nya'aŋa, hali nɛ mam ti san'ami ba wʋsa.
39 M san'ami ba nyain ka ba kʋ lɛn nyaŋi duoe.
Ba lii m nɔba teŋir.
40 Fʋ tisim paŋ ye m zab,
ka kɛ ka m dataas igini m tuon.
41 Fʋnɛ kɛ ka m dataas fɛndigi zɔ ka basim,
ka m kʋ banɛ kisim la wʋsa.
42 Ka ba kaasi bɔɔd sʋŋir,
amaa sɔ' kae na faaɛn ba.
Ba kaasi tis Zugsɔb la ka o pʋ gi'e gɔsi ba.
43 M bʋ' ba hali ka ba ti nwɛnɛ uusʋg nɛ.
M tuo ba ka nɔɔ ba mɛdig
nwɛnɛ bian'ar dinɛ bɛ suorinɛ.
44 Fʋ faanmi yis nimbanɛ kisim la nu'usin,
ka kɛ ka m lieb tɛɛns la zugdaan;
ka sʋ'oe nimbanɛ ka m zi' ba.
45 Teŋ zʋŋ dim kenna iginidi m tuon
m ya'a yɛl si'el ba siakid nɛ tisidim tɔ'ɔtɔ.
46 Ba wʋsa giinla kɛns nɛ,
ka ba kiridi yiti ba kpi'euŋ zin'isin kenna.
47 Zugsɔb la sid bɛ! Zun'or anɛ m Tampiing la din!
Wina'am onɛ aan m tampiing ka aan m Faangid la yʋ'ʋr na nyɛ dʋ'ʋsʋg.
48 O anɛ Wina'am onɛ yɔɔd banɛ tummim bɛ'ɛd la sam,
ka kɛt ka m nyaŋ tɛɛns banɛ giligim la ka sʋ'ʋgi ba,
49 ka faanmi m dataas san'ani bas.
Fʋ dʋ'ʋsimi gaadi m dataas,
ka faanmi yis banɛ bɔɔd zaba la ni.
50 Alazug, Zugsɔba, m na na'asif buudi wʋsa sʋʋgin,
m na yʋʋm wɔ'ɔgi fʋ yʋ'ʋr la.
51 O kɛt ka o na'ab nyaŋidi o dataas,
ka pa'an o nɔŋir kanɛ pʋ naadi
tis onɛ ka o bu'oe malʋŋ kpaam niŋ o zugin la.
O sʋŋid man David,
ka na sʋŋi m biis nɛ m yaas wʋsa
hali nɛ saŋa linɛ ka' bɛnnɛ.”