Gibeon dimi yɔ sam la
21
1 David na'am diib saŋa la, kɔ'ɔm tita'ar da li teŋin la yʋma atan', ka Na'ab David bu'os Zugsɔb la. Ka Zugsɔb la yɛl o ye, “Li anɛ Saul tuk la zug. Bɔzugɔ o da kʋ Gibeon dim.” 2 Na'ab la da buol Gibeon dim la pian' tisi ba. (Gibeon dim la da ka' Israel dima, amaa ba da anɛ Amor nimbanɛ da kpɛlim bɛ nɛ ba la. Israel dim da tisi ba nɔɔr ye ba kʋ kʋʋ ba, amaa Saul nini da mu'oe Israel nɛ Juda yɛla la zug ka o mɔɔd ye o li' ba wʋsa.) 3 David da bu'os Gibeon dim la ye, “M na maal bɔɔ tisi ya ka ya ti kaanb, kaanb sʋŋʋ tis Zugsɔb nidib la?” 4 Ka Gibeon dim la lɛbis ye, “Ti pʋ mɔr suori na yɛl ye, ‘Ti bɔɔd sanlim bɛɛ anzurifa Saul nɛ o yidim san'anɛ.’ Ti mɛ pʋ mɔr suori na kʋ Israel nid sɔ'.” Ka David bu'osi ba ye, “Ya bɔɔd ye m maal bɔɔ tisi ya?” 5 Ka ba lɛbis na'ab la ye, “Ya'a kpɛlim dau kanɛ gban'e suobɛ'ɛdi ti yɛla ka kʋʋ ti san'ami ti ka ti pʋ lɛm mɔr zin'ig Israel la, 6 kɛl ka ti di'e o sɔb biribis ayɔpɔi kʋʋ ba paalʋ Zugsɔb la tuon Gibeon teŋin, onɛ an Saul onɛ ka Zugsɔb da gaŋ la.” Ka Na'ab la yɛl ye, “M na nɔki ba tisi ya.”7 Na'ab David da pʋ siak ye o kɛ ka ba kʋ Mefibosef onɛ an Jonatan biig ka mɛ an Saul yaaŋ la, bɔzugɔ on nɛ Jonatan da maal nɔnaar Zugsɔb la tuon. 8 Amaa o da nɔk Saul biis ayi' banɛ an Ammon nɛ Mefibosef n tisi ba. Ba ma da anɛ Rizipa, onɛ an Aya pu'ayua la. Ka lɛn nɔk Saul pu'ayua Merab biribis anu banɛ ka on nɛ Adriel du'a ba la, Adriel saam da anɛ Barizila onɛ an Mehola nid la. 9 O da zaŋi ba tis Gibeon dim la ka ba kʋʋ ba paalʋ kʋkʋn zug Zugsɔb la tuon. Ba da la'asi kʋ nidiba ayɔpɔi la wʋsa ba teŋin mui bunib saŋa linɛ an sapal. 10 Rizipa onɛ an Aya pu'ayua la da nɔk nɛ bɔto maal digisig tampiing zugʋ gbɛɛnd, din yi bunib saŋa ti paae saŋkanɛ ka saa ni banɛ kpi la zug la, o da pʋ kɛ ka niis si'isi ba nintaŋ, bɛɛ sian'anr bʋnkɔnbid si'isi ba yʋ'ʋŋʋ.
11 Ban da yɛl Na'ab David Rizipa onɛ an Aya pu'ayua ka an Saul pu'abil la niŋ si'em la, 12 o da keŋ Jabis Gilead nidibin la di'e Saul nɛ Jonatan kɔnba la. (Israel dim nɛ Filistia dimi da zab Giliboa zuorin la, ba da kʋ Saul nɛ Jonatan ka nɔki ba niŋgbina la ya'al Betsean da'an, ka Jabis dim su'a kena nɔki ba kuli mum.) 13 David da nɔk Saul nɛ o biig Jonatan kɔnba, nɛ banɛ ka ba kʋʋ ba paalʋ Gibeon teŋin la kɔnba, la'asi ba, 14 ka ba mum Saul nɛ o biig Jonatan kɔnba la Saul saam Kis yaʋgʋn, Zela teŋin linɛ bɛ Benjamin sʋ'ʋlimin la. Ka maal si'el wʋsa wʋʋ Na'ab la yɛl si'em la. Din nya'aŋ ka Wina'am di'e ba sɔsʋg teŋ la yɛla.
Israel nɛ Filistia dimi lɛn zab la yɛla
15 Saŋa yinne ka Filistia dim nɛ Israel dim da lɛn zab nɛ taaba ya'as. David da dɔl o nidib la keŋ ye ba zab, ka gɛɛnlis gban'e o. 16 Ka Isbi-Benob, onɛ yaanamɛ da an Refa dim la, da bɛɛ ani, ka o kpan tɛbis hali ka o mɔr zaba sʋ'ʋtita'ar. O da bɔɔd ye o kʋ David, 17 amaa Zeruyia biig Abisai da zɔɔ kena faaɛn David. O da nwɛ' Filistia nid la bas teŋin ka kʋʋ o. Ka David nidib la pɔɔ zi'el ye, “Fʋ kʋ lɛn dɔlli ti keŋ zaba ya'asɛ. Bɔzugɔ fʋ anɛ fitiri tis Israel dim ka fʋ ya'a kpi fitir la na kpiig.” 18 Li da paae saŋsi'a ka zabsi'a lɛm bɛ nɛ Filistia dim la Gob teŋin. Saŋkan la Sibɛkai onɛ an Husea nid la da kʋ Saf, o mɛ da anɛ Refa nid. 19 Zabir yinne da lɛn zab nɛ Filistia dim Gob teŋin. Elhanan onɛ an Jair biig ka an Betilehem nid la da kʋ Lahmi onɛ an Gaf nid ka an Goliyaf ba'abiig la, o da mɔr kpan ka kpandaug la mugumi nwɛnɛ yu'adir nɛ. 20 Zabsi'a da bɛ Gaf ya'as, ka dau tita'ar bɛ ani mɔr nu'ubibis ayuob, yuob nɛ nɔbibis ayuob, yuob. O nu'ubibis nɛ nɔbibis la da la'as nɛ pisi nɛ anaasi. O mɛ da anɛ Refa nid. 21 O da nɛ'ɛs Israel dim la, ka Jonatan kʋʋ o. Jonatan ba' da anɛ David bier Simie. 22 Bama anaasi la wʋsa da anɛ Refa dim banɛ yi Gaf teŋin na, ka David nɛ o nidib la da kʋʋ ba.