Seeba onɛ ieed yɛla la yɛla
20
1 Dau sɔ' da bɛ ani an onɛ ieed yɛla ka o yʋ'ʋr buon Seeba, o da anɛ Bikir biig ka an Benjamin dɔɔg la nid. O da pieb na'atan ka kie kuŋ ye, “Tinam pʋ mɔr pʋʋr David san'anɛ, ti pʋ mɔr pʋʋr Jese biig la san'anɛ! Israel dima, sɔ' wʋsa lɛm kul!” 2 Israel dim wʋsa da bas David ka dɔl Seeba onɛ an Bikir biig la, amaa Juda dim la da kpɛm bɛɛ ba Na'ab la san'an hali lin yi Joodan n ti paae Jerusalem. 3 Na'ab David da lɛbi o yin Jerusalem, ka zaŋ o pu'abibis piiga banɛ ka o daa bas ye ba gur na'ayir la niŋi ba yin ka kɛ ka ba guri ba. O da tisidi ba diib amaa ka pʋ gbɛɛnd nɛ ba. Ba da guri ba nɛ zin'ig yinne ka ba bɛ nwɛnɛ pʋkɔnya nɛ ti paae ba kum daar.Joab n Kʋ Amasa la yɛla
4 Na'ab la da yɛl Amasa ye, “Buolim Juda nidib la wʋsa daba atan' nwa pʋʋgin la'as ka dɔlli ba fʋ mɛŋi lɛb na.” 5 Amaa Amasa da keŋ ye o buol Juda dim na la o da yuugi gaad Na'ab la zi'el o saŋa si'a la. 6 David da yɛl Abisai ye, “Nannanna Seeba onɛ an Bikir biig la na tʋmi ti bɛ'ɛdi gaad Absalɔm. Duom nɛ m mɛŋ zabzabidib la kadi o bugir: ya'a ka' ala, o na zɔɔ kpɛn' su'a tempʋkanɛ ka ba mɛ' zaŋguom kpi'ema giligi li ka ti kʋ paae o.” 7 Alazug Joab zabzabidib la, nɛ Keret dim nɛ Pelet dim, nɛ zabzabidib banɛ kpi'em la wʋsa da yina ka Abisai aan ba tuongat. Ka ba naam Jerusalem kat Seeba onɛ an Bikir biig la bugir. 8 Ban da nam bɛ Gibeon tampintita'arin la, ka Amasa kena sia'ali ba. Joab da yɛ nɛ o zaba fuug. Ka zaba sʋ'ʋg bɛɛ o siɛn la li tɛɛngʋn ga'al nɛ sɛnbidiŋ la. Ka on keŋ tuon la, ka li yi tɛɛngʋn la li na. 9 Ka Joab yɛl Amasa ye, “Fʋ niŋgbina an wala, m ba'abiiga?” Ka gban'e o tieŋ nɛ o datiuŋ nu'ug wʋʋ o ye o kuak o nɛ. 10 Amasa da pʋ gu'usid nɛ sʋ'ʋg la bɛ Joab nu'ugin la, ka Joab kʋnsi o pʋʋr ka o nyɔɔd wʋsa yii li teŋin, ka pʋ lɛn kʋns o ya'asɛ, ka Amasa kpi. Ka Joab nɛ o ba'abiig Abisai bas o ka kat Seeba Bikir biig la bugir. 11 Joab nidib la yinne da zi'e kpi'e Amasa ka yɛl ye, “Onɛ bɔɔd Joab nɛ David, on gaadim dɔl Joab!” 12 Ka Amasa digi o ziimin la bilim suor teŋsʋk. Dau la nyɛ ka zabzabidib la wʋsa ɛɛnti kena kpɛlim anina la, ka o baŋ ye onɛ wʋsa paae Amasa san'an o zi'enid nɛ la, ka o vuug o kpɛn'ɛs sian'arin ka nɔk fuugʋ pil o. 13 Ka ban yis Amasa suorin la naae la, nidib la wʋsa da dɔl Joab ka ba kat Seeba onɛ an Bikir biig la bugir.
Ba kʋ Seeba la yɛla
14 Seeba da gilig Israel buudi la wʋsa paae Abɛl-Bet-Maaka ka dɔl Beer dim sʋ'ʋlimin la wʋsa, ka ba la'as taaba dɔl o. 15 Zabzabidib banɛ da bɛ Joab san'an la wʋsa da kena gilig Seeba nɛ Abɛl-Bet-Maaka. Ka vaae tanni pɛ'ɛl bʋmbɔk kanɛ gilig teŋ la zaŋguom la, ka yʋ'ʋn pin'ili nwɛ'ɛd zaŋguom la ye ba da'ae li bas. 16 Pu'a kanɛ an ya'am sɔb da naam tempʋʋgin la buol ye, “Kɛlisimi, kɛlisimi! Yɛlimi Joab ye o kem kpɛla na ka m pian' tis o.” 17 Ka o kena kpa'ad pu'a la ka o bu'os ye, “Fʋnɛ an Joab laa?” Ka o lɛbis ye, “Manɛ la.” Ka o yɛl ye, “Kɛlisim! Man kanɛ aan fʋ tʋmtʋm la mɔr si'el ye m yɛlif.” Ka o lɛbis ye, “M kɛlisid.” 18 Ka o keŋ tuonnɛ yɛl ye, “Yʋʋmpʋkʋda saŋa la ba da yɛl ye, fʋ ya'a bɔɔd ye fʋ gban'e fʋ pian'ad gbin, fʋn kem Abɛl teŋin ka li na maal. 19 Tinamɛ an sumbʋgʋsʋm nɛ sida dim Israel pʋʋgin. Bɔ ka fʋ bɔɔd ye fʋ san'am teŋ kanɛ nwɛnɛ Israel dim wʋsa ma la? Bɔ ka fʋ mɔɔd ye fʋ faaɛn teŋ kanɛ an Zugsɔb la dinnɛ?” 20 Ka Joab lɛbis ye, “Wina'am da kɛɛ! Waii, Win da kɛ ka m san'ami lii! 21 Li ka' alaa, amaa dau sɔ' ki'is Na'ab David nɔɔr ka zɔɔ kpɛn' ya teŋin la, o yʋ'ʋri buon Seeba ka o saam an Bikir onɛ yi Efiram dinɛ an kʋkʋna teŋ la: zaŋimi dau yinne kaŋa tisim ka m na bas teŋ la.” Ka o lɛbis o ye, “Dim suguru ka ba na fi'ig o zugʋ lɔb ka li gaŋ zaŋguom la tisif.” 22 Ka pu'a la keŋ nidib la wʋsa san'an nɛ o ya'am sa'alʋg la, ka ba fi'ig Seeba onɛ an Bikir biig la zugʋ lɔbigi tis Joab. Ka o pieb na'atan ka o nidib la wʋsa widig ka bas teŋ la ka ba wʋsa lɛbi kuli ba yaan, ka Joab mɛ lɛb Na'ab la san'an Jerusalem.
David ninkpi'ema la yɛla
23 Joab n da sʋ'oe Israel wʋsa zabzabidib la, ka Benaya onɛ an Jehoyada biig la sʋ'oe Keret dim nɛ Pelet dim. 24 Adoniram da sʋ'oe tʋmtʋmnib la, ka Jehosafat onɛ an Ahilud biig la sʋŋid gbauŋ sɔbid la. 25 Seeva da anɛ gbauŋ sɔbid, ka Zadok nɛ Abiata an maanmaannib. 26 Ira onɛ an Jair nid la da an David mɛŋ maanmaan.