2 Samuel 19

Joab n tans na'ab David la yɛla

1 Ba da yɛl Joab ye, “Na'ab la kummi ka fabinnɛ o biig la yɛla.” 2 Daakan la zabzabidib la sumalisim la da lieb nɛ sʋnsa'aŋ, bɔzugɔ ban da wʋm ka ba yɛl ye, “Na'ab la maan nɛ sʋnsa'aŋ o biig la yɛla la.” 3 Nidib la da lɛb tempʋʋgin nwɛnɛ nimbanɛ keŋ zaba ka ba kadi ba ka ba di nyan ka zɔnɛ. 4 Na'ab la da lusi o nindaa ka kaasidi agɔla gɔla ye, “Oi, m biig Absalɔm! Oi, m biig Absalɔm! Oi, m biigaa!” 5 Joab da duoe keŋ Na'ab la san'an ka yɛl ye, “Zina fʋ diisi fʋ nidib la wʋsa nyan, banɛ zabɛ faaɛn fʋ nyɔvʋr nɛ fʋ biis nɛ fʋ pu'ab nɛ fʋ pu'abibis nyɔvʋr la. 6 Fʋ nɔŋ nɛ banɛ kisif ka yaae banɛ nɔŋif. Zina fʋ pa'alya nyain ye fʋ zabzabidib nɛ tuongatib nɛ ba nidib la anɛ zaalim fʋ tuon. Fʋ gɔs ka Absalɔm ya'a vʋe ka tinam wʋsa kpi zina li an sʋm. 7 Duom nannanna yi kpɛmisi fʋ nidib la. M pɔya nɛ Zugsɔb la ye zina fʋ ya'a pʋ duoe yii, sɔ' kʋ lɛn kpɛlimi fʋ san'an paae yʋ'ʋŋɔ. Ka tɔɔg kanɛ ka fʋ na nyɛ la na gaad dinɛ ka fʋ nyɛ fʋ na'akinnim saŋa hali ti paae zina.” 8 Ka Na'ab David duoe keŋ zin' o zin'isirin za'anɔɔrin la. Ban da yɛl nidib la ye, “Na'ab la zin' za'anɔɔrin la,” ba wʋsa da la'asi kɛɛn o san'an na.

David lɛbi di'e o na'am

Saŋkan la Israel dim banɛ da dɔl Absalɔm la da pʋn zɔɔ kuli ba yaan. 9 Israel buudi la wʋsa, nidib la da nwa'asid nɛ taaba yɛt ye, “Na'ab David da yisi ti, ti dataas la nu'usin ka an onɛ faaɛn ti Filistia dim nu'usin, amaa nannanna o zɔya ka bas teŋ la Absalɔm yɛla. 10 Absalɔm onɛ ka ba daa bu'oe malʋŋ kpaam niŋ o zugʋ diis o na'am ye o guri ti la kpi zaba la ni: bɔɔ na kɛ ka ti kʋ lɛm mɔr Na'ab la lɛbis na?” 11 Na'ab David mɛ da tʋm yɛl Zadok nɛ Abiata banɛ an maanmaannib la ye, “Yɛlim Juda kpɛɛmnam la ye, ‘Bɔzug ka hali nɛ nwa ka yanam pʋ siak ye man onɛ aan ya Na'ab la lɛb na? Man wʋm ye Israel dim pʋn siak ye m lɛb na ka yanam ma'aa zan'as. 12 Ya anɛ m ba'abiis, mam mɛŋ ziim, ka bɔzug ka ya nam pʋ siak ye m lɛb na?’ 13 Ka yɛl Amasa ye, ‘Fʋ ka'anɛ mam mɛŋ ziim? M ya'a pʋ di'e zabzabidib kpɛɛm la Joab san'ani tisi fɔ, Wina'am on bu'osim.’ ” 14 Ban da wʋm ala la Juda dim wʋsa ya'am da fɛndig ya ka li nwɛnɛ nid yinne nɛ, ka ba tʋm yɛl Na'ab la ye, “Fʋn nɛ fʋ nidib la wʋsa lɛm na.” 15 Ka Na'ab la lɛbi keŋ hali paae Joodan kɔlʋgin na, ka Juda dim keŋ Gilgal teŋin ye ba tʋ'ʋs Na'ab la ka mɔr o lɔ'ɔŋ Joodan kɔldaug la. 16 Simie, onɛ an Gera biig ka an Benjamin nid ka yi Bahurim teŋin na la da duoe tɔ'ɔtɔ dɔl Juda dim ye ba tʋ'ʋs Na'ab David. 17 Banɛ da bɛɛ o san'an la da anɛ Benjamin nidib tusir, nɛ Ziba onɛ an Saul tʋmtʋm nɛ o biribis pii nɛ anu nɛ o yammis pisi. Ba wʋsa da zɔɔ paae Joodan kɔlʋgin, Na'ab la bɛ zin'isi'a la. 18 Ba da lɔ'ɔŋ kɔldaug la zin'ikanɛ pʋ zulim la ye ba nɔk Na'ab la nɛ o yidim wʋsa, ka maal linɛ wʋsa ka o bɔɔd.

Simie onɛ an Gera biig la mɛ da lɔ'ɔŋ Joodan la ka igin teŋin Na'ab la tuon 19 ka yɛl o ye, “Naa, m zugdaana, kɛlli m taali bas, ka da tɛn'ɛsid bɛ'ɛd linɛ ka man kanɛ aan fʋ tʋmtʋm daa tʋm, daakanɛ ka fʋ yit Jerusalem la! Na'aba, yisimi li fʋ pʋtɛn'ɛrin! 20 Na'aba, mam baŋ ye m tʋm bɛ'ɛd, din ka man dɛŋi gaad Josef yidim la wʋsa tuonnɛ kena ye m tʋ'ʋsif, m zugdaana.” 21 Abisai onɛ an Zeruyia biig la da yɛl ye, “Nɛ lin wʋsa, li nar ye ba kʋ Simie on maal si'el la zug! O pɔ nɔɔrɛ tis onɛ ka Zugsɔb bu'oe malʋŋ kpaam niŋ o zug la.” 22 Na'ab David da lɛbis ye, “Man nɛ yanam nɔɔr yinne an bɔ, yanam banɛ an Zeruyia biisɛ? Ya bɔɔd ye ya ienɛ yɛla tisim! Li sʋm ye ba kʋ sɔ' Israel teŋin zinaa? Man mi' ye zina m anɛ Israel wʋsa Na'ab.” 23 Ka Na'ab la lɛn yɛl Simie ye, “Fʋ kʋ kpii.” Ka yɛl nɔɔri zi'el ye sɔ' da si'is oo.

24 Mefibosef onɛ an Saul yaaŋ la mɛ da keŋ ye o tʋ'ʋs Na'ab la. O da pʋ lɛn sʋʋd, bɛɛ kiesid o tieŋ bɛɛ pied o fuugɔ, din pin'il Na'ab la yi daasi'el la, hali ti paae daakanɛ ka o lɛb nɛ laafi la na. 25 On yi Jerusalem kena ye o tʋ'ʋs Na'ab la, Ka na'ab la bu'os o ye, “Bɔ ka fʋ daa pʋ dɔllimi keŋɛ, Mefibosef?” 26 Ka o lɛbis o ye, “Ayei, m zugdaan onɛ an m Na'aba, man kanɛ aan fʋ tʋmtʋm la anɛ pɔn'ɔr, ka m gban'e m pʋtɛn'ɛrin ye m na gban'e m buŋi ban'a dɔllif, amaa Ziba onɛ aan m tʋmtʋm la ma'am, 27 ka kena gbi'i m yɛla fʋ san'an, m zugdaana. Na'aba, fʋ nwɛnɛ Wina'am maliak nɛ; alazugɔ tʋm linɛ an sʋm tisif, m zugdaana. 28 Naa, tinam banɛ an Saul biis nɛ o yaas la wʋsa narin nɛ fʋn na kʋʋ ti, amaa fʋ gaŋ mam tisim suor ye m dit nɛ banɛ diti fʋ diib zin'igin la, m zugdaana. Alazug suobɔ ka man mɔri na lɛn sɔs si'el fʋn kanɛ an na'ab la san'anɛ?” 29 Ka Na'ab la yɛl o ye, “Bɔ ka fʋ pian'ad bɛdegʋ? M yɛl fʋn nɛ Ziba ye ya pʋdigim pɔɔd la.” 30 Mefibosef da yɛl Na'ab la ye, “Naa, m zugdaana, kɛl ka o nɔk si'el wʋsa, fʋn sadigim kul nɛ laafi la na.”

31 Barizila onɛ an Gilead nid la mɛ da yi Rogelim na, ye o dɔl Na'ab David n lɔ'ɔŋ Joodan kɔldaug la zi'el o suor. 32 Barizila da anɛ bʋnkʋdʋg ka an yʋma pisnii. Onɛ da gɔsid Na'ab la on da bɛ Mahanam teŋin la, bɔzugɔ o da anɛ onɛ an bʋmmɔr. 33 Na'ab la da yɛl Barizila ye, “Lɔ'ɔŋim na dɔllim ka ti keŋ Jerusalem ka m na mɔrif.” 34 Amaa Barizila da lɛbis Na'ab la ye, “Naa, mam na lɛn vʋe yʋma ala, ka li nar ye m dɔlli fʋ keŋ Jerusalem? 35 Man anɛ yʋma pisnii nannanna, man na lɛm baŋ dinɛ an sʋm bɛɛ bɛ'ɛdi bakɛɛ? Man onɛ aan fʋ tʋmtʋm la na lɛn nyaŋi baŋ diib bɛɛ bʋnnuuda banɛ malisaa? Dap bɛɛ pu'ab ya'a yʋ'ʋm man na lɛn wʋmm? Ayei! Bɔ ka m lɛn lɛbigid ziidi tisid fʋn na'ab onɛ aan m zugdaan la? 36 M na dɔlli fʋ lɔ'ɔŋ Joodan kɔldaug la lalig bi'ela: bɔ ka li nar ye fʋ yɔ man anwana wʋsa? 37 Kɛl ka m lɛb ka kpii m mɛŋ teŋin, zin'ikanɛ kpi'e m ba' nɛ m ma yaad la. Amaa m biig Kimham nwa, kɛl ka o lɔ'ɔŋi dɔlli fʋ keŋ, ti zugdaan onɛ an Na'aba. Naa, maalim dinɛ wʋsa ka fʋ tɛn'ɛs ka li na an sʋm la tis o.” 38 Ka Na'ab lɛn yɛl ye, “Tɔ, m siakya! Kimham na dɔllimi lɔ'ɔŋ, ka m na maal dinɛ na malisi fʋ tis o. Ka fʋn bɔɔd si'el wʋsa m san'an, m na maali tisif.” 39 Ka nidib la wʋsa lɔ'ɔŋ Joodan, ka Na'ab la mɛ lɔ'ɔŋ. Ka Na'ab la pʋ'ʋs Barizila sʋ'ʋŋa ka niŋ o zug bareka, ka Barizila lɛbi kul. 40 Na'ab la lɔ'ɔŋi paae Gilgal la, Kimham da dɔlli lɔ'ɔŋ. Juda zabzabidib la wʋsa nɛ Israel zabzabidib la pʋsʋk da dɔl Na'ab la lɔ'ɔŋ.

Juda nɛ Israel dim nwa'as David yɛla

41 Li da pʋ yuugɛ ka Israel dim la ken David san'an na ka yɛt o ye, “Naa, bɔ ka ti ba'abiis Juda dim la nɔkif nɛ fʋ yidim wʋsa nɛ fʋ nidib la lɔ'ɔŋ Joodan kɔldaug la, ka pʋ yɛli ti?” 42 Ka Juda dim wʋsa lɛbis Israel dim la ye, “Linɛ kɛ ka ti tʋm nɛ'ɛŋa la anɛ ye, tinam nɛ Na'ab la kpin nɛ taaba. Bɔ ka ya sʋnya pɛlig nɛ'ɛŋa yɛla? Ti di nɛ Na'ab si'el bɛɛ? Bɛɛ ti nɔknɛ si'el ye ti sʋ'oe ya?” 43 Ka Israel dim la lɛbis Juda nidib la ye, “Ya mɛŋ mi' ye tinam mɔr dɔɔd piiga Israel buudi la ni, ka li nar ye ti sʋ'oe Na'ab David n gati ya, ka bɔzug ka ya nɛ'ɛsidi ti wala? Ka' tinamɛ daa dɛŋi pian' yiiga ye ti na mɔr Na'ab la lɛb naa?” Amaa Juda dim la daa maligim pian'ad pian'ayaalisi tisid Israel dim la.