<<    <     2 Samuel     18     >    >> 
Efiram zuorin zaba yɛla
18
1 Na'ab David da la'as nimbanɛ bɛɛ o san'an la, ka gaans tuongatib ka ba sieba sʋ'oe nidib tusir-tusir ka sieba sʋ'oe nidib kɔbig-kɔbig. 2 David da pʋdig zabzabidib la zin'isa atan' ka ba tuongatib an Joab, nɛ o pitʋ Abisai onɛ an Zeruyia biig la, nɛ Ittai onɛ an Gaf nid la. Ka Na'ab la yɛl zabzabidib la ye, “Bi'esʋg kae, asɛɛ mam dɔlli ya keŋ.” 3 Amaa nidib la da yɛl ye, “Li pʋ nar ye fʋ yii; ba ya'a ti kadi ti ka ti zɔt, ba ba'a kʋ bɛ nɛ tinama, hali baa ti pʋsʋk ya'a kpii ba ba'a kʋ bɛɛ, amaa fʋn gat tinam tusa piiga. Li na an sʋm nɛ fʋn na bɛ tempʋʋgin la ka sʋŋidi ti.” 4 Ka Na'ab la lɛbis ye, “Bʋn linɛ wʋsa ka ya tɛn'ɛs ka li an sʋm m na maal.” Ka o duoe zi'e za'anɔɔr la baba ka nidib la yʋ'ʋn pʋdigi yit, kɔbig-kɔbig nɛ tusir-tusir. 5 Na'ab la da yɛl Joab nɛ Abisai nɛ Ittai ye, “Mam zugɔ, gu'usimi nɛ m biig, Absalɔm yɛla.” Zabzabidib la wʋsa da wʋm Na'ab la tis tuongatib la nɔɔr Absalɔm yɛla si'em la. 6 Ka nidib la yii keŋ zaba zin'igin la ye ba zab nɛ Israel dim. Zaba la da zab nɛ Efiram sian'arin la. 7 Anina ka David nidib la da nyaŋ Israel dim la. Banɛ da kpi daakan la da anɛ ninkpi'ema tusa pisi. 8 Zaba da yadig teŋ la wʋsa, ka nimbanɛ zɔɔ kpɛn' sian'akʋdigin la kpi, da gaad banɛ ka ba zabi kʋʋ ba la.
Joab n kʋ Absalɔm la yɛla
9 Absalɔm da keŋ di'ig David nidib la. O da ban'adnɛ wief, ka zɔ nɛ wief la keŋ kpɛn' titita'ar gbinnin, ka tiig la wila gban'e Absalɔm zug, ka o ya'ae tiig la zugʋ yuulim ka wief la kpɛm bɛ zɔɔgin. 10 Ka nidib la yinne nyɛ la, o yɛl Joab ye, “Mam nyɛ Absalɔm ka o ya'ae tiig zug.” 11 Ka Joab bu'os o ye, “Fʋ ye fʋ nyɛɛ o? Bɔ ka fʋ pʋ kpɛn kʋns o anina tabil teŋinɛ kʋʋ o? Mam naan tisi nɛf yɔɔd anzurifa piiga ka lɛn tisif zabzabid sɛnbidiŋ.” 12 Amaa dau la da lɛbis ye, “Hali baa fʋ ya'a maki li tusiri niŋi m nu'ugin, man kʋ ʋki m nu'ugʋ si'is na'abiig laa. Ti tʋba ni ka ti wʋm ka na'ab tisidif nɔɔr, fʋn nɛ Abisai nɛ Ittai ye, ‘Mam zugɔ da si'isi m biig Absalɔm nɛ.’ 13 M ya'a kuosini m nyɔvʋri kʋ Absalɔm ka Na'ab la wʋm ka di lieb yɛl, fʋ kʋ siaki zi'enɛ m nya'aŋa.” 14 Ka Joab lɛbis o ye, “M kʋ san'am saŋa zi'e kɛlisid dabiem pian'adɛ!” Ka nɔk kpana atan' keŋ ka o nan vʋe ka ya'ae tiig la zug, ka o kʋns Absalɔm nyɔ'ɔg. 15 Ka nidib piiga banɛ ziid Joab zaba la'ad la zɔɔ gilig Absalɔm nwɛ' o kʋ. 16 Ka Joab pieb na'atan ka zabzabidib la bas ka pʋ lɛn kad Israel dim la, Joab n da buoli ba la zug. 17 Ka ba nɔk Absalɔm lɔb bʋmbɔk tita'ar pʋʋg sian'arin la, ka vaae kuga lɔbi bʋʋl o, ka Israel dim la zɔɔ kuli ba yaan.
18 Absalɔm nyɔvʋr bɛllim saŋa la o da kpi'e kugiri zi'el Na'ab Bɔn'ɔgin la. O da tɛn'ɛs ye, “Man pʋ mɔr biribis ka ba na pʋdigi m yʋ'ʋr bɛogɔ.” Ka nɔk kugir la zi'el ka pʋdi li o mɛŋ yʋ'ʋr, ka ba buon ani ye, Absalɔm Tiɛnr Zin'ig hali paae zina.
David sʋnsa'aŋ yɛla
19 Saŋkan la Zadok biig Ahimaaz da yɛl ye, “Kɛl ka m zɔɔ keŋ yɛl Na'ab la ye, Zugsɔb la yis o, o dataas la nu'usin.” 20 Ka Joab yɛl o ye, “Ka' fʋnɛ na mɔr labakaŋa zina keŋɛ: fʋ na tun'e mɔr labaari keŋ saŋa si'a amaa ka' zina, bɔzugɔ Na'ab la biig kpiya.” 21 Joab da yɛl dau sɔ' onɛ yi Kus na ye, “Kem yɛl Na'ab la fʋn nyɛ si'el.” Ka dau la igin Joab tuon ka zɔɔ keŋ. 22 Ahimaaz da lɛn yɛl Joab ye, “M bɛlimnɛ, li ya'a an si'em wʋsa kɛl ka m zɔɔ dɔl Kus dim dau la nya'aŋ.” Ka Joab lɛbis o ye, “M dakɔɔnrɛ, bɔ ka fʋ bɔɔd ye fʋ keŋɛ? Labakaŋa ka' dinɛ na tisif yɔɔdɛ.” 23 Ka o lɛbis ye, “La'am nɛ lin wʋsa, kɛl ka m zɔɔ keŋ.” Joab da lɛbis ye, “Ka zɔm!” Ka Ahimaaz zɔɔ dɔl zin'ikanɛ an paalʋ la gaad Kus dim dau la tuon.
24 David da yina zin' za'anɔɔr kanɛ bɛ pʋʋgin la nɛ za'anɔɔr kanɛ bɛ yiŋ la teŋsʋk ka onɛ gur la dɔlis zaŋguom za'anɔɔr la baba dʋ dɔɔg la zug. Ka gɔsi nyɛ dau sɔ' ka o zɔti o kɔn'ɔkɔn'. 25 Ka onɛ gur la buol Na'ab la yɛl o. Ka Na'ab la yɛl ye, “O ya'a aan o kɔn'ɔkɔn' alaa o mɔri labasʋŋʋ kenna.” Ka dau la zɔti li'en na. 26 Ka onɛ gur la lɛn nyɛ dau sɔ' ka o zɔti kenna ya'as. Ka o buol onɛ gur za'anɔɔr la ye, “Gɔsima, dau sɔ' zɔti o kɔn'ɔkɔn' ya'as!” Ka Na'ab la yɛl ye, “On mɛ na mɔr nɛ labasʋŋʋ kenna.” 27 Ka onɛ gur la yɛl ye, “Man gɔs ka onɛ gaad tuon la zɔɔg la nwɛnɛ Ahimaaz onɛ an Zadok biig la nɛ.” Ka Na'ab la lɛbis ye, “O anɛ ninsʋŋ. O na mɔr labasʋŋ na.” 28 Ka Ahimaaz paae na buol Na'ab la yɛl ye, “Si'el wʋsa an sʋ'ʋŋa!” Ka igin Na'ab la tuon ka su'uni o nindaa teŋin ka yɛl ye, “Zugsɔb Wina'am yʋ'ʋr paamim zun'or, o yis nimbanɛ duoe zi'e m zugdaan onɛ aan m Na'ab yɛla la.” 29 Ka na'ab la bu'os ye, “Ka m biig Absalɔm, o yi laafii?” Ka Ahimaaz lɛbis ye, “Joab n pa'a tʋmim saŋsi'a la, zin'ig la pa'a dammidnɛ, amaa man zi' dinɛ maalɛ.” 30 Kana la yɛl o ye, “Zi'enim kpikpɛŋ ka gu'us.” Ka o lɛb kpikpɛŋi zi'en. 31 Ka Kus nid la paae na yɛl ye, “M Zugdaan onɛ an Na'aba, kɛlisim labasʋŋ! Fʋ Zugsɔb Wina'am yisif zina nimbanɛ duoe zi'e fʋ yɛla la nu'usin.” 32 Ka Na'ab la bu'os Kus dim dau la ye, “Ka m biig Absalɔm, o yi laafii?” Ka Kus dim dau la lɛbis ye, “Naa, li an sʋm ka banɛ wʋsa duoe zi'e bɔɔd ye ba san'amif la naae nwɛnɛ na'akimbil nwa nɛ!” 33 Ka na'ab la kirid, ka dɔl za'anɔɔr la kpɛn' dɔɔgin kum. On ken la, ka yɛt ye, “O, m biig Absalɔm! M biigaa, m biig Absalɔm, man ya'a pʋn kpiin ka fʋn lɛɛ kpɛlim li naan kʋ sɔn'ɔnɛɛ, Absalɔm m biiga! M biigaa!”