Ban di'e Husai sa'alʋg ka basi Ahitofel la
17
1 Ahitofel da yɛl Absalɔm ye, “M na gaŋ dap tusa pii nɛ ayi' ka ti yii kad David bugir zina yʋ'ʋŋa. 2 M na zab nɛ o saŋkan ka o ti gɛn ka paŋ kae la. M na kpɛn'ɛs o dabiem ka nimbanɛ bɛɛ o san'an la zɔ. M na nwɛ' nɛ na'ab la ma'aa kʋ o, 3 ka mɔr nimbanɛ kpɛlim la lɛb na tisif. Fʋn bɔɔd ye fʋ kʋ dau sɔ' la ya'a kpi, li na kɛ ka nidib la wʋsa na lɛbi fʋ san'an na wʋʋ pu'a-ɛliŋi kunnɛ o sid yir nɛ sumalisim si'em la. Nid baa yinne kʋ paam dɛŋŋa.” 4 Absalɔm nɛ Israel kpɛɛmnam la da nyɛ ka gban'akaŋa nwɛnɛ li an sʋm tisi ba. 5 Amaa Absalɔm da yɛl ye, “Buolim Husai onɛ an Arik nid la ka ti wʋm on mɔr si'el ye o yɛl.” 6 Ka Husai n paae na la ka Absalɔm yɛl o ye, “Ahitofel n tisi ti sa'al kaŋa, ti niŋim wʋʋ on yɛl si'em laa? Ya'a ka' ala, fʋn tisimi ti fʋ pʋtɛn'ɛre gban'e si'em.” 7 Ka Husai lɛbis Absalɔm ye, “Sa'al kanɛ ka Ahitofel tis la ka' sʋm saŋa kaŋaa. 8 Fʋ mi' ye fʋ saam la nɛ o nidib la anɛ zabzabidib amɛŋa. Ba nwɛnɛ mɔɔgin bʋnyua kanɛ ka ba gban'e o biis nɛ. Fʋ mi' ye fʋ saam la mi' zaba hali. O kʋ siaki la'as nɛ o zabzabidib la gbɛɛn. 9 Hali anwaa o su'anɛ tampinlɛma ni, bɛɛ o tɔɔm keŋ bɛ zin'isi'a. O ya'a pin'ili zab nɛ fʋ zabzabidib la yiiga ka kʋʋ ba sieba, nidib la wʋsa na wʋm ka yɛl ye ba kʋ Absalɔm zabzabidib la bɛdegʋ. 10 Li ya'a niŋi ala, hali baa zabzabid kanɛ sʋnfʋ kpi'em wʋʋ gbigim la, dabiem na kpɛn' o ka o ya'am wʋsa bɔdig. Bɔzugɔ Israel dim wʋsa mi' ye fʋ saam la anɛ zabzabid, ka banɛ bɛɛ o san'an la mɛ an sʋnkpi'euŋ dim. 11 Man sa'alʋg anɛ nwa: Kɛl ka Israel dim wʋsa la'asi fʋ san'an na, din yi Dan keŋ paae Beerseba, ka ba na zu'oe nwɛnɛ atɛuk nɔɔrin titanbin'isʋg nɛ. Ka fʋ mɛŋ na gaad tuon zaba la ni. 12 Ala ka ti ya'a nyɛɛ o zin'isi'a wʋsa ti na zab nɛ o, ti na lii o zugin nwɛnɛ mɛligim lit teŋin si'em la. On nɛ o nidib la baa yinne kʋ yii. 13 O ya'a lɛn zɔ nɛ keŋ kpɛn' tempʋkanɛ ka ba mɛ' zaŋguomi gilig la, Israel dim wʋsa na mɔr nwiisi kena vɛ'ɛgi li sigis bɔn'ɔgin, hali ka sɔ' kʋ nyɛɛ li yaama baa bi'elaa.” 14 Absalɔm nɛ Israel dim la wʋsa da yɛl ye, “Husai onɛ an Arik nid la sa'alʋg la an sʋm gat Ahitofel sa'alʋg la.” Zugsɔb la mɛŋi da gban'e ye o san'am sa'al sʋŋ dinɛ ka Ahitofel sa'al la, ka kɛ ka yɛltɔɔg li Absalɔm zugin.Husai sa'alʋg la da faaɛn David si'em
15 Husai da yɛl Zadok nɛ Abiata banɛ an maanmaannib la, Ahitofel n sa'al Absalɔm nɛ Israel kpɛɛmnam la ban na niŋ si'em, ka lɛn yɛli ba on mɛŋi tiaki sa'ali ba si'em. 16 Ka yɛli ba ye, “Nannanna tʋm tɔ'ɔtɔ yɛl Na'ab David ye o da gbɛn kɔlig la zin'ikanɛ ka ku'om pʋ zulim laa. O lɔ'ɔŋim ka da gʋ'ʋŋɛ. Ya'a ka' ala, na'ab nɛ nimbanɛ bɛɛ o san'an la ba na kʋʋ ba wʋsa.” 17 Jonatan nɛ Ahimaaz da bɛ nɛ Een-Rogel teŋin. Ba da tʋm tʋmtʋm pu'ak wʋʋ ban pʋn gban'e si'em la, ye o keŋ yɛli ba, ka ban mɛ keŋ yɛl Na'ab David. Ba da pʋ bɔɔd ye ba kuosi ba mɛŋi kpɛn'ɛd tempʋʋgin la ka nidib nyɛti baa. 18 Amaa na'akimbil sɔ' da nyɛ babayi' la ka keŋ yɛl Absalɔm, ka ba baŋ ka yi tɔ'ɔtɔ keŋ dau sɔ' yin Bahurim teŋin. O da mɔr bulig zakin la, ka ba sigi pʋʋgin. 19 O pu'a da nɔk bulig la liŋe pibil bulig la nɔɔr, ka yadig kibielim li zug, ka sɔ'ɔsɔ pʋ baŋɛ. 20 Absalɔm nidib la paae pu'a la yin na la ba bu'os o ye, “Ahimaaz nɛ Jonatan bɛ yaanɛ?” Ka pu'a la lɛbisi ba ye, “Ba lɔ'ɔŋ kɔlig la.” Ka dap la iee ba zin'igi gʋ'ʋŋ, ka lɛb Jerusalem. 21 Dap la lɛb la nya'aŋ, ka babayi' la dʋ na keŋ yɛl Na'ab David. Ba da yɛl o ye, “Duom lɔ'ɔŋ kɔldaug la tɔ'ɔtɔ. Ahitofel sa'al Absalɔm nɛ o kpɛɛmnam la ban na niŋ si'em ka nyaŋi gban'af.” 22 Ka David nɛ nimbanɛ bɛɛ o san'an la duoe lɔ'ɔŋ Joodan kɔldaug la. Bɛogʋ ti nie la ka ba wʋsa pʋn gaad Joodan kɔldaug la ka sɔ' pʋ lɛn kpɛlim. 23 Ahitofel n nyɛ ka ba pʋ dɔlli o sa'alʋg la, ka o bɔbi o buŋi ban'a kuli o mɛŋ teŋin. On paae la, o maali o yir la sʋ'ʋŋa ka yʋ'ʋn yul o mɛŋi kpi, ka ba mum o, o saam yaʋgʋn.
Absalɔm n kat David la yɛla
24 David da keŋ nɛ Mahanam teŋin, ka Absalɔm lɔ'ɔŋ Joodan n kat o bugir, on nɛ Israel dim wʋsa. 25 Absalɔm da gaŋnɛ Amasa o zabzabidib la ni ye o di'e Joab zin'ig. Amasa da anɛ dau kanɛ yʋ'ʋri buon Jeta la biig. Jeta da anɛ Isimael nid ka o pu'a yʋ'ʋr buon Abigel onɛ an Nahas pu'ayua. Abigel da anɛ Zeruyia pitʋ, Zeruyia mɛ da anɛ Joab ma. 26 Israel dim nɛ Absalɔm da la'as nɛ Gilead teŋgbauŋʋn.
Ban maal zuod nɛ David la yɛla
27 David n da paae Mahanam la, Soobi nɛ Makir nɛ Barizila da bɛɛ ani. Soobi da anɛ Nahas biig ka yi Rabba teŋin na ka an Ammon nid, ka Makir mɛ an Ammiel biig ka yi Lo-Debaa teŋin na, Barizila da anɛ Gilead nid ka yi Rogelim teŋin na. 28 Ba da mɔr sɔna nɛ laas nɛ dʋgid, ka mɛ mɔr ki nɛ mui la'am nɛ zɔm nɛ kawɛnsɛn'ɛda, hali nɛ bɛŋa nɛ saazi. 29 Ka mɔr siind nɛ bin'iskpaam nɛ pɛ'ɛs nɛ bin'isgbisidim wʋsa na tis David nɛ o nidib la ye ba di. Bɔzugɔ ba da mi' ye nidib la gɛnnɛ ka kɔ'ɔm nɛ ku'onuud mɔri ba.