Mefibosef tʋmtʋm Ziba yɛla
16
1 Na'ab David n da keŋ lalig bi'ela tʋʋgi paae kʋkʋn la zug la, o da nyɛ Ziba onɛ an Mefibosef tʋmtʋm la, ka o zi'e gur o ka mɔr bʋmis ayi' ka ba ziid bodobodo gbila kɔbisyi', nɛ tiis wala ka ba gbilim ban kɔbiga, nɛ kekamgbila kɔbiga, nɛ daam gan'ar. 2 Ka Na'ab la bu'os Ziba ye, “Fʋ mɔr nɛ'ɛŋa wʋsa kena ye fʋ niŋ bɔ?” Ka Ziba lɛbis ye, “M mɔr bʋmis la kena ye na'ayidim mɔri ban'ad. Bodobodo nɛ bʋnwanna la anɛ na'ayidim diib, ka daam la mɛ an banɛ keŋ sian'arin gɛn la din ye ba nɔki nuu tɔ'ɔŋi ba giinla.” 3 Ka Na'ab la bu'os o ye, “Fʋ zugdaan Saul yaaŋ la bɛ ya?” Ka Ziba lɛbis ye, “O bɛ Jerusalem, bɔzugɔ o tɛn'ɛs ye, ‘Zina Israel dim na nɔki m yaab na'am lɛbisi tisim’ ” 4 Na'ab la da yɛl Ziba ye, “Dinɛ wʋsa an Mefibosef bʋn la anɛ fʋ din yʋ'ʋs.” Ka Ziba yɛl ye, “Naa, m pʋ'ʋsif bareka ka igin teŋin! Win na kɛ ka fʋ na'am la keŋ tuon! Kɛl ka m paae fʋ ya'am, m zugdaana.”Simie pɔ nɔɔri tis David la yɛla
5 Na'ab David n da li'en Bahurim teŋin la ka dau sɔ' onɛ an Saul tuŋ nid yina; o yʋ'ʋri da buon Simie ka o saam an Gera. Ka on yit na la ka pɔɔd nɔɔri tit David, 6 ka lɔbid on nɛ o na'ayikpɛm la wʋsa nɛ kuga, hali la'am nɛ banɛ an zabzabidib ka mi' zaba sʋ'ʋŋa bɛ David datiuŋ nɛ o dagɔbʋg la. 7 Simie da pɔɔd nɔɔr la ka yɛt ye, “Isigim sa, isigim! Gɔsim tuksɔb! Fʋ anɛ nimbɛ'og! 8 Zikanɛ ka fʋ kpa'ae Saul yin ka di'e o zin'ig la samme la ka Zugsɔb la yɔɔd. Zugsɔb la nɔk na'am la niŋi fʋ biig Absalɔm nu'ugin. Fʋ kennɛ san'auŋ bɔzugɔ fʋ anɛ ninkʋʋd!” 9 Ani ka Abisai onɛ an Zeruyia biig la yɛl Na'ab la ye, “Bɔzug ka bakpiilʋŋ kaŋa pɔɔdi m zugdaan onɛ aan m Na'ab la nɔɔrɛ? Kɛl ka m keŋ fi'igi o zug!” 10 Amaa Na'ab la da yɛl ye, “Nɔɔr yinne bɔ bɛ man nɛ yanam Zeruyia biis sʋʋginɛ? O ya'a pɔɔd nɔɔr ka li anɛ Zugsɔb la yɛl o ye o pɔɔm David nɔɔr, anɔ'ɔnɛ na nyaŋi bu'os o ye, ‘Bɔ ka fʋ maan nɛ'?’ ” 11 Ka David lɛn yɛl Abisai nɛ kpɛɛmnam la ye, “Mam mɛŋ biig onɛ an m niŋgbiŋ la ya'a mɔɔd ye o yis man nyɔvʋrɛ, onɛ an Benjamin dɔɔg nid na niŋ wala? Basimin o. Kɛlli ka o pɔɔe. Li anɛ Zugsɔb la yɛl o ye o niŋim. 12 Daasi'erɛ Zugsɔb la na nyɛ m sʋnsa'aŋ la ka lɛbis sʋm tisim, man di'e nɔpɔkaŋa zaalim-zaalim la.” 13 David nɛ o nidib la da kpɛn dɔl suor la ken, ka Simie mɛ dɛn'ɛd kʋkʋn la baba dɔl o ka lɔbid o nɛ kuga ka fɛn'ɛd o titan. 14 Na'ab la nɛ o nimbanɛ bɛɛ o san'an la da paae ba ken zin'ig la, ba gɛnnɛ hali. Ka zin'ini anina vʋ'ʋs.
Absalɔm n kpɛn' Jerusalem la yɛla
15 Absalɔm nɛ Israel nidib wʋsa da paae Jerusalem na, ka Ahitofel paasi dɔlli ba. 16 Ka Husai onɛ an Arik nid ka an David zua la kɛn Absalɔm san'an na ka yɛl o ye, “Na'aba, Wina'am na tisif nyɔvʋr wɔk! Naa, Wina'am na tisif nyɔvʋr wɔk!” 17 Ka Absalɔm bu'os Husai ye, “Fʋ sid daa nɔŋi fʋ zua laa? Bɔ ka fʋ pʋ dɔl o keŋɛ?” 18 Husai da yɛl Absalɔm ye, “Ayei, onɛ ka Zugsɔb la nɛ Israel dim wʋsa gaŋ la, on ka mam mi' ka na dɔl. 19 Dinɛ lɛm paas anɛ, anɔ'ɔn ka m na tʋm tisɛ? Li pʋ sʋm ye m tʋm tisif wʋʋ man daa tʋmi tisidi fʋ saam si'em laa? Alazug, m na tʋm tisif.”
20 Ka Absalɔm yɛl Ahitofel ye, “Sa'alimi ti, ti na niŋ wala?” 21 Ka Ahitofel yɛl o ye, “Gbɛɛm nɛ fʋ saam pu'abibis banɛ ka o bas ye ba gur na'ayir la. Ka Israel dim wʋsa na wʋm ye, fʋ kpɛn' fʋ saam nyɔnya ni galis, ka ya kʋ nyaŋi naal nɛ taaba ya'asɛ. Ka banɛ wʋsa dɔllif la na zi'en kiŋ-kiŋ.” 22 Ka ba ti' sʋgʋr na'ayir la dɔɔg zugʋ tis Absalɔm, ka o digin nɛ o saam pu'abibis la, Israel dim wʋsa nini ni. 23 Saŋkan la nidib la wʋsa da gɔs Ahitofel sa'alʋg ka li nwɛnɛ Wina'am mɛŋ-mɛŋ yɛlʋg. Alazug, David nɛ Absalɔm da pʋ di'emid nɛ dau nwa sa'alʋgɔ.