Absalɔm n mɔɔd ye o faaɛn o saam na'am la
15
1 Li da paae saŋa si'a ka Absalɔm da' zaba tɛreko nɛ widi ka bɔ nidib pisnu ka ba bɛɛ o tuon. 2 O da ɛɛnti duoe nɛ bɛogʋn keŋ zi'en suor kanɛ kpɛn'ɛd tempʋʋgin la kpikpɛŋ. Sɔ' ya'a mɔr o antu'a ken na'ayin ye o maal, Absalɔm na buol o sɔba bu'os ye, “Fʋ yi teŋ kanɛ na?” Ka o sɔb na yɛl o ye, “Na'abiiga, m yinɛ Israel dɔɔd la yinne ni na.” 3 Absalɔm na yɛl o ye, “Gɔsima, fʋ pian'ad la an sʋm ka dɔl suor, amaa sɔ' kae na'ayinne na kɛlisi fʋ pian'ad la tisi fɔ.” 4 Absalɔm na lɛn yɛl ye, “Ya'a nwɛnɛ ba gaŋnɛ man ka man an sariakat, onɛ wʋsa mɔr o pian'ad bɛɛ o yɛlsi'a, o sɔb naan kɛɛn man san'an na ka m tu'as sida tis o.” 5 Ka onɛ wʋsa daa li'el o igini o tuonnɛ pʋ'ʋs o nɛ girima, Absalɔm na tiɛn o nu'ugʋ gban'e o ka pʋ'ʋs o sʋ'ʋŋa. 6 Absalɔm da niŋidnɛ anwana tisid Israel dim wʋsa banɛ ken na'ab la yinɛ bɔɔd antu'a maalʋg. Ala ka o da fɛndig Israel dim ya'am lɛbi o san'an na. 7 Lin ti paae yʋma anaasi naar saŋa la, Absalɔm da yɛl na'ab la ye, “Naa, kɛl ka m keŋ Hebron n lɛbisi m nɔzi'elʋg. 8 Ka man da bɛ Gesur Aram teŋin la, m da zi'el nɔɔr ye, Zugsɔb la ya'a mɔrimi lɛb Jerusalem na, m na keŋ Hebron n wɔ'ɔg o.” 9 Ka Na'ab la yɛl o ye, “Kem nɛ sumbʋgʋsʋm.” Ka o duoe keŋ Hebron. 10 Absalɔm da su'a tʋm nidib Israel buudi la wʋsa ni yɛli ba ye, “Ya ya'a ti wʋm na'atan piebʋg, yanam yɛlim ye, ‘Absalɔm di na'am Hebron teŋin!’ ” 11 Nidib kɔbisyi' da naam Jerusalem biel Absalɔm. Ba da buoli ba nɛ ka ba keŋ an saam ka pʋ baŋ yɛl la gbinnɛ. 12 Absalɔm n da bɛɛ anina maan malʋŋ la, o mɛ da tʋm buol Ahitofel onɛ an Gilo nid, ka an onɛ sa'an Na'ab David la ye o kena. Gban'akaŋa da nyɛ paŋ, ka banɛ da dɔl Absalɔm la maligim nɔbigidi ken tuon.David n zɔɔ yi Jerusalem la yɛla
13 Sɔ' da kena yɛl David ye, “Nidib la ya'am lɛb nɛ Absalɔm san'an.” 14 Ka David yɛl o na'ayikpɛm banɛ da la'am bɛ nɛ o Jerusalem la ye, “Asɛɛ ka ti zɔ! Ya'a ka' ala Absalɔm kʋ kɛ ka ti sɔ'ɔsɔ yii. Asɛɛ ka ti yi nannanna; ya'a ka' ala, o ya'a paae ti kpɛla, tinam nɛ teŋ la wʋsa kʋ pɔnsɛ.” 15 Ka ba lɛbis ye, “Naa, ti anɛ fʋ yammis, ti ti'eb nɛ ye ti tʋm wʋʋ fʋn gban'e si'em la.” 16 Na'ab la da yina ken ka o yidim wʋsa dɔl o. Amaa o da bas o pu'abibis piiga ye ba gur na'ayir la. 17 Na'ab la da ken nɛ nɔba ka o nidib la wʋsa dɔl o. Ka ba keŋ lalig bi'ela zi'en. 18 Ka nidib la wʋsa kena gaadi o tuon, la'am nɛ Keret dim nɛ Pelet dim wʋsa, nɛ nidib kɔbisyuobʋ banɛ an Gaf dim ka da dɔl o yi Gaf na la. 19 Na'ab la da yɛl Ittai onɛ an Gaf nid la ye, “Bɔ ka fʋ dɔlli ti? Kem lɛb Na'ab Absalɔm san'an. Fʋ anɛ saan ka yii fʋ mɛŋ teŋin zɔɔ kpɛn' na. 20 Su'os ma'aa ka fʋ sa kena, li pʋ nar ye m kɛ ka fʋ dɔlli ti zɔti giligida. Mam mɛŋ zi' man ken zin'isi'a. Nɔkim nidib la lɛb, pʋpielim nɛ sida na dɔlli fʋ nya'aŋ.” 21 Amaa Ittai da lɛbis Na'ab la ye, “Naa, m zugdaana, ya'a an sida, fʋn bɛ zin'isi'a wʋsa, li ya'a anɛ kum bɛɛ vʋm, man onɛ aan fʋ tʋmtʋm la na bɛ.” 22 David da yɛl Ittai ye, “Tɔ, ka kem tuon!” Ka Ittai onɛ an Gaf nid la dɔl o nidib la keŋ tuonnɛ gaad, nɛ ba yidim la wʋsa. 23 Na'ab la nɛ o nidib la daa yit teŋin la, teŋ la nidib wʋsa daa kaas agɔla, gɔla pamm. Ka na'ab la lɔ'ɔŋ Kidron bɔn'ɔg la nɛ o nidib la wʋsa kennɛ kpa'ad sian'arin la.
Ban lɛbis Wina'am Daka la Jerusalem la yɛla
24 Zadok nɛ Abiata banɛ an maanmaannib la, nɛ Levi dim banɛ ziid Wina'am daka la, da la'am bɛɛ ani. Ka ba zi'el Wina'am daka la teŋin, ka Abiata maal maana hali ka nidib la wʋsa ti yi teŋin la naae. 25 Na'ab la da yɛl Zadok ye, “Nɔkim Wina'am daka la zii lɛb tempʋʋgin la; ka li ya'a an Wina'am bɔɔdim, o na mɔrimi lɛb na ka m nyɛɛ li nɛ o bɛllim zin'ig la ya'as. 26 Amaa o ya'a yɛl ye, o sʋnf pʋ malis nɛ mam, man ti'eb ya. Kɛl ka o tʋm dinɛ an sʋm tis o.” 27 Na'ab la da lɛn yɛl Zadok onɛ an maanmaan la ye, “Ka' fʋnɛ an onɛ mi' dinɛ saa na maal bɛog saa? Lɛm tempʋʋgin la nɛ sumbʋgʋsʋm, fʋn nɛ fʋ biig Ahimaaz nɛ Jonatan onɛ an Abiata biig la. Ka kɛ ka Abiata mɛ dɔlli ya lɛb. 28 Man na guri ya kɔldaug kanɛ bɛ sian'arin, zin'ikanɛ ka ku'om pʋ zulim la, ka ya ti tisim labaar.” 29 Ka Zadok nɛ Abiata nɔk Wina'am daka la lɛb Jerusalem zin'inɛ anina. 30 Amaa David da kpɛn ken nɛ dʋt Olif Zuor la zug ka kum. O da nɔk si'eli lus o zug ka ken nɔbteŋ. Nidib banɛ da dɔl o la wʋsa da lusi ba zut ka ken nɔbteŋi dɔl o ka kum. 31 Ba yʋ'ʋn da yɛl David ye, “Ahitofel paas banɛ gban'e pʋtɛn'ɛbɛ'ɛd nɛ Absalɔm la.” David da sɔs Wina'am ye, “M Zugsɔba, kɛl ka Ahitofel sa'alʋg lieb zɔlim.”
Husai lɛbig la yɛla
32 David da paae kʋkʋn zug, zin'ikanɛ ka ba pʋ'ʋsid Wina'am la, ka Husai onɛ an Arik nid la tʋ'ʋs o ka o fuud aans ka o zug an uusʋg. 33 Ka David yɛl o ye, “Fʋ ya'a dɔllim, fʋ na an ziidi tisim, 34 amaa fʋ ya'a lɛb tempʋʋgin ka yɛl Absalɔm ye, ‘Na'aba, m na aan fʋ tʋmtʋm. Saŋa kanɛ gaad la m daa anɛ fʋ saam tʋmtʋm, amaa nannanna m na aan fʋ tʋmtʋm.’ Ala ka fʋ na sʋŋim ka nyaŋi san'am Ahitofel sa'alʋg la. 35 Zadok nɛ Abiata pʋn dɛŋi bɛɛ anina na paasi fʋ zug. Yɛlimi ba dinɛ wʋsa ka fʋ wʋm na'ayin la. 36 Ahimaaz onɛ an Zadok biig la nɛ Abiata biig Jonatan bɛɛ ba san'an. Tʋmmi ba na nɛ fʋn wʋm labasi'a wʋsa.” 37 David zua Husai da lɛbi paae Jerusalem saŋa kanɛ ka Absalɔm kpɛn'ɛd tempʋʋgin la.