Absalɔm n lɛb Jerusalem na la
14
1 Joab onɛ an Zeruyia biig la da baŋ ye Na'ab la mɔr Absalɔm ya'amlɛog la, 2-3 o da tʋm sɔ' Tekoa teŋin ye o dɔl pu'a kanɛ an ya'am sɔbi bɛɛ anina la na. On paae na la, ka o yɛl o ye, “Yɛɛm kʋʋr fuud, ka da suoɛn kpaam, ka keŋ Na'ab la san'ani ma'aa ye fʋ kaasid nɛ kʋʋr. Maalimi fʋ mɛŋ wʋʋ pu'a kanɛ zaŋ dabisa bɛdegʋ maal sʋnsa'aŋ onɛ kpi yɛla.” Joab da pa'al o on na keŋ Na'ab la san'ani yɛl o si'em. 4 Ka Tekoa dim pu'a la paae Na'ab la san'an la, o iginnɛ ka o nindaa kpa' teŋ ye o tis o na'asi, ka yɛl ye, “Na'aba, sʋŋim!” 5 Ka na'ab la bu'os o ye, “Bɔɔ daamidi fɔ?” Ka o lɛbis ye, “Man sid kpinɛ ka m kilim pʋkɔɔnr. 6 Man kanɛ aan fʋ tʋmtʋm la mɔri biis ayi', ka ba keŋ pɔɔgine zab ka sɔ' kae anina na pansigi baa. Ka m biig yinne nwɛ' o tiraan la kʋ. 7 Nannanna, m sid nidib la wʋsa duoe nɛ zi'e m yɛla. Ba yɛl ye, ‘Tisimi ti bikanɛ kʋʋ o tiraan la ka ti mɛ kʋʋ o, o ba'abiig la nyɔvʋr yɛla! Ka o yi buudi la ni ka kʋ lɛn di faarɛ.’ M ya'a siak ka ba kʋʋ m biyimmir nwa, sɔ' lɛn kae na zi'eni m sid la nɛ o yidim zi'esiminɛ. Ti yʋ'ʋr na bɔdig dunia nwa zug.” 8 Ka Na'ab la lɛbis ye, “Kulim, ka m na maali fʋ yɛl la tisif.” 9 Amaa pu'a la yɛl o ye, “Naa, m zugdaana, fʋ ya'a sʋŋi maal yɛl nwa ka ba ye ba zɛrigif, man na siaki di'e li, man nɛ m nidib la, ka li kʋ kɛɛn fʋ san'an na, Na'aba.” 10 Ka Na'ab la lɛbis o ye, “Ayei, da kɛ ka lin paki fɔ! Ninkanɛ daamif, fʋn mɔr o na, ka m na kɛ ka o kʋ maligim daamif ya'asɛ.” 11 Ka o yɛl ye, “Alaa, Na'aba, pɔɔm nɛ fʋ Zugsɔb Wina'am la yʋ'ʋr ye fʋ kʋ kɛ ka sɔ' kʋʋ m biyimmir la yɔ sam, ka li kilim tukɔ.” Ka o yɛl ye, “Asida ka m yɛtif, nɛ Zugsɔb la yʋ'ʋr, hali fʋ biig la zuobʋg baa yinne kʋ li teŋa.” 12 Ka pu'a la lɛn yɛl ye, “Naa, dim suguru ka m lɛm bu'osif pian'ad yinne ya'as!” Ka o lɛbis ye, “Bu'osim!” 13 Ka pu'a la yɛl ye, Ka bɔzug ka fʋ siak ye fʋ na tʋm nɛ'ɛŋa tis mam, ka lɛɛ kʋ tʋmi ala tis Wina'am nidib wʋsa? Na'aba, fʋ pian'ad la gban'anɛ fʋ mɛŋ! Bɔzugɔ fʋ kadi fʋ biigi kpɛn'ɛs mɔɔg ka pʋ siak ye o kul naa. 14 Ti wʋsa na ba'asi kpi. Ti nyɔvʋya la nwɛnɛ ku'om na kpa'ae teŋin ka ti kʋ tun'e vaae la nɛ. Alazug ka ti ya'a tʋm linɛ ka' sʋm, Wina'am bɔɔd nɛ suokanɛ ka o na kɛ ka ti lɛb o san'an na. 15 Nannanna m kena ye m yɛlif nɛ'ɛŋa, m zugdaan onɛ aan m Na'aba, bɔzugɔ nidib la kɛnɛ ka dabiem mɔrim, ka m tɛn'ɛs ye, M na pian' tis Na'ab la, ka daasi'erɛɛ o na maali m yɛl la tisim. 16 Daasi'erɛɛ Na'ab na siak ka faaɛn man nɛ m biig la dau kanɛ bɔɔd ye o kɛ ka ti kʋ nyaŋi di faar linɛ ka Wina'am maali tisi ti la nu'ugin. 17 “Nannanna man yɛt si'eli nwa, ‘M zugdaan onɛ aan m Na'aba, fʋ pian'ad na tisim yɔlisim, bɔzugɔ fʋ nwɛnɛ Wina'am maliak nɛ, ka mi' dinɛ an sʋm nɛ bɛ'ɛdi bakid. Fʋ Zugsɔb Wina'am la na bɛ nɛf!’ ” 18 Ka Na'ab la yɛl pu'a la ye, “M ye m bu'osif nɛ bu'osʋg, amaa da su'a si'ela.” Ka pu'a la lɛbis ye, “Naa, m zugdaana, bu'osim!” 19 Ka Na'ab la bu'os o ye, “Joab nu'ug bɛɛ fʋ yɛl nwa wʋsa pʋʋgin, bɛɛ m ma'aanɛɛ?” Ka pu'a la lɛbis ye, “Li anɛ sida, zugdaana, sɔ' kae na ki'is fʋn yɛl si'el la wʋsaa. Ɛɛn, li anɛ fʋ tʋmtʋm Joab n pa'alim ye m niŋi li. Onɛ pian' pian'abama wʋsa tisim. 20 Fʋ tʋmtʋm Joab n niŋ nɛ'ɛŋa nɛ ye o tiak yɛlbanɛ bɛ nannanna la. M zugdaana, fʋ mɔr ya'am nwɛnɛ Wina'am maliak nɛ. Fʋ mi' dinɛ wʋsa maan teŋ la zug wʋsa.”David n Kɛ Absalɔm Taali Bas la yɛla
21 Na'ab la da yɛl Joab ye, “Li an sʋm, m na tʋmi li. Kem mɔr m biig Absalɔm n lɛb na.” 22 Ka Joab vanbin ka nɔk o nindaa kpa' teŋi tis o na'asi, ka kaanb, kaanb sʋŋʋ tis o ka yɛl ye, “Na'ab onɛ an m zugdaana, nannanna m baŋ ye m paae fʋ ya'am, bɔzugɔ fʋ maal man sɔs si'el la tisim.” 23 Ani ka Joab keŋ Gesur n dɔl Absalɔm lɛb Jerusalem na. 24 Amaa Na'ab la da yɛl ye, “Asɛɛ ka o keŋi o mɛŋ yin. O kʋ nyɛ man nindaa.” Absalɔm da kuli o yin ka pʋ nyɛ Na'ab la nindaa. 25 Israel teŋin wʋsa, sɔ' da kae nyɛt na'asi wʋʋ Absalɔm, o vɛnlim nɛ o zi'esim la zug. Din yi o zugin keŋ sigi o nɔba ni o da pʋ mɔr gba'arɛ. 26 O zuobid la ya'a da ɛɛnti nɔbigi zu'oe ka yʋ'ʋn tɛbis la, o kiesidi li nɛ. O da kiesidi o zuobid la yʋʋm wʋsa nɔɔr yinne. O da ɛɛnti vaae mak ka li tɛbisim zu'oe. 27 Absalɔm da du'a biribis atan' nɛ bipuŋ yinne. Bipuŋ la yʋ'ʋri da buon Tama. O da anɛ pu'a vɛnliŋ. 28 Absalɔm da bɛ nɛ Jerusalem yʋma ayi' ka pʋ nyɛ Na'ab la nindaa, 29 ka tʋm buol Joab ye o kena ka o tʋm o Na'ab la san'an. Amaa Joab da zan'as ka pʋ keŋɛ. Ka o lɛn tʋm paas nɔɔra ayi' ka o zan'as ka pʋ kenaa. 30 Absalɔm da yɛl o yammis la ye, “Gɔsimi ya, Joab pɔɔgʋ bɛ man pɔɔg la zugin la; kem nyu'oe nɛ li nɛ bugum!” Absalɔm yammis la sid da nyu'oe pɔɔg la nɛ bugum. 31 Ka Joab keŋ Absalɔm yinne bu'os o ye, “Bɔ ka fʋ yammis la nyu'oe m pɔɔg la?” 32 Ka Absalɔm lɛbis o ye, “Gɔsima, m tʋmi fʋ san'an na ye fʋ kena ka m tʋmif na'ab la san'an ka fʋ bu'os o ye, ‘Bɔzug ka fʋ buolim ka m yi Gesur lɛb na? M ya'a kpɛn bɛɛn anina li naan sɔn'ɔn.’ Tɔ, m bɔɔd ye m nyɛ Na'ab la, ka m ya'a ka' bʋʋdɛ, on kʋʋmim.” 33 Joab da keŋ yɛl Na'ab la, ka Na'ab la buol Absalɔm, ka o kpɛn' na vanbin ka o nindaa kpa' teŋ Na'ab la tuon. Ka Na'ab la pʋ'ʋs o sʋ'ʋŋa.