Amnon tʋʋmbɛ'ɛd yɛla
13
1 Li da paae saŋsi'a ka David biig Amnon ya'am kpɛn' o taʋn Tama. Tama da anɛ pu'asadvɛnliŋ hali, ka an David biig Absalɔm mabiig. 2 Amnon ya'am da kpɛn' o hali ka o ti ba'asi bɛn'ɛd o yɛla. Pu'asadir la da nan zi' dau, ka li tɔi hali nɛ Amnon n na nyaŋi niŋ o si'el. 3 Amnon da mɔr zua ka o yʋ'ʋr buon Jonadab. O da anɛ Semea onɛ an David bier la biig. Jonadab da anɛ dau kanɛ mɔr bibi'elim suoya. 4 Ka o bu'os Amnon ye, “Bɔ ka fʋ an na'abiig ka mɔr sʋnsa'aŋ daar wʋsa wala? Fʋ kʋ yɛli maa?” Ka Amnon yɛl o ye, “M ya'am bɔɔd Tama, m ba'abiig Absalɔm taʋn la.” 5 Ka Jonadab yɛl o ye, “Kem digin gadʋg zug ka ma' ye fʋ bɛn'ɛd nɛ. Fʋ saam ya'a ti kena gɔsif, fʋn yɛlim o ye, ‘M bɔɔd ye m taʋn Tama kena maal diibi tisim ka m di. Kɛl ka o kena maali m tuon ka m gɔsid o ka dii o nu'ugin.’ ” 6 Ka Amnon digin ka ma' ye o bɛn'ɛd nɛ. Na'ab la ti kena ye o gɔs o la, ka Amnon yɛl ye, “M bɔɔd ye m taʋn Tama kɛɛn m san'an na maal disʋŋʋ tisim ka m dii o nu'ugin.” 7 Ka David tʋm yinne buol Tama n yɛl o ye, “Kemi fʋ taʋn Amnon yinne maal diibi tis o.” 8 Ka Tama keŋ o taʋn Amnon yinne paae ka o dig gadʋ zug, ka o nɔk zɔm nɔni maal bodobodo sɛn' li o san'an. 9 Ka nɔk laa niŋ diib la tis o, amaa ka o zan'as ka pʋ dii. Ka Amnon yɛl ye, “Sɔ' wʋsa yim kpɛla,” ka ba wʋsa yi. 10 Ka Amnon yɛl Tama ye, “Mɔr diib la kpɛn' dɔɔg pʋʋgin na ka m di fʋ nu'ugin.” Ka Tama nɔk dikanɛ ka o maal la kpɛn' o taʋn Amnon dɔgbɛɛndigin la. 11 On mɔri kena tis o ye o di la, ka o gban'e o ka yɛl ye, “M taʋn, kem na digin nɛ m.” 12 Ka o yɛl ye, “M taʋn, da niŋ ala! Da mugusi ma, nɛ' pʋ sʋm ye li tʋm Israel teŋinɛ. Da tʋm tʋʋmbɛ'ɛkaŋaa. 13 Ka manɛ; m na niŋ wala yis nyan kaŋa? Ka fʋnɛ? Fʋ na nwɛnɛ zɔlʋg kanɛ an bugus Israel teŋin. Fʋ ya'a yɛl Na'ab la, o kʋ zan'as ye fʋ da dii ma.” 14 Amaa ka o pʋ kɛlis o pian'ad laa. Ka o paŋi gat o la zug ka o nyaŋi bibig o. 15 Din yii ani, ka Amnon ya'am yʋ'ʋn yi Tama ka o kisig o hali gaad on da nɔŋ o si'em la. Amnon da yɛl o ye, “Duom yi!” 16 Ka o yɛl ye, “Ayei! Fʋ ya'a kadimi yis, li bɛ'ɛd gaad fʋn maalim si'el la.” Amaa ka o zan'as ka pʋ wʋm tis oo. 17 Ka o buol o mɛŋ tʋmtʋmi yɛl o ye, “Vɛ'ɛgim pu'a kaŋa yis ka kpar dɔɔg la lɛbis.” 18 Ka o tʋmtʋm la yis o yiŋ ka kpar dɔɔg la. Tama da yɛnɛ fukanɛ ligidi zu'oe. Li da anɛ ba malʋŋ ye na'abikanɛ nan zi' dau yɛɛd fuban la buudi. 19 O da nɔk tampɛligim bugi o zugʋ pa'an o sʋnsa'aŋi an si'em, ka aaɛn fukanɛ ka o yɛ la, ka nɔk o nu'ugʋ kʋk zugʋ kaasidi ken. 20 Ka o taʋn Absalɔm bu'os o ye, “Fʋ taʋn Amnon digin nɛf nɛ bɛɛ? M taʋn, kɛl tʋkpiidʋg, da kɛ ka li daami fɔ, ka o anɛ fʋ taʋn.” Ka Tama kpɛlim o taʋn Absalɔm yin nɛ sʋnsa'aŋ ka bɛɛ o kɔn'ɔkɔn'. 21 Na'ab David n wʋmi li wʋsa la ka o sʋnf pɛlig 22 Absalɔm da pʋ yɛl Amnon si'ela, sʋm bɛɛ bɛ'ɛdɛ, amaa o da kisig Amnon hali bɔzugɔ on diisi o taʋn Tama nyan la.Absalɔm kʋ Amnon
23 Yʋma ayi' nya'aŋ, ka banɛ kiesid Absalɔm pɛ'ɛs kɔnbid la bɛ Baal Hazo linɛ kpi'e Efiram la, ka o buol na'abiis la wʋsa ye ba kena maal sumalisim nɛ o. 24 Ka Absalɔm keŋ na'ab la san'an yɛl o ye, “Banɛ kiesidi m pɛ'ɛs kɔnbid la kena. Naa, fʋn nɛ fʋ na'ayikpɛm la na kena la'as nɛ tii?” 25 Ka o lɛbis ye, “Ayei, m biiga, ti wʋsa kʋ la'asi keŋɛ. Li na an ziidi tisif.” La'am nɛ Absalɔm da mɔ nɛ nimmua ye o keŋ la, o zan'as nɛ ka lɛɛ niŋ o zug albareka. 26 Ka Absalɔm yɛl o ye, “Ya'a aan ala fʋn kɛ ka Amnon onɛ aan m bier la dɔlli ti keŋ.” Ka na'ab la bu'os o ye, “Bɔ ka fʋ bɔɔd ye Amnon dɔlli keŋɛ?” 27 Amaa Absalɔm da sin'ig o galis, ka o siak ye Amnon nɛ na'abiis la wʋsa kem. 28 Absalɔm da yɛl o nidib la ye, “Kɛlisimi! Amnon ya'a ti nu daam tig hali, ka m yɛl ye, ‘Nwɛ'ɛmin o,’ yanam kʋʋm o. Da zɔti dabiem, kpɛ'ɛŋimini ya sʋnf, ka manɛ tisi ya nɔɔr.” 29 Absalɔm nidib la da niŋ Amnon wʋʋ on yɛli ba si'em la, ka na'abiis la duoe ban'a ba widi zɔ. 30 Ban nam bɛ suor la, ka labaar paae Na'ab David san'an na ye, “Absalɔm kʋ na'abiis la, baa yinne pʋ kpɛlim.” 31 Ka Na'ab la duoe zi'en, ka aaɛn o fuug sʋnsa'aŋ zug ka lɛbi digin teŋin. Ka o yammis la mɛ duoe aansi ba fuud. 32 Amaa Semea onɛ an David bier la biig Jonadab da yɛl ye, “M zugdaana, da tɛn'ɛs ye ba kʋnɛ na'abiis la wʋsa, Amnon ma'aa kpi. Nɛ' anɛ dinɛ pʋn dɛŋi bɛ Absalɔm sʋnfʋn, din yi daakanɛ ka Amnon bibigi o taʋn Tama la. 33 Naa, m zugdaana, da kɛ ka fʋ pʋtɛn'ɛr an wʋʋ fʋn wʋm si'em ye na'abiis la wʋsa kpinɛ la. Ka Amnon ma'aa kpi.” 34 Saŋkan ka Absalɔm pʋn zɔ. Ka dau kanɛ zi'e gur la gɔs suorin la nyɛ nidib bɛdegʋ ka ba bɛɛ o tuonnɛ yi kʋkʋn la baba sigid na, ka o keŋ yɛl Na'ab la ye, “Man nyɛ nidib ka ba yi Horonam kʋkʋn la baba kenna.” 35 Ka Jonadab yɛl Na'ab la ye, “Naa, m pʋ yɛlɛɛ, ka' na'abiis la nwaa?” 36 On pian' naae la, ka na'abiis la kpɛn' na kaasidi agɔla gɔla. Ka Na'ab la nɛ o yammis la mɛ kum hali nɛ sʋnsa'aŋ.
Absalɔm n zɔɔ keŋ Gesur la yɛla