Natan n sa'al David si'em
12
1 Zugsɔb la da tʋm Natan David san'an, on da paae la, o da siilim o siiliŋ ye, “Dapa ayi' da bɛ teŋ si'a. Yinne da anɛ kpan'a ka yinne mɛ an nɔŋdaan. 2 Kpan'a la da mɔr pɛ'ɛs nɛ niigi bɛdegʋ, 3 amaa nɔŋdaan la da pʋ mɔr si'ela ya'a pɛsa'abil yinne ma'aa ka o da da'. O da gʋ'ʋl o, ka o la'am nɔbig nɛ o mɛŋ biis. On dit disi'a la ka pɛ'og la mɛ dit ka nuud, hali ka la'am digi o nɔba zug. O yʋ'ʋn da nwɛnɛ o pu'ayua nɛ. 4 Saan sɔ' da sig kpan'a la yin na, amaa dau la da zan'as nɛ on na gban'e o pɛ'og bɛɛ naafʋ kɔdigi tis saan onɛ sig o la. Ka lɛɛ zaŋ nɔŋdaan la pɛ'ɛyimmir la kʋʋ maal saauŋʋ tis o saan la.” 5 David sʋnf da pɛlig nɛ dau la hali ka o yɛl Natan ye, “Ya'a an sida, dau kanɛ tʋm nɛ'ɛŋa la nar ye o kpi! 6 Asɛɛ o yɔ pɛ'ɛkan la taaba anaasi, bɔzugɔ on tʋm nɛ'ɛŋa ka pʋ zɔ nimbaanlig la.” 7 Ani ka Natan yɛl David ye, “Fʋnɛ an dau kan la! Zugsɔb onɛ an Israel Wina'am la yɛl ye, ‘Manɛ bu'oe malʋŋ kpaam niŋi fʋ zugʋ diisif Israel na'am, ka yisif Saul nu'ugin. 8 M zaŋi fʋ zugdaan la yir nɛ o pu'abi niŋi fʋ nu'usin. M zaŋ Israel nɛ Juda tisif. Ka nɛ' wʋsa ya'a pɔɔdi fʋ nini ni, man naan tisi nɛf ka li gaad ala. 9 Bɔ ka fʋ nɛ'ɛs Zugsɔb la pian'ad ka tʋm bɛ'ɛd kaŋa o tuonnɛ? Fʋ kʋ Uria nɛ sʋ'ʋraug ka nɔk o pu'a ka o lɛbigi fʋ pu'a. Fʋ kɛya ka Ammon dim kʋ o. 10 Dinzugɔ, tuk kaŋa kʋ naae fʋ yinne, bɔzugɔ, fʋ nɛ'ɛs man ka nɔk Uria onɛ an Hitti nid la pu'a ka o lɛbigi fʋ din.’ 11 Zugsɔb la yɛl si'eli nwa ye, ‘Fʋ yir la wʋsa pʋʋgin m na kɛ ka nid yinne zi yɛlbɛ'ɛdi kɛɛn fʋ zugin na. Fʋ nifin ka m na zaŋi fʋ pu'ab la tis onɛ pʋ lalli fɔ ka o na digin nɛ ba nintaŋ. 12 Fʋ daa su'anɛ niŋ, amaa m na niŋi li nintaŋ Israel dim wʋsa nini ni.’ ”David n da siak ye o tʋm taal la
13 David da yɛl Natan ye, “M tʋm taali pɔ'ɔg Zugsɔb la.” Ka Natan lɛbis o ye, “Zugsɔb la yisi fʋ tʋʋmbɛ'ɛdi bas. Fʋ kʋ lɛn kpii. 14 Amaa fʋn maal nɛ'ɛŋa la zug, fʋ kɛya ka Zugsɔb la dataas nɛ'ɛs o. Biribiŋ kanɛ ka fʋ du'a la na kpi.” 15 Natan kulig la nya'aŋ, Zugsɔb la da kɛ ka bikanɛ ka Uria pu'a du'a tis David la lu ban'a. 16 David da bɛlim Wina'am, biig la yɛla. O da lɔ nɔɔr ka kpɛn' o yin la digin teŋin yʋ'ʋŋ wʋsa. 17 Ka o yin la kpɛɛmnam kena zi'e o san'an bɛlim o ye o duom teŋin la. Ka o zan'as ka mɛ pʋ la'as nɛ baa di diibɔ. 18 Daba ayɔpɔi daar ka biig la kpi. David yammis la da zɔti dabiem nɛ ban na yɛl o ye o biig la kpiya, ba da tɛn'ɛs ye, “Biig la daa nan vʋe ka ti pian' tis o, ka o pʋ kɛlisi ti pian'ad la, ti na niŋ wala yɛl o ye biig la kpiya? O na tun'e pu'alim o mɛŋ!” 19 Na'ab David da nyɛ ka o yammis la nya'am taaba ka o baŋ ye biig la kpinɛ, ka bu'os ye, “Biig la kpinɛɛ?” Ka ba lɛbis ye, “Ɛɛn, o kpinɛ.” 20 Ka o duoe teŋin la sʋ ka suoɛn kpaam ka tiaki o fuud, ka duoe kpɛn' Wina'am Pʋ'ʋsim Yinnɛ zun'e Zugsɔb la. Ka lɛbi o mɛŋ yin. Ka yɛl ye ba tisim o diib, ka ba tis o ka o di'e di. 21 Ka o yammis la bu'os o ye, “Bɔ ka fʋ tʋm anwa? Fʋ biig la pa'a nan vʋe saŋsi'a la ka fʋ lɔ nɔɔr ka kum, ka biig la yʋ'ʋn kpi ka fʋ duoe ditta?” 22 Ka o lɛbis ye, “Biig la pa'a nan vʋe la m lɔ nɔɔr ka kum, ka tɛn'ɛsid ye nid zi', daasi'erɛɛ Zugsɔb la na zɔɔ m nimbaanlig ka kɛ ka biig la vʋ'ʋg. 23 Amaa on sadigim kpi la, bɔ ka m lɛm lɔɔd nɔɔr ya'asɛ? M na nyaŋi vʋ'ʋg o? Manɛ na keŋ o san'an, amaa o kʋ lɛn lɛb man san'an naa.”
Solomon du'am
24 David da bɛlisi o pu'a Batsieba, ka kpɛn' o san'an digin nɛ o ka o du'a biribiŋ, ka ba pʋd o yʋ'ʋr Solomon. Zugsɔb la da nɔŋ o, 25 ka dinzug, o da tʋm o nɔdi'es Natan ye o pʋd o yʋ'ʋr ye Jedidia.a
David nɛ Joab n faaɛn Rabba teŋ la
26 Joab da zab nɛ Rabba, Ammon dim teŋ tita'ar la, nyaŋi faaɛn ba na'anam kpi'euŋ zin'ig la. 27 Joab da tʋm yɛl David ye, “Man zabi nyaŋ Rabba faaɛn ba ku'om zin'ig la. 28 Nannanna la'asim zabzabidib banɛ kpɛlim la kena gilig tempʋʋg la zabi nyaŋi li fʋ mɛŋ; ya'a ka' alaa, man na faaɛn teŋ la ka ba na zaŋ man yʋ'ʋri pʋdi li.” 29 Alazug David sid da la'as zabzabidib la wʋsa mɔri keŋ Rabba zabi nyaŋi li. 30 O da nɔki ba na'ab la na'am zupibig dinɛ an sanlima ka li tɛbisim an sanlim gbila ayɔpɔi, ka ba zaŋ kugbanɛ vɛnl ka li ligidi zu'oe la sɛɛn tabili li. Ka zaŋi li pid David. O da vaae la'ad bɛdegʋ yi teŋin la. 31 Ka mɔr nimbanɛ bɛɛ anina la yina bɔ tʋʋma tisi ba ka ba tʋm nɛ liemis nɛ kunya. Ka kɛ ka ba nwɛ'ɛd tampiga. O da maali ala Ammon dim tɛɛnsin la wʋsa. Ka David nɛ o zabzabidib la wʋsa lɛb Jerusalem.