David n tʋm tʋʋmbɛ'ɛd tita'ar la yɛla
11
1 Li da anɛ ʋʋn, saŋkanɛ ka na'anam ken zaba la, ka David tʋm zabzabidib banɛ gur o la, nɛ Israel dim wʋsa ka Joab aan ba tuongat. Ba da nyaŋ Ammon dim la ka lɔbi gilig Rabba teŋ tita'ar la. Na'ab David on da kpɛlim nɛ Jerusalem. 2 Zaam yinne ka o vʋ'ʋsi naae ka dʋ na'ayir dɔɔd la zugʋ ken, ka gɔsi nyɛ pu'a ka o sʋʋd. Pu'a la da vɛnlnɛ hali. 3 David da tʋm sɔ' ye o bu'osi baŋ pu'a la an sɔ'. Ka dau la lɛb na yɛl ye, “O anɛ Batsieba onɛ an Eliam pu'ayua ka an Uria onɛ an Hitti buudi la pu'a.” 4 Ani ka David tʋm ka ba buol o na ka o digin nɛ o. Ka o duoe kul. (Pu'a la pier da gaadya ka o zuŋ ka li pʋ yuugɛ.) 5 Ka pu'a la yʋ'ʋn gban'e pʋʋg ka tʋm yɛl David ye, “Mam mɔri pʋʋg.” 6 Na'ab David da tʋm yɛl Joab ye, “Kɛl ka Uria onɛ an Hitti nid la kul na.” Joab da yɛl Uria ka o kul David san'an. 7 Uria da paae David san'an na la, o da bu'os o ye Joab nɛ zabzabidib la an wala, ka zaba la ken wala? 8 David da yɛl Uria ye, “Kulim yinne sʋ ka vʋ'ʋs.” Uria da yi na'ayin la, ka na'ab tis piini ye ba keŋ tis o. 9 Amaa Uria da pʋ kulɛ, ka gbɛn na'ayir la za'anɔɔrin nɛ na'ab tʋmtʋmnib la sieba. 10 Ban da yɛl David ye, “Uria pʋ kul la,” ka o bu'os o ye, “Fʋ pʋ yinɛ suolalli naa? Bɔ ka fʋ pʋ kuli vʋ'ʋsɛ?” 11 Uria da lɛbis ye, “Zugsɔb Nɔnaar Daka la nɛ Israel nɛ Juda dim gbɛɛnd nɛ sʋga ni, ka Joab onɛ aan m zugdaan la nɛ o nidib bɛ paalʋ. Man na niŋ wala kul yinne di ka nu ka digin nɛ m pu'a? Asida ka m yɛt ye man kʋ niŋ dinɛ.” 12 “Ka David yɛl o ye, gbɛɛm kpɛla dabisir yinne paas, ka bɛog ka m kɛ ka fʋ lɛb.” Ka Uria kpɛlim Jerusalem daakan la nɛ dabisir kanɛ tia'al la. 13 David da buol o ka ba la'am di ka nu, hali ka kɛ ka o nu daam kʋʋl. Amaa zaam da ma'ae la, Uria da yina nɛ sɔŋʋ digin nɛ o zugdaan yammis la ka pʋ kulɛ. 14 Bɛogʋ da nie ka David sɔb gbauŋ ka Uria mɔri keŋ tis Joab. 15 Gbauŋ la pʋʋgin o da sɔbi ye, “Niŋim Uria tuon, zin'ikanɛ ka zaba la mu'oe la. Ka lɛb nya'aŋ ka ba nwɛ' o bas ka o kpi.” 16 Joab n da nyaŋ ka ba gilig tempʋʋg la, o da niŋ Uria zin'ikanɛ ka o mi' ye ba dataas banɛ kpi'em hali bɛɛ ani zabidi lɛbisid na la. 17 Tempʋʋg la nidibi da yina zabid nɛ Joab la, ba da kʋ David zabzabidib la sieba hali nɛ Uria onɛ an Hitti nid la. 18 Joab da sɔb gbauŋʋ tis Na'ab David n yɛl zaba la keŋ si'em wʋsa. 19 O da yɛl banɛ ka o tʋm la ye, “Yɛlimi Na'ab la zaba la wʋsa yɛla, 20 ka o sʋnf ya'a duoe ka o bu'os ye, ‘Bɔ ka ya li'el tempʋʋg zaŋguom la zabida? Ya zi' ye ba na tɔɔnd piema tut zaŋguomin la naa? 21 Ya tam Jerubɛset biig Abimelek yɛla nɛɛ? O da li'el nɛ Tebɛz teŋ zaŋguom ka pu'a lɔbig o nɛ niŋkaŋ ka o kpi. Bɔ ka ya li'en zaŋguom la?’ O ya'a ti bu'osif nɛ', fʋn yɛlim o ye, ‘Fʋ tʋmtʋm Uria mɛ kpiya.’ ” 22 Ka on tʋm sɔ' la yi zaba la nii keŋ yɛl David si'el wʋsa, wʋʋ Joab n tʋm o ye o yɛl o si'em la. 23 O da yɛl David ye, “Na'aba, nidib la nyaŋi ti nɛ yi paalʋ la na, amaa ti nyaŋi kadi ba lɛbis teŋ la za'anɔɔrin la. 24 Banɛ tɔɔnd tiraad la tɔnnɛ piema zaŋguomin la na ka fʋ yammis la sieba kpi. Hali fʋ yammʋg Uria onɛ an Hitti buudi la mɛ kpiya.” 25 Ka David lɛbisi yɛl o ye, “Yɛlim Joab ye o da kɛ ka li pak oo. ‘Ka zaba ni, kum pʋ yaa sɔ'ɔɔ. Kpɛ'ɛŋimi fʋ mɛŋi zab nɛ nimmua ka san'am teŋ la.’ Yɛlim Joab nɛ'ɛŋa ka li kpɛ'ɛŋ o.”