David zabi nyaŋ Ammon dim
10
1 Li da paae saŋsi'a ka Ammon dim na'ab kpi, ka o biig Hanun dii o saam na'am. 2 Ka Na'ab David tɛn'ɛs ye, “M na maal Hanun onɛ an Nahas biig la pʋpielim wʋʋ o saamme da maalim pʋpielim si'em la.” Dinzug, o da tʋm nidib ye ba keŋ pʋ'ʋs Hanun saam la kʋʋr. David nidib la paae Ammon dim teŋin la, 3 ka Ammon dim kpɛɛmnam la yɛl Hanun onɛ aan ba zugdaan la ye, “Fʋ tɛn'ɛs ye David na'as nɛ fʋ saam la ka tʋm nidib na ye ba pʋ'ʋsɛɛ? Ayei, fʋ zi' ye David tʋm o nidib la nɛ na ye ba kena labisi gɔs teŋ la ka o ti kena zabi faaɛn lii?” 4 Ala ka Hanun gban'e David nidib la pʋni ba tiemis la pʋsʋk-pʋsʋk ka maki ba gbina zinzema nwaasi ba fuud la bas ka kadi ba yis. 5 Ban da yɛl David yɛl kaŋa la, o da tʋmi o tʋmtʋmnib ka ba tʋ'ʋsi ba nɛ labakaŋa ye, “Kpɛlimi Jeriko teŋin ka ya tiemis la bus ka ya nyaan kul na” bɔzugɔ ba da diisi banɛ nyan hali.6 Ammon dim la baŋ ye ba pɔ'ɔg David la, ba keŋ da' zabzabidibi paasi ba mɛŋ. Ba da da'anɛ zabzabidib tusa pisi banɛ yi Bet-Rehob nɛ Zoba dinɛ bɛ Aram sʋ'ʋlimin la, la'am nɛ Maaka na'ab nɛ o nidib tusir, nɛ nidib tusa pii nɛ ayi' banɛ yi Tob sʋ'ʋlimin na. 7 David n da wʋm nɛ'ɛŋa la, o da tʋm Joab nɛ zabzabidib la wʋsa. 8 Ka Ammon dim la yina ka ti'eb zaba ti'ebʋgʋ ba teŋ la za'anɔɔrin. Ka Aram dim banɛ yi Zoba na nɛ Rehob la'am nɛ Tob nɛ Maaka nidib wʋsa la'as sian'arin zin'ig yinne. 9 Joab da nyɛya ka zabzabidib la tʋ'ʋsid o tuon nɛ o nya'aŋ wʋsa la o gaans Israel zabzabidib banɛ an ninkpi'ema ka mi' zaba sʋ'ʋŋa la zi'eli ba gu' Aram dim la. 10 Ka zaŋ banɛ kpɛlim la niŋ Abisai onɛ aan o pitʋ la nu'ugin ka kɛ ka ba gu' Ammon dim la. 11 Joab da yɛl o ye, “Aram dim la ya'a kpi'emi gaadi m paŋ, fʋn kena sʋŋim, ka Ammon dim la mɛ ya'a kpi'em gaadi fʋ paŋ, mam mɛ na kena sʋ'ʋŋif. 12 Zi'enim sʋ'ʋŋa ka kpɛ'ɛŋi fʋ sʋnf ka ti zabi ti nidib nɛ ti Wina'am teŋ la yɛla. Zugsɔb la na maal linɛ ka o mɛŋ bɔɔd.” 13 Ka Joab nɛ o nidib la keŋ tuonnɛ zab nɛ Aram dim la, ka ba zɔɔ widig. 14 Ammon dimi nyɛ ka Aram dim la zɔt la ka ba mɛ zɔɔ keŋ kpɛn' tempʋʋgin la ka bas Abisai. Ka Joab bas Ammon dim la zaba ka lɛb Jerusalem na.
15 Aram dimi baŋ ye Israel dim nyaŋi ba la, ka ba lɛn keŋ la'as taaba. 16 Hadadeze da kɛ ka Aram dim sieba lɔ'ɔŋ kɔldaug la na, ka ba keŋ Helam teŋin, ka Siobak onɛ an Hadadeze zabzabidib kpɛɛm la gaadi ba tuon. 17 Ban da yɛl David nɛ'ɛŋa la, ka o la'as Israel dim wʋsa, lɔ'ɔŋ Joodan kɔldaug la keŋ Helam. Aram dim la da zi'enɛ maan siri ye ba tʋ'ʋs David n zab nɛ o. 18 Amaa ba da zɔya ka bas Israel dim, ka David kʋ ba zabzabidib banɛ mɔr tɛrekonamɛ zabid la kɔbisyɔpɔi ka mɛ kʋ zabzabidib banɛ ken nɔba zabid la tusa anaasi. O mɛ da nwɛ' Siobak onɛ aan ba zabzabidib tuongat la ka o kpii anina. 19 Na'anam banɛ wʋsa da la'as nɛ Hadadeze la nyɛ ka Israel dim nyaŋi ba la, ba mɔr sumbʋgʋsʋm nɛ Israel dim ka lɛbigi ba tʋmtʋmnib.
Dinzug, Aram dim la da zɔ dabiem ka pʋ lɛn sʋŋ Ammon dim la ya'asɛ.