David nɛ Mefibosef yɛla
9
1 Ka David bu'os ye, “Sɔ' nan kpɛlim Saul yin la ka m na pa'al o m pʋpielim Jonatan zugɔ?” 2 Saul tʋmtʋm yinne da bɛ ka o yʋ'ʋr buon Ziba. Ka ba buol o kɛn David san'an na ka na'ab la bu'os o ye, “Fʋnɛ an Ziba laa?” Ka o lɛbis ye, “Naa, Ɛɛn; m anɛ fʋ tʋmtʋm.” 3 Ka na'ab la bu'os o ye, “Sɔ' pʋ kpɛlim Saul yin ka m pa'al Wina'am pʋpielim tis oo?” Ka Ziba lɛbis na'ab la ye, “Jonatan biribiŋ yinne nan kpɛm bɛ, ka pɔn'ɔlim.” 4 Ka na'ab la bu'os ye, “O bɛ yaanɛ?” Ka Ziba lɛbis o ye, “O bɛ Lo-Debaa teŋin, Ammiel biig Makir yin.” 5 Ka Na'ab David kɛ ka ba keŋ Makir onɛ yi Lo-Debaa ka o saam an Ammiel la yinne mɔr o na. 6 Mefibosef onɛ an Jonatan biig ka an Saul yaaŋ la da paae David san'an na la, o da su'un teŋin ye o na'as o. Ka David buol o ye, “Mefibosef!” Ka o siak ye, “Naa, man onɛ aan fʋ tʋmtʋm la nwa.” 7 Ka David yɛl o ye, “Da zɔt dabiem,” ka m sid na pa'ali fʋ m pʋpielim, fʋ saam Jonatan zug. M na lɛbis paalʋ kanɛ wʋsa aan fʋ yaab Saul paalʋ la tisif. Man nɛ fʋ na la'asidi diti m diib zin'igin. 8 Ka Mefibosef su'un teŋin ka yɛl ye, “Naa, m an bɔ ka fʋ tɛnri m yɛla, man onɛ nwɛnɛ bakpiilʋŋ la?” 9 Ka Na'ab la buol Ziba, onɛ an Saul tʋmtʋm la yɛl o ye, “M nɔk dinɛ wʋsa aan fʋ zugdaan Saul nɛ o yidimi sʋ'oe si'el la wʋsa tis o yaaŋ nwa. 10 Fʋn nɛ fʋ biis nɛ fʋ yammis na kua pɔɔd la tis o. Ka mɔr zʋʋd la na ka fʋ zugdaan yaaŋ la na paam diib. Fʋ zugdaan yaaŋ Mefibosef na la'asid nɛ mam m diib zin'igin.” Ziba da mɔr nɛ biribis pii nɛ anu nɛ yammis pisi. 11 Ziba da yɛl na'ab la ye, “Naa, m na tʋm wʋʋ fʋn yɛlim ye m tʋm si'em la.” Mefibosef da diti nɛ na'ab la wʋʋ o biig nɛ. 12 Mefibosef da mɔr dasaŋ bil ka o yʋ'ʋr buon Maika. Ka Ziba yidim la wʋsa an Mefibosef yammis. 13 Mefibosef da bɛ nɛ Jerusalem bɔzugɔ o da diti nɛ na'ab la, ka an pɔn'ɔr.