David na'am yaligir yɛla
8
1 Li da paae saŋsi'a ka David nyaŋ Filistia dim la ka sʋ'ʋgi ba ka faaɛn teŋ kanɛ ka ba buon ye, Meteg Amma la yis Filistia dim la nu'usin. 2 David mɛ da nyaŋ Moab dim la. On da nyaŋi ba naae la, o da kɛ ka ba digin teŋin tʋn taaba ka o nɔk nwiigi maki ba. O ya'a mak nwiig la zin'isa ayi', o kʋʋdi ba nɛ, amaa makir kanɛ paas atan' la o basidi ba nɛ. Alazugʋ da kɛ ka Moab dim la siaki dɔl David ka yɔɔd lampɔ tisid o. 3 Dinɛ paas la, David da zab nɛ Na'ab Hadadeze onɛ an Rehob biig ka an Zoba na'ab la nyaŋ o, on da lɛbid ye o di'e o sʋ'ʋlim dinɛ dɛn'ɛd Efiritis kɔldaug saŋsi'a la. 4 David da faaɛn o zaba tɛrekonam la tusir, nɛ banɛ zabid nɛ tɛrekonam la tusa yɔpɔi nɛ zabzabidib banɛ ken nɔba la tusa pisi, ka kɛns widi wʋsa gada ka li kpɛlim nɛ widi banɛ tɛɛd tɛrekonam la kɔbiga ma'aa. 5 Aram dim banɛ bɛ Damaskus la da wʋmya, ka kena ye ba sʋŋ Hadadeze onɛ an Zoba na'ab la. David da kʋʋ ba nidib tusa pisi nɛ ayi', 6 ka gaŋ o zabzabidib tuongatib sieba niŋ Aram dim sʋ'ʋlimin dinɛ bɛ Damaskus la. Li da kɛ ka Aram dim la lɛbig o sʋ'ʋlim nidib ka yɔɔd lampɔ tisid o. Zugsɔb la da tis David paŋ ka o nyaŋid on keŋ zin'isi'a wʋsa. 7 David da faaɛn Hadadeze zabzabidib tuongatib la zaba la'asʋma mɔri kul Jerusalem. Li da anɛ gbanti'edis ka ba nɔk sanlima m bulig. 8 O mɛ da faaɛn kʋntzɛn'ug bɛdegʋ Teba nɛ Berota tɛɛnsin la, linɛ an Hadadeze sʋ'ʋlim la din.9 Tou onɛ an Hamat dim na'ab la da wʋm ye David nyaŋ Hadadeze zabzabidib la wʋsa la, 10 o tʋmi o biig Joram Na'ab David san'an na ye o pʋ'ʋs o nɛ o zusʋŋ, nɛ on zabi nyaŋ Hadadeze onɛ da zabid nɛ on Tou la. Joram da mɔr sanlima nɛ anzurifa nɛ kʋntzɛn'ug na tis o. 11 Na'ab David da pɛsig la'ad linɛ an sanlima, nɛ anzurifa nɛ kʋntzɛn'ug la tis Zugsɔb la, wʋʋ on da maal si'em nɛ sanlima nɛ anzurifa banɛ ka o zab nɛ teŋ sieba nyaŋ ka vaae li kul na la wʋsa. 12 O da nyaŋ Edom nɛ Moab nɛ Ammon dim nɛ Filistia dim nɛ Amalek dim. O mɛ da pɛsig la'abanɛ ka o faaɛn Hadadeze san'an onɛ an Rehob biig ka an Zoba na'ab la. 13 David da lɛn kʋ Edom nidib tusa pii nɛ anii Yaarim Bɔn'ɔgin la. Nidib bɛdegʋ yʋ'ʋn da baŋ o ka o an yʋ'ʋr daan. 14 Ka zaŋ o zabzabidib tuongatibi gu' Edom teŋ la wʋsa. Ka Edom dim la lɛbig o sʋ'ʋlim nidib. Zugsɔb la da tis David paŋ, ka on keŋ zin'isi'a wʋsa o nyaŋid nɛ.
Na'ab David ninkpi'ema la yɛla
15 David da sʋ'ʋg Israel wʋsa, ka tʋm dinɛ an sʋm nɛ sida tisidi o nidib. 16 Joab onɛ an Zeruyia biig la da sʋ'oe zabzabidib la; Jehosafat onɛ an Ahilud biig la da sʋ'oe gbana yɛla; 17 Zadok onɛ an Ahitub biig la nɛ Ahimelek onɛ an Abiata biig la da an maanmaannib; ka Seraya mɛ an gbansɔbid; 18 Benaya onɛ an Jehoyada biig la da sʋ'oe Keret dim nɛ Pelet dim. Ka David biis la an o na'ayikpɛm.