David nyaŋir yɛla
18
1 Li da paae saŋa si'a ka David nyaŋ Filistia dim la ka sʋ'ʋgi ba ka faaɛn Gaf teŋ la nɛ tembibis banɛ gilig la yis Filistia dim nu'usin.2 David mɛ da zabi nyaŋ Moab dim ka sʋ'ʋgi ba ka ba siaki dɔl David ka yɔɔd lampɔ tisid o.
3 Dinɛ paas la, David da zab nɛ Na'ab Hadadeze onɛ an Zoba na'ab la nyaŋ o, on da lɛbid ye o di'e o sʋ'ʋlim linɛ dɛn'ɛ Efiritis kɔldaug la, ka kad o hali ti paae Hamat tempʋʋgin. 4 David da faaɛn o zaba tɛrekonam la tusir, nɛ banɛ zabid nɛ tɛrekonam la tusa ayɔpɔi nɛ zabzabidib banɛ ken nɔba la tusa pisi: ka kɛns widi la wʋsa gada ka li kpɛlim nɛ widi banɛ tɛɛd tɛrekonam la kɔbiga ma'aa.
5 Aram dim banɛ bɛ Damaskus la da wʋm, ka kena ye ba sʋŋ Hadadeze onɛ an Zoba na'ab la. David da kʋʋ ba nidib tusa pisi nɛ ayi' (22,000). 6 O da gaŋ o zabzabidib tuongatib sieba niŋ Aram dim sʋ'ʋlimin linɛ bɛ Damaskus la. Nɛ'ɛŋa da kɛ ka Aram dim la lieb o sʋ'ʋlim nidib ka yɔɔd lampɔ tisid o. Zugsɔb la da tis David paŋ ka o nyaŋid on keŋ zin'isi'a wʋsa.
7 David da faaɛn Hadadeze zabzabidib tuongatib la zaba la'asʋma mɔri kul. Li da anɛ gbanti'edis ka ba nɔk sanlima m bulig. 8 David mɛ da faaɛn kʋntzɛn'ug bɛdegʋ linɛ an sʋ'ʋŋa hali, Teba nɛ Kun tɛɛnsin linɛ an Hadadeze sʋ'ʋlim la. Lin ka Solomon da di na'am ka nɔki li maal kʋntzɛn'ug ku'om latita'ar ka li yʋ'ʋr buon ye, Atɛuk, nɛ buos nɛ kʋntzɛn'ug la'ad kɔn'ɔb-kɔn'ɔb.
9 Hamat dim na'ab Tau n da wʋm ye David nyaŋ Zoba Hadadeze zabzabidib la wʋsa la, 10 o da tʋm o biig Hadoram Na'ab David san'an na ye o pʋ'ʋs o nɛ o zusʋŋ, nɛ on zabi nyaŋ Hadadeze onɛ da zabid nɛ on Tou la. Hadoram da mɔr sanlima nɛ anzurifa nɛ kʋntzɛn'ug na tis o.
11 Na'ab David da pɛsig la'ad linɛ an sanlima, nɛ anzurifa nɛ kʋntzɛn'ug la tis Zugsɔb la, wʋʋ on da maal si'em nɛ sanlima nɛ anzurifa banɛ ka o zab nɛ teŋ sieba nyaŋ ka vaae li kul na la, O da nyaŋ Edom nɛ Moab nɛ Ammon dim nɛ Filistia dim nɛ Amalek dim wʋsa.
12 Abisai onɛ an Zeruyia biig la da kʋ Edom nidib tusa pii nɛ anii Yaarim Bɔn'ɔgin la. 13 Ka Na'ab David zaŋ zabzabidib tuongatibi gu'ul Edom teŋ la wʋsa. Ka Edom nidib la lieb o sʋ'ʋlim nidib. Zugsɔb la da tis David paŋ, ka on keŋ zin'isi'a wʋsa o nyaŋid nɛ.
Na'ab David ninkpi'ema la yɛla
14 David da sʋ'ʋg Israel wʋsa, ka tʋm dinɛ an sʋm nɛ sida tisid o nidib saŋa wʋsa. 15 Joab onɛ an Zeruyia biig la da sʋ'oe zabzabidib la; Jehosafat onɛ an Ahilud biig la da sʋ'oe gbana yɛla; 16 Zadok onɛ an Ahitub biig la nɛ Abimelek onɛ an Abiata biig la da an maanmaannib; ka Seraya mɛ an gbansɔbid; 17 Benaya onɛ an Jehoyada biig la da sʋ'oe Keret dim nɛ Pelet dim. Ka David biribis la aan o na'ayikpɛm.