Wina'am da kaanbi tis David si'em
17
1 Na'ab David yʋ'ʋn da bɛɛ o na'ayin la, o da yɛl Natan onɛ an nɔdi'es la ye, “Man na niŋ wala bɛ na'ayin ka ba maali li nɛ na'aziinr davɛnla, ka Zugsɔb nɔnaar Daka la gbɛɛnd sʋgʋrinɛ?” 2 Ka Natan lɛbis ye, “Fʋn mɔr pʋtɛn'ɛsi'a fʋ sʋnfʋn la an sʋm. Kem tuonnɛ tʋmi li, ka Wina'am la na bɛ nɛf!” 3 Daakan la yʋ'ʋŋ ka Wina'am labaar kɛn Natan san'an na yɛl o ye, 4 “Kem yɛli m tʋmtʋm David ye, Zugsɔb la yɛl ye, ‘Li ka' fʋnɛ na mɛ' yiri tis mam ka m kpɛn'ɛ. 5 Lin yi man da yis Israel dim Egipt teŋin la paae zina. Mam da bɛ nɛ sʋgʋrin yanamɛ da paae teŋ si'a wʋsa, ka naanɛ ya bɛllim zin'ig yinne ti tɔlis zin'ig yinne ni. 6 Man ken nɛ Israel dim la, m nam zi' bu'os banɛ aan ba tuongatib ka m gaŋ ye ba guri m nidib Israel dim la ye bɔ ka ya pʋ nɔk na'aziinr daadi mɛ' yiri tisi ma?’ ”7 Ka Zugsɔb la lɛn yɛl ye, “Tɔ, nannanna, yɛlimi m tʋmtʋm David ye, Zugsɔb Paŋtita'ar Sɔb la yɛl ye, ‘Manɛ zaŋi fʋ yi kɔnbkemmin na kɛ ka fʋ lieb na'abi guri m nidib Israel dim. 8 M dɔlli fʋ ken, fʋn keŋ zin'isi'a wʋsa, ka kadi fʋ dataasi yisi fʋ tuon. Nannanna m na maalif nintita'ar, nwɛnɛ nintitada banɛ bɛ dunia nwa nii an si'em la. 9 M na tis Israel dim banɛ aan m nidib la zin'ig, ka na zin'ili ba ka ba mɔri ba mɛŋ teŋ ka sɔ' kʋ lɛn daami ba ya'asɛ. Nimbɛ'ɛdnam kʋ lɛm mugusi ba wʋʋ ban da niŋid si'em pin'ilʋgʋn laa. 10 M pʋn dɛŋi maal nɛ'ɛŋa nɛ saŋa kanɛ ka m da pin'ili gaans tuongatibi tisim nidib Israel dim la. M mɛ na nyaŋi fʋ dataas wʋsa tisif. Mam Zugsɔb la mɛŋ na mɛ' yiri tisif. 11 Fʋ dabisa la bɛn ya'a ti paae, ka fʋ tig sa'ab, m na kɛ ka fʋ biig yinne duoe na di'e fʋ zin'ig. M na kɛ ka o na'am la zi'en. 12 Oŋa an onɛ na mɛ' yir mam yʋ'ʋr zug. M na kɛ ka o na'am saŋa kʋ mɔr bɛnnɛ. 13 Man na aan o saam ka on mɛ na aan m biig. M nɔŋilim la kʋ yi o san'an wʋʋ man yisi li nimbanɛ daa bɛɛ fʋ tuon la si'em laa. 14 M na kɛ ka o guri m yir la nɛ m sʋ'ʋlim la saŋa linɛ ka' bɛnnɛ, o na'am na bɛ saŋa wʋsa ka kʋ mɔr bɛnnɛ. 15 Natan da keŋ tu'as David Wina'am nie si'eli pa'al o la wʋsa.’ ”
David winsɔsʋg
16 Ka Na'ab David duoe kpɛn' zin'in Zugsɔb la tuon ka yɛl ye, “M Zugsɔb Wina'am, man aan anɔ'ɔnɛ, ka man yin la mɛ an bɔ ka fʋ dʋ'ʋsim ka mɔrim hali paae zina? 17 Li nwɛnɛ nɛ'ɛŋa nam pʋ paae fʋ ya'am, m Wina'am, ka fʋ lɛn yɛl ye fʋ na tʋm gaad ala tisim yidim bɛog sa. Fʋ lɛn gɔsim ka li nwɛnɛ manɛ gat ninsʋma dunia nwa ni nɛ, m Zugsɔb Wina'am. 18 Man David na lɛn yɛlif ye bɔ? M Zugsɔba, bɔ ya'as ka David na yɛllɛ, fʋn tis o na'asi si'a la? Bɔzugɔ fʋ mi'im, ka m aan fʋ tʋmtʋm. 19 Zugsɔba, fʋn zi'el si'em nɛ fʋ bɔɔdim la zug, nɛ man aan fʋ tʋmtʋm la zug, fʋ maal bʋntita'ar kaŋa ka nie kaanbʋg la pa'alim.
20 Sɔ' lɛn kae nwɛnɛ fʋ Zugsɔba. Win si'a mɛ lɛn kae asɛɛ fʋn ma'aa. Ti wʋm ya nɛ ti mɛŋ tʋba ka li an sida. 21 Anɔ'ɔnɛ lɛn nwɛnɛ fʋ nidib Israel dima? Fʋnɛ da faaɛn ba yis yammid pʋʋgin Egipt teŋin, ye ba aan fʋ din. Fʋ da tʋm bʋnnyalima ka kadi ba dataasi yis ka tisi ba teŋ sʋŋ ka fʋ yʋ'ʋr paam girima. Fʋ da tʋm nɛ'ɛŋa tis Israel ma'aa. 22 Zugsɔba, fʋnɛ nɔki fʋ nidib Israel dim ka ba aan fʋ mɛŋ din, saŋa dinɛ ka' bɛnnɛ, fʋn onɛ an Zugsɔb la liebi ba Wina'am.
23 Nannanna Zugsɔba, kɛl ka fʋ kaanbʋg linɛ ka fʋ zi'eli tis man kanɛ aan fʋ tʋmtʋm nɛ m yidim la, niŋ asida. Tʋm wʋʋ fʋn kaanb si'em la. 24 Ala ka fʋ sid na mɔr yʋ'ʋtita'ar saŋa wʋsa. Ka nidib na yɛl ye, Zugsɔb Paŋtita'ar Sɔb la anɛ Israel Wina'am; ka man David yir la na zi'enɛ fʋ tuon, man aan fʋ tʋmtʋm la zug.
25 Fʋn onɛ an Wina'am la, fʋ nie nɛ'ɛŋa tis man kanɛ aan fʋ tʋmtʋm la, ye fʋ na mɛ' yiri tisim, alazug ka li kpɛ'ɛŋi m ka m sɔsid Winsɔsʋg kaŋa tisidif. 26 Zugsɔba, fʋ anɛ Wina'am! Fʋnɛ kaanb, kaanb sʋŋ bama tisi fʋ tʋmtʋm. 27 Nannanna li tigi fʋ nini ye fʋ niŋ man kanɛ aan fʋ tʋmtʋm la yir bareka ka kɛ ka di kpɛn yaligidi ken tuon saŋa wʋsa. Fʋn Zugsɔb la niŋi li bareka, ka ti na nyɛɛ fʋ bareka hali saŋa lin ka' bɛnnɛ.”